Read Oshindonga-Ombiimbeli Ondjapuki 2008 Ezra 8 Bible Online

Ezra 8 - Oshindonga-Ombiimbeli Ondjapuki 2008 bible

Ezra 8

¹Nguka omusholondondo gwaakuluntu yomaludhi mboka ya kala muupika waBabilonia noye ya pamwe naEsra kuJerusalem, Artakserkses sho a li omupangeli:

²Gersom gwoludhi lwaPinehas Daniel gwoludhi lwaItamar Hattush yaShekania gwoludhi lwaDavid Sakaria gwoludhi lwaParosh, pamwe naalumentu 150 yoludhi lwe (okwa li embo lyondjokonona yuuhekulu wawo) Eliehoenai yaSerahia gwoludhi lwaPahat Moab, pamwe naalumentu 200 Shekania yaJahasiel gwoludhi lwaSattu, pamwe naalumentu 300 Ebed lyaJonatan gwoludhi lwaAdin, pamwe naalumentu 50 Jeshaja yaAtalia gwoludhi lwaElam, pamwe naalumentu 70 Sebadia yaMikael gwoludhi lwaShefatia, pamwe naalumentu 80 Obadia yaJehiel gwoludhi lwaJoab, pamwe naalumentu 218 Shelomit yaJosifia gwoludhi lwaBani, pamwe naalumentu 160 Sakaria yaBebai gwoludhi lwaBebai, pamwe naalumentu 28 Johanan yaHakkatan gwoludhi lwaAsgad, pamwe naalumentu 110 Elifelet, Jeuel naShemaia gwoludhi lwaAdonikam, pamwe naalumentu 60 (Oya galuka konima) Utai naSakkur gwoludhi lwaBigvai, pamwe naalumentu 70.

¹⁵Onda gongele ongundu ayihe pomukankameya gu uka lwokuAhava e tatu yungu ontanda nkoka omasiku gatatu. Mongundu onda mono mo aayambi, ihe kamwa li nando Aalevi.

¹⁶Ondi ithana aawiliki omugoyi: Elieser, Ariel, Shemaia, Elnatan, Jarib, Elnatan, Natan, Sakaria naMeshullam, naanongeki yaali, Joiarib naElnatan,

¹⁷nonde ya tumu kuIddo, mwene gwomukunda puKasifia, nokaakalele yomotempeli yaankoka oku ya pula, ye tu tumine aantu yokulonga motempeli.

¹⁸Kesilohenda lyaKalunga oye tu tumine Sherebia, omulumentu omunandunge, Omulevi gwoludhi lwaMahli, pamwe noyanamati naamwayina aalumentu omulongo nayahetatu.

¹⁹Oya tumu wo Hashabia naJeshaja gwoludhi lwaMerari, pamwe naanezimo lyawo omilongo mbali.

²⁰Oya tumu wo aakalele yomotempeli 220 mboka oohekulu ya pelwe oshilonga shika komukwaniilwa David nomalenga ge, ya yakule Aalevi. Oya li melandulathano lyomadhina.

²¹Pomukankameya gwaAhava ondi igidha eidhiliko lyiikulya, opo tu ifupipike koshipala shaKalunga ketu noku mu galikana, e tu wilike mondjenda yetu noku tu gamena tse naanona yetu nomaliko getu agehe.

²²Onda si ohoni okupula omupangeli etanga lyaakwiita naakayilinkambe, ye tu gamene kaatondi mondjila yetu, oshoka onde mu hokololele kutya Kalunga ketu ota yambeke shaa ngoka e mu inekela, ihe ota geele shaa ngoka te mu pilamene.

²³Onkee otwi idhilike e tatu galikana Kalunga, e tu gamene, oye nokwa uvu omagalikano getu.

²⁴Mokati kaayambi aawiliki onda hogolola mo Sherebia, Hashabia nayalwe omulongo.

²⁵Nena onda vihi oshisiliveli, oshingoli niikwaniipangitho mbyoka omupangeli, aagandjindunge ye nomalenga ge, nAaisraeli ye yi gandja, yi longithwe motempeli, nonde yi gandja kaayambi.

²⁶Onde ya pe ootona 22 dhoshisiliveli, iiyuma yoshisiliveli 100 yi na ondjundo yookilograma 70 yoshingoli,

²⁷ookilograma 3 400 iiyaha 20 yoshingoli niiyaha iiyelele yoshikushu 2 yi na ondilo yoshingoli.

²⁸Onde ya lombwele nda ti: “One aayapuki yOmuwa, Kalunga koohokulu, nosho wo iiyuma yoshisiliveli noyoshingoli ye mu etelwa omaganoyambo.

²⁹Yi tonateleni nawa, sigo tayi thiki kotempeli. Yi vihileni mongulu yaayambi, ne mu yi gandje kaawiliki yaayambi noyAalevi, nokaawiliki yAaisraeli muJerusalem.

³⁰Aayambi nAalevi oya taamba oshisiliveli, oshingoli niiyuma, noye yi faalele kotempeli kuJerusalem.”

³¹Olya li esiku etimulongo netiyali lyomwedhi gwotango sho twa zi pomukankameya Ahava, tu ye kuJerusalem. Kalunga ketu okwa li pamwe natse e te tu gamene komahomono gaatondi nokiilangela, manga tatu ende.

³²Sho twa thiki kuJerusalem, otwa vululukwa omasiku gatatu.

³³Mesiku etine otwa yi kotempeli, tatu vihi oshisiliveli, oshingoli niiyuma e tatu yi pe omuyambi Meremot yaUria. Okwa li pamwe naEleasar lyaPinehas nAalevi yaali, Josabad yaJeshua naNoadia yaBinnui.

³⁴Iinima ayihe oya yalulwa noya vihwa noya nyolwa nawa mondjalula pethimbo tuu ndyoka.

³⁵Ayehe mboka ya zi muupika, oye eta omayambo, ga fikilwe Kalunga kaIsrael. Oya yamba oongombe 12 molwaIsrael adhihe, oonzi oontsezi 96 noonzigona 77; oya yamba wo iikombo 12 yokudhima po oondjo dhawo yene. Iimuna mbika ayihe oya lungunithilwa po Omuwa omafikilondjambo.

³⁶Oya gandja wo ontumwafo yomupangeli kaanashikandjo nomalenga goshitopolwa shokuuninginino waEufrat, mboka ya kwatha oshigwana notempeli.