Read Oshindonga-Ombiimbeli Ondjapuki 2008 1 Chronicles 22 Bible Online

1 Chronicles 22 - Oshindonga-Ombiimbeli Ondjapuki 2008 bible

1 Chronicles 22

¹David okwa ti: “Mpaka napa kale otempeli yOmuwa Kalunga naampaka napa kale oshiyambelo mpoka Aaisraeli taa lungunithile omayambo.”

²David okwa gandja elaka kaakwiilongo ayehe ya kala moshilongo shaIsrael, ya gongale, e te ya tula miilonga. Yamwe yomuyo oya hongo omamanya gokutunga otempeli.

³David okwa gongele ondumba yiitenda, mu ze oomboha nomakandula gomiyelo, noshikushu oshindjishindji kaashi shi kuyelekwa.

⁴Okwa uvathana nAatiro nAasidoni, ye mu etele omiti dhomisedeli odhindjidhindji.

⁵David okwa dhiladhila: “Otempeli ndjoka tayi ka tungwa komumwandje Salomo, oyi na okukala onene noyo opala ya simana muuyuni auhe. Ihe oye omunona noke na ontseyo, onkee nandi mu ningile omalongekidho.” Osho ngaaka David a gongele iitungitha oyindjiyindji, manga inaa sa.

⁶David okwi ithana omwana Salomo e te mu lombwele, a tungile Omuwa, Kalunga kaIsrael, otempeli.

⁷David okwa ti kuye: “Mentu gwandje, onda halele okutungila Omuwa, Kalunga kandje, otempeli, ndi mu simaneke.

⁸Ihe Omuwa okwa lombwele ndje kutya onda dhipaga aantu oyendji nonda hinga iita olwindji. Molwomatilohimbinzi ngaka agehe nda ningi ina pitika ndje, ndi mu tungile otempeli.

⁹Okwa uvanekele ndje a ti: ‘Oto ka kala u na omumwoyemati ngoka ta ka lela nombili, oshoka otandi ke mu vululukitha kaatondi ye ayehe. Edhina lye otali ithanwa Salomo, oshoka muuyuni we otandi ka pa Israel ombili negameno.

¹⁰Oye ta ka tungila ndje otempeli. Ye ota ningi omumwandje, nangame ote ningi he. Ezimo lye otali ka lela sigo aluhe.’ ”

¹¹David okwa tsikile a ti: “Mentu gwandje, Omuwa, Kalunga koye, na kale ano nangoye ye na dhiginine euvaneko lye, e ku lagopaleke moku mu tungila otempeli.

¹²Omuwa, Kalunga koye, ne ku pe omayele nuunongo, opo u pangele Israel pampango ye.

¹³Ngele oto vulika kiipango ayihe mbyoka Omuwa a pele Moses, e yi lombwele Israel, nena oto ka kala kuu na mbudhi. Kala wa tokola nou na einekelo ngoye ino etha, u haluthwe kusha.

¹⁴Omolwa etungo lyotempeli, onda kambadhala okugongela ootona 3400 dhoshingoli nootona 34 000 dhoshisiliveli, opo yi ka longithwe metungo lyotempeli. Onda gongele wo omiti dhomisedeli noondhopi dhomamanya, ihe nangoye oto ka gwedha po.

¹⁵Ou na aaniilonga oyendji. Oku na aahongi yomamanya, aatungi naanashihongelo, oku na wo aahambudhi oyendji yi ili noyi ili mboka haa hambula

¹⁶iingoli, iisiliveli, iikushu niiyela iiluudhe. Tameka ano iilonga. Omuwa na kale pamwe nangoye.”

¹⁷David okwa lombwele aawiliki ayehe yaIsrael, ya kwathe Salomo.

¹⁸Okwa ti: “Omuwa, Kalunga keni, okwa kala pamwe nane nokwe mu pe ombili koombinga adhihe. Okwa sinditha ndje aantu ayehe mboka ya li mevi ndika, noya ningi aapiya yeni noyOmuwa.

¹⁹Longeleni ano Omuwa, Kalunga keni, noomwenyo dheni adhihe nomitima dheni adhihe. Tamekeni okutunga otempeli, opo mu pungule mo oshikethahangano shOmuwa niikwaniipangitho ayihe iiyapuki mbyoka hayi longithwa melongelokalunga.”