Read Oshindonga-Ombiimbeli Ondjapuki 2008 1 Chronicles 21 Bible Online

1 Chronicles 21 - Oshindonga-Ombiimbeli Ondjapuki 2008 bible

1 Chronicles 21

¹Satana okwa halele, a tule Aaisraeli momupya, nokwa tokolitha David, a yalulithe oshigwana.

²David okwa lombwele Joab nomalenga omakwawo ta ti: “Indeni naIsrael alihe okuza kooha dhoshilongo sigo okooha oonkwawo, ne mu yalule aantu. Onda hala okutseya mpoka ye thike.”

³Joab okwa yamukula a ti: “Omuwa na indjipaleke Aaisraeli lwethele ye vulithe pumboka ye li po ngashingeyi! Nkeyama, ayehe aantu yoye ndishi. Omolwashike wa hala okulonga shika, u yonithe oshigwana ashihe?”

⁴Ihe omukwaniilwa okwe mu vulikitha nelombwelo lye. Joab okwa yi te endagula noshilongo ashihe shaIsrael e ta galukile kuJerusalem.

⁵Okwe eta komukwaniilwa David omwaalu aguhe kumwe gwaalumentu ya gwana okuhinga iita: 1 100 000 muIsrael na 470 000 muJuda.

⁶Molwashoka Joab okwa li u uvite nayi molwelaka lyomukwaniilwa, ina yalula we omazimo gaLevi nogaBenjamin.

⁷Kalunga ka li a hokwa shoka sha ningwa, onkee a geele Israel.

⁸David okwa ti kuKalunga: “Onda yono nayi kungoye, sho nda ningi ngeyi! Kwatha ndje u dhimine ndje po. Onda ningi uugoya!”

⁹Nena Omuwa okwa ti kuGad, omuhunganeki gwaDavid:

¹⁰“Inda, u ka lombwele David kutya otandi mu pe oompito ndatu, a hogolole po yimwe. Otandi ka gwanitha ndjoka ta hogolola.”

¹¹Gad okwa yi kuDavid e te mu hokololele shoka Omuwa a ti e ta pula: “Oshike tashi kala po?

¹²Omimvo ndatu dhondjala yekomba? Nenge oomwedhi ndatu hamu yaayaa ontuku aatondi yeni? Nenge omasiku gatatu moka Omuwa te mu ponokele negongamwele lye nota tumu elega moshilongo sheni ta longitha omuyengeli gwe mokweetela muIsrael eso? Tokola, opo ndi fale eyamukulo kOmuwa.”

¹³David okwa yamukula Gad a ti: “Ngame ondi li muudhigu uunene! Ihe ine hala ndi geelwe kaantu. Omuwa oye mwene ne tu geele, oshoka oye omunahenda.”

¹⁴Osho ngaaka Omuwa okwa tumu elega mAaisraeli, nomayuvi omilongo heyali gomuyo oya si.

¹⁵Omuwa okwa tumu omuyengeli, a hanagule po Jerusalem, ihe okwa geyuluka e ta ti komuyengeli: “Opuwo nduno! Sha gwana!” Omuyengeli okwa li a thikama polupale lwaArauna Omuyebusi.

¹⁶David okwa mono omuyengeli a thikama mewangandjo a yelutha egongamwele moshikaha she, opo a hanagule po Jerusalem. Nena David naakuluntu yoshigwana — ayehe mboka oya li ya zala omahahi — oyi isizimike ya tsa iipala yawo mevi.

¹⁷David okwa galikana a ti: “Kalunga, ongame ngoka nda yono. Ongame nda gandja elaka, aantu ya yalulwe. Aathigona mbano oya ningi shike? Omuwa, Kalunga kandje, geela ndje negumbo lyandje nou hupithe aantu yoye”.

¹⁸Omuyengeli gwOmuwa okwa lombwele Gad, a ka lombwele David, a ka tungile Omuwa oshiyambelo polupale lwaArauna.

¹⁹David okwa vulika kelaka lyOmuwa e ta yi ko, ngaashi Gad e mu lombwele.

²⁰Arauna noyanamati yane oya li taa yungula iilya polupale. Sho ya mono omuyengeli, aamati oya fadhuka po noya holama.

²¹Arauna sho a mono omukwaniilwa David ta hedha ko, okwa zi po polupale e ti isizimike a tsa oshipala she mevi.

²²David okwa ti kuye: “Kwatha ndje ndi lande po olupale lwoye, opo ndi tungile po Omuwa oshiyambelo, elega li kodhe. Otandi ku pe ofuto ya gwana po.”

²³Arauna okwa ti: “Nkeyama, lu kutha po, u ninge shoka wa hala. Oonani odho ndhika dhokulungunithilwa omayambo koshiyambelo, niiyungulitho oyo mbika, yi longitha iitemitho, niilya yi ninge omayambo. Ayihe otandi yi gandja kungoye.”

²⁴Ihe omukwaniilwa okwa yamukula a ti: “Aawe, otandi landa lela. Itandi gandja omayambo kOmuwa shoka shoye, shoka inaashi pula ndje sha.”

²⁵Okwa futu Arauna molwolupale lwe iimaliwa yoshingoli omathele gahamano.

²⁶Okwa tungile po Omuwa oshiyambelo e ta yambele ko omafikilondjambo nomakwatathanondjambo. Okwa galikana, nOmuwa okwe mu yamukula, sho a tumu omulilo gwa gu megulu e tagu lungunitha po oondjambo koshiyambelo.

²⁷Omuwa okwa lombwele omuyengeli, a shune mo egongamwele lye molumpangwa.

²⁸David okwa mono mushika kutya Omuwa okwa yamukula omagalikano ge, onkee okwa yamba oondjambo koshiyambelo polupale lwaArauna.

²⁹Etsalihangano lyOmuwa ndyoka Moses a tungile mombuga, noshiyambelo hoka haku lungunithilwa oondjambo, oya li natango peha lyelongelokalunga muGibeon pethimbo ndika,

³⁰ihe David ka li ta vulu okuya ko, a ka simaneke Kalunga, oshoka okwa li a tila egongamwele lyomuyengeli ngaashi Gad e mu lombwele.