Read Oshindonga-Ombiimbeli Ondjapuki 2008 Exodus 17 Bible Online

Exodus 17 - Oshindonga-Ombiimbeli Ondjapuki 2008 bible

Exodus 17

¹Egongalo alihe lyaIsrael olya zi mo mombuga Sin, lya zi mehala limwe e tali yi kekwawo palombwelo lyOmuwa. Oya yungu ontanda muRefidim, ihe kamwa li omeya gokunwa.

²Oya ngungutulile Moses noya ti: “Tu pa omeya tu nwe.” Moses okwa yamukula a ti: “Omolwashike tamu ngungutula? Omolwashike tamu hindi Omuwa?”

³Ihe aantu oya li ya sa enota e taa tsikile okungungutulila Moses. Oya ti: “Omolwashike we tu tembudha mo muEgipiti? Ou tu dhipage po tse naana yetu niimuna yetu, tu se po kenota?”

⁴Moses okwa galikana Omuwa e ta ti: “Aantu mbano otandi ya ningi ngiini? Oya hala nokuli ya dhipage ndje nomamanya.”

⁵Omuwa okwa lombwele Moses a ti: “Kutha aawiliki yamwe yAaisraeli e to yi pamwe nayo komeho goshigwana. Faalela ondhimbo yoye ndjoka wa dhengele nayo Niili.

⁶Otandi ka thikama komeho goye pemanya pondundu Sinai. Dhenga emanya, nomeya otaga ka za mo, ga nuwe kaantu.” Moses nokwe shi ningi montaneho yaawiliki yaIsrael.

⁷Ehala ndyoka olya lukwa Massa naMeriba molwashoka Aaisraeli oya tamanana noya hindi Omuwa, sho ya pula ya ti: “Omuwa omo tuu e li mokati ketu nenge aawe?”

⁸Aayamaleki oye ya noya ponokele Aaisraeli muRefidim.

⁹Moses okwa lombwele Josua a ti: “Ihogololela aalumentu yamwe, u ye u ka kondjithe Aayamaleki ongula. Otandi ka thikama kondungu yondundu nda yelutha ondhimbo ndjoka Kalunga a lombwele ndje ndi yi humbate.”

¹⁰Josua okwa ningi, ngaashi Moses e mu lombwele, e ta zi mo a ka kondjithe Aayamaleki, manga Moses, Aaron naHur ya londo kondungu yondundu.

¹¹Moses shampa a yelutha omaako ge, Aaisraeli oya sindi, ihe shampa e endjeleleke omaako ge, nena Aayamaleki oya tameke okusindana.

¹²Omaako gaMoses sho ga vulwa, Aaron naHur oya kutha emanya e taye mu kuutumbike ko, manga yo ya thikama kombinga nombinga ya yelutha omaako ge, ye ga yelutha sigo etango tali ningine.

¹³Pamukalo nguka Josua okwa dhenge Aayamaleki e te ya sindi thilu.

¹⁴Nena Omuwa okwa lombwele Moses e ta ti: “Nyola shika membo, shi ninge edhimbulutho. Lombwela Josua kutya Aayamaleki otandi ke ya hanagula po thiluthilu.”

¹⁵Moses okwa tungu oshiyambelo e te shi luku “Omuwa oye epandela lyandje.”

¹⁶Okwa tsikile a ti: “Yelutheni epandela lyOmuwa pombanda. Omuwa oku na olugodhi nAayamaleki okuza koluvalo sigo okoluvalo.”