Read Oshindonga-Ombiimbeli Ondjapuki 2008 Exodus 12 Bible Online

Exodus 12 - Oshindonga-Ombiimbeli Ondjapuki 2008 bible

Exodus 12

¹Omuwa okwa lombwele Moses naAaron muEgipiti ta ti:

²“Omwedhi nguka nagu ninge omwedhi gwotango gwomumvo gweni.

³Lombweleni egongalo alihe lyaIsrael omakumagidho ngaka: Mesiku etimulongo lyomwedhi nguka omulumentu kehe na hogolole onzigona nenge oshikombo omolwaanegumbo.

⁴Egumbo lye ngele eshona okumana po oshimuna ashihe, oye pamwe namushiinda naa topole oshimuna pokati pawindji waanegumbo ya gwanena shaa ngoka a lye.

⁵Omu na okuhogolola onzi nenge oshikombo, ihe nashi kale oshilumentu shomumvo gumwe shaa na oshipwe.

⁶Ongulohi yesiku etimulongo netine lyomwedhi egongalo alihe lyaIsrael nali yi dhipage.

⁷Aantu naa kuthe ko ombinzi ye yi gwayeke kiikulo nopiipamba yomiyelo dhomagumbo ngoka tamu lilwa iimuna.

⁸Uusiku mboka onyama nayi yothwe, notayi liwa niigwanga iilulu pamwe niikwiila inaayi tulwa efulika.

⁹Onyama inamu yi lya ombihu nenge ya fumikwa, ihe yi lyeni ya yothwa ayihe, nomutse nomagulu nomandjandja.

¹⁰Inamu hupitha ko yimwe yi thike kongula; ngele otapa hupu sha, shi lungunitheni.

¹¹Yi lyii po mbala, ne mwa zalela olweendo, oongaku koompadhi noondhimbo dheni pomake. Shika osho oshituthi shaPaasa shokusimaneka ndje, ngame Omuwa.

¹²“Uusiku mboka otandi ka taakana evi lyaEgipiti, nokudhipaga aatango ayehe aalumentu, ayehe yaantu noyiimuna, note pangula iikalunga ayihe yaEgipiti. Ongame Omuwa.

¹³Ombinzi kiikulo yomiyelo otayi ka kala endhindhiliko okudhimbululitha omagumbo moka mu li mo. Shampa nda mono ombinzi, otandi mu pitilile po noitandi mu etele oshiponga, sho tandi geele Aayegipiti.

¹⁴Dhaneni esiku ndika li ninge oshituthi shelongelokalunga, li mu dhimbuluthe shoka ngame Omuwa nda ningi. Kaleni tamu li dhana nomaluvalo geni sigo aluhe.”

¹⁵Omuwa okwa ti: “Omasiku gaheyali inamu lya iikwiila ya tulwa efulika; lyeni owala iikwiila inaayi tulwa efulika. Mesiku lyotango kuthii mo efulika alihe maandjeni, oshoka ngele ope na ngoka ta li oshikwiila sha tulwa efulika momasiku ngoka gaheyali, ita talwa we gwomaantu yandje.

¹⁶Mesiku lyotango nomesiku etiheyali otamu gongala melongelokalunga. Omasiku ngoka inamu longa sha, ihe omu na ngaa okuteleka iikulya.

¹⁷Dhiginineni oshituthi shika, oshoka mesiku ndika onda tembudha omazimo geni muEgipiti. Omathimbo agehe tage ya, omu na okudhana oshituthi mesiku ndika.

¹⁸Okuza kongulohi yesiku etimulongo netine lyomwedhi gwotango sigo ongulohi yesiku etimilongombali nolyotango inamu lya oshikwiila sha tulwa efulika.

¹⁹Omasiku gaheyali efulika inali monika mo momagumbo geni, oshoka shaa ngoka, omuvalelwamo nenge omukwiilongo, ta li oshikwiila sha tulwa efulika, ita ka yalulilwa maantu yandje.”

²⁰

²¹Moses okwa hiya aawiliki ayehe yaIsrael e ta ti kuyo: “Shaa ngoka gwomune oku na okuhogolola onzigona nenge oshikombo noku shi dhipaga, opo omagumbo geni ga dhane Opaasa.

²²Kutheni oshisopi noku shi yaya mokayo moka mu na ombinzi yoshimuna, ne mu gwayeke ombinzi kiikulo nopiipamba yomiyelo dhomomagumbo geni. Inapa kala nando omuntu ta piti pondje, sigo taku shi.

²³Omuwa sho ta taakana Egipiti ta dhipaga Aayegipiti, ota mono ombinzi kiikulo nopiipamba yomiyelo noita pitika omuyengeli gweso a ye momagumbo geni e mu dhipage.

²⁴Ne naana yeni omu na okuvulika koshipango shika sigo aluhe.

