Read Oshindonga-Ombiimbeli Ondjapuki 2008 Exodus 22 Bible Online

Exodus 22 - Oshindonga-Ombiimbeli Ondjapuki 2008 bible

Exodus 22

¹“Ngele oku na omuntu ta yaka ongombe nenge onzi e te yi dhipaga nenge te yi landitha po, na fute oongombe ntano mongombe yimwe, noonzi ne monzi yimwe.

²Na fute shoka a yaka. Ngele ke na sha, na landithwe po a ninge omupika, opo a fute shoka a yaka. Ngele oshimuna sha yakwa — ongombe nenge okasino nenge onzi — tashi monika miimuna ye, ota futu iyali molwoshimuna shimwe. “Omufuthi ngele ota fulu egumbo uusiku e ta kwatwa nota dhipagwa, nena ngoka e mu dhipaga ke na ondjo yedhipago. Ihe ngele otashi ningwa omutenya, nena oku na ondjo yedhipago.

⁵“Ngele oku na omuntu te etha iimuna ye yi ye mepya nenge moshitsambe shomiviinu e tayi lyatagula mo nokulya po iimeno ya mena mepya lyamukwawo, na kuthe miilikolwa yomepya nenge moshitsambe she shomiviinu e yi fute.

⁶“Ngele ope na omuntu ta hwameke omulilo mepya lye e tagu taandele sigo okepya lyaantu e tagu fike po iilya mbyoka tayi koko nenge mbyoka ya teywa noya ndumbilwa, omutomeki gwomulilo na fute oshiponga shoka.

⁷“Ngele ope na omuntu ta zimine okupungula iimaliwa nenge iinima yilwe yamukwawo e tayi yakwa mo megumbo lye, omufuthi ngele okwa monika, na fute ayihe oohiyali.

⁸Ihe omufuthi ngele ina monika, omuntu ngoka a li a pungula iinima, ne etwe kehala lyelongelokalunga, noko nkoka ta gana kutya ye ina yaka iinima yaantu.

⁹“Moontamanana adhihe dhomaliko, mwa kwatelelwa oongombe, uusino, oonzi, omizalo nenge ekanitho lyasha shilwe, aantu mboka taa tamananene eliko, naa falwe kehala lyelongelokalunga. Ngoka ta hololwa kuKalunga kutya oye omunandjo, na fute mukwawo lwaali.

¹⁰“Ngele ope na omuntu ta zimine a kale nokasino kamukwawo nenge ongombe nenge onzi nenge oshimuna shilwe, noshimuna tashi si nenge tashi mono oshiponga nenge tashi yiwa nasho mokuluwa, nongele kaku na oonzapo,

¹¹omuntu ngoka na ye kehala lyelongelokalunga e ta gana kutya ye ina yaka oshimuna shomuntu. Oshimuna ngele inashi yakwa, mwene gwasho ita futwa sha, nomudhiginini ita pumbwa okufuta sha;

¹²ihe oshimuna ngele osha yakwa po, omudhiginini na fute mwene gwasho.

¹³Ngele osha lika po kiilikama, omudhiginini ne ete iipongo yi ninge onzapo; ita pumbwa okufuta shoka sha lika po kiilikama.

¹⁴“Ngele ope na omuntu ta hehela mukwawo oshimuna notashi adhika koshiponga nenge tashi si mwene manga kee po, oku na oku shi futa.

¹⁵Ihe ngele osha ningwa mwene opo e li, nena ita futu. Ngele oshimuna osha hehelwa, ekanithopo olya siikilwa kiimaliwa yehehelo.”

¹⁶“Ngele ope na omuntu ta pukitha omukadhonalela inaa yalekwa e ta lala naye, oku na okufuta iikulila yuukadhona we ye e te mu hokana po.

¹⁷Ihe ngele he ota tindi e mu hokane po, nena na fute he iimaliwa yi thike piikulila yaafuko.

¹⁸“Ino etha omukiintu ompulile a kale e na omwenyo.

¹⁹“Omulumentu kehe ta lala noshimuna, na se.

²⁰“Shaa ngoka ta yambele kalunga kalwe kee shi ngame, Omuwa, na pangulilwe eso.

²¹“Ino ehameka omukwiilongo nenge u mu thindile kongundhi; dhimbulukwa kutya ne omwa li aakwiilongo muEgipiti.

²²Inamu ehameka omuselekadhi kehe nenge othigwa.

²³Ngele tamu shi ningi, ngame, Omuwa, otandi ya uvu, sho taa kugile ndje ekwatho,

²⁴notandi ka geya notandi mu dhipagele miita. Aakulukadhi yeni otaa ka ninga aaselekadhi naana yeni oothigwa.

²⁵“Ngele ope na gumwe gwomaantu yandje ohepele te ku lile oongunga dhiimaliwa, ino mu thiminika wa fa omugandjingunga omulandithi, ngoye ino tegelela ontanitho kuye.

²⁶Ngele ope na ngoka to mu kutha elwaakani lye ombambyona, opo e ku fute, ou na oku li mu shunithila, etango manga inaali ningina,

²⁷Oshoka olyo alike eisiikilo lye lyoku mu shiga kuutalala. Ota vulu okukotha ngiini kee li na? Ngele ta kugile ndje ekwatho, otandi ke mu uva, oshoka ngame omunamutimahenda.

²⁸“Ino tuka Kalunga, ngoye ino sheka omuleli gwoshilongo shaandjeni.

²⁹“Ino dhikaleka omayambo taga zi miilya yoye nomomaviinu goye. “Pe ndje osheeli shomaana yoye aamati.

³⁰Pe ndje iisheeli yiimuna yoye yoongombe noyoonzi. Iisheeli nayi kale pooyina omasiