Read Oshindonga-Ombiimbeli Ondjapuki 2008 Exodus 18 Bible Online

Exodus 18 - Oshindonga-Ombiimbeli Ondjapuki 2008 bible

Exodus 18

¹Hemweno yaMoses, Jetro omuyambi gwaMidian, okwa kundana ashihe shoka Kalunga a ningile Moses noshigwana shaIsrael, sho e shi tembudha muEgipiti.

²Okwe ya kuMoses, e etelele omukulukadhi gwaMoses Sippora, ngoka Moses e mu shunine kaandjawo.

³Sippora okwe ya noyana aamati yaali, Gersom naElieser. Moses okwa tile: “Onda ningi omukwiilongo mevi lyuundjendi,” nokwa luku omwana gumwe Gersom.

⁴Okwa tile ishewe: “Kalunga katate okwa kwatha ndje e ta hupitha ndje mokudhipagwa komukwaniilwa gwaEgipiti;” nosho a luku omumati omukwawo Elieser.

⁵Jetro okwe etelele omukulukadhi gwaMoses noyana aamati yaali mombuga, moka Moses a li a yunga ontanda pondundu yaKalunga.

⁶Okwa tumu elaka kuMoses kutya oye li mondjila taye ya.

⁷Moses okwa piti mo a yi e ke mu tsakaneke. Okwe mu inyongamene e te mu thipi komilungu. Oyu uhalekathana nokupulathana, nkene ye li po e taa yi ketsali lyaMoses.

⁸Moses okwa hokololele Jetro ayihe mbyoka Omuwa e yi ningile omukwaniilwa gwaEgipiti naantu ye, opo a mangulule Aaisraeli. Okwe mu hokololele wo omaudhigu ngoka ya piti mugo mondjila nonkene Omuwa e ya hupitha.

⁹Jetro sho u uvu ayihe mbika, okwa nyanyukwa

¹⁰nokwa ti: “Omuwa na hambelelwe, ngoka e mu hupitha komukwaniilwa gwaEgipiti naantu ye! Omuwa na hambelelwe, ngoka a hupitha aantu ye muupika!

¹¹Ngashingeyi onda tseya kutya Omuwa oye omunene e vule ookalunga ayehe, oshoka a longo shika, Aayegipiti sho ya hepeke Aaisraeli noku ya dhina.”

¹²Nena Jetro, hemweno yaMoses, okwe eta omafikilondjambo noontselelandjambo okuyambelwa Kalunga; naAaron naawiliki yaIsrael ayehe oya ka lya pamwe naye iikulya iiyapuki koshipala shaKalunga.

¹³Esiku lyanofu Moses hela a kuutumbile tu utha iihokolola mokati kaantu, nokwa li e na uupyakadhi okuza ongula sigo ongulohi.

¹⁴Hemweno Jetro sho a mono ayihe mbyoka Moses ta ningi, okwa pula a ti: “Aantu oto ya ningile ano ngiini? Omolwashike ongoye awike to longo, naantu ya thikama ngaa mpano ongula sigo uusiku taa pula omayele kungoye?”

¹⁵Moses okwa yamukula a ti: “Ondi na oku shi ninga, oshoka aantu otaye ya kungame yi ilonge ehalo lyaKalunga.

¹⁶Uuna yaali ye na oontamanana, otaa ya kungame, nangame otandi tokola ngoka gwomuyo kee na uusama e tandi ya hokololele omautho niipango yaKalunga.”

¹⁷Nena hemweno yaMoses okwa ti: “Omukalo nguka wa lamba kagu shi omwaanawa.

¹⁸Oto ivulitha ngoye mwene naantu mbaka. Iilonga mbika iidhigu, ku yi vulu ongoye awike.

¹⁹Ngashingeyi otandi ku pe omayele omawanawa, Kalunga nota kala pamwe nangoye. Kalela po aantu koshipala shaKalunga nokufala oontamanana dhawo kuye.

²⁰Ya nongeka iipango noku ya fatululila, nkene ye na okukala naashoka ye na okulonga.

²¹Ndele hogolola mo moshigwana ashihe aalumentu yamwe ya yeleka, u ya langeke aawiliki yasho okutonatela oongundu dhomayuvi, dhomathele, dhomilongo ntano nodhomulongo. Naa kale aantu haa tila Kalunga, aainekelwa yo itaa pukithwa koombumbo.

²²Naa kale ethimbo alihe taa tokola oohapu. Iinima iidhigu ayihe naye yi ete kungoye, ndele yo otaa vulu okutokola oontamanana oonshona. Shika otashi ke ku pupalela, ngele taa topolelwa omutenge gwoye.

²³Ngele oto ningi ngeyi, ngaashi Kalunga ta ti, ito ivulitha nayi, naantu mbaka ayehe otaa vulu okuya kaandjawo ye na ombili.”

²⁴Moses okwa pulakene omayele gahemweno Jetro,

²⁵e ta hogolola aalumentu ya yeleka mokati kAaisraeli ayehe. Okwe ya langeke aawiliki yoongundu dhomayuvi, dhomathele, dhomilongo ntano nodhomulongo.

²⁶Oya tokola iinima ethimbo alihe. Iinima iidhigu oye yi fala kuMoses, ihe oontamanana oonshona oye dhi tokola yo yene.

²⁷Nena Moses okwa laleke hemweno Jetro, oye nokwa yi kaandjawo.