²⁵Sho tamu ka ya mevi ndyoka Omuwa a uvaneke oku li mu pa, omu na okutsakanitha omusindilo nguka.

²⁶Aana yeni nge taye mu pula taa ti: ‘Iinima mbino otayi ti ngiini?’

²⁷Otamu yamukula tamu ti: ‘Oyo eyambo lyOpaasa lyokusimaneka Omuwa, molwashoka a pitilila omagumbo gAaisraeli muEgipiti. Okwa dhipaga Aayegipiti, ihe okwe tu hupitha.’ ” Aaisraeli oya tsu oongolo noya galikana.

²⁸Opo ihe oya yi noya ningi shoka Omuwa a lombwele Moses naAaron.

²⁹Pokati kuusiku Omuwa okwa dhipaga aatango ayehe muEgipiti okuza komuna gwomukwaniilwa, ngoka a li te mu landula melelo, sigo okomuna gwonkwatwa, ngoka e li mokakuma komeni lyevi; aatango ayehe yiimuna oya dhipagwa wo.

³⁰Uusiku mbwiyaka omukwaniilwa, omalenga ge nAayegipiti ayehe yalwe oya penduka noya lili. Omwa li oosa muEgipiti alihe, oshoka kamwa li nando egumbo moka inaamu sa omumati.

³¹Uusiku tuu mboka omukwaniilwa okwi ithana Moses naAaron e ta ti: “Indeni, one nAaisraeli yeni. Zii mo moshilongo shandje; indeni mu ka simaneke Omuwa, ngaashi mwi indile.

³²Indeni noonzi niikombo noongombe dheni. Galikanenii ndje wo, ndi yambekwe.”

³³Aayegipiti oya ulumike aantu ye endelele ya thige po oshilongo shawo. Oya ti: “Otatu ka sa po atuhe, ngele itamu yi.”

³⁴Aantu oyu udha uuyo wawo nondombo inaayi tulwa efulika e taye u mangele miikayiwa noye u humbata komapepe gawo.

³⁵Aaisraeli oya ningi, ngaashi ya lombwelwa kuMoses, e taa hehela Aayegipiti iinima yiingoli noyiisiliveli noonguwo.

³⁶Omuwa okwa tula mAayegipiti ondjaalela ya yaalele Aaisraeli e taye ya pe shoka ya pula. Pamukalo nguka Aaisraeli oya faalele uuyamba wAayegipiti.

³⁷Aaisraeli oya zi muRameses yu uka kuSukkot. Ayehe kumwe aalumentu omayuvi omathele gahamano, aakiintu naanona inaa yalulwa.

³⁸Aantu yalwe aayeni pamwe noonzi niikombo noongombe odhindji oya yi pamwe nayo.

³⁹Mondombo ndjoka ya zi nayo muEgipiti, oya yotha mo iikwiila inaayi lulikwa. Ondombo oya li inaayi lula, oshoka muEgipiti oya tidhwa mo neulumo, noya li yaa na olweedhe okwiilongekidhila onguta.

⁴⁰Aaisraeli oya kalele muEgipiti omimvo 430.

⁴¹Mesiku ndyoka omimvo 430 sho dha tsakana, omazimo agehe goshigwana shOmuwa oga tembuka muEgipiti.

⁴²Okwa li uusiku, Omuwa sho a tonatela nokwe ya tembudha mo muEgipiti; uusiku tuu mbuka Aaisraeli ayehe naa dhiginine ya kale ya tonata, opo ya simaneke Omuwa sigo okomaluvalo agehe.

⁴³Omuwa okwa lombwele Moses naAaron ta ti: “Omautho gOpaasa ogo ngaka: Kape na omukwiilongo ta li uulalelo waPaasa,

⁴⁴ihe omupika kehe ngoka we mu landa, ota vulu oku u lya, ngele we mu fukalekitha tango.

⁴⁵Kape na omweendanandjila nenge omulongi a hehelwa te u li.

⁴⁶Uulalelo auhe nau lilwe megumbo moka wa telekelwa; inau falwa pondje. Inamu nyanyula nando esipa limwe lyoshimuna.

⁴⁷Egongalo alihe lyaIsrael nali dhane oshituthi shika,

⁴⁸ihe inashi liwa kaafukolume nando. Ngele ope na omukwiilongo a kala mokati keni nokwa hala okudhana Opaasa, a simaneke Omuwa, nena fukalekitheni aalumentu ayehe yomaandjawo. Nena ota vulu okuyalulwa ngaashi omuvalwa Omuisraeli nota yi mongundu yoshituthi.

⁴⁹Omautho ngaka otaga kwatelele mo aavalwa Aaisraeli naakwiilongo mboka ya kala mokati keni.”

⁵⁰Aaisraeli ayehe oya vulika noya ningi, ngaashika Omuwa a lombwele Moses naAaron.

⁵¹Esiku ndyoka Omuwa okwa tembudha mo Aaisraeli muEgipiti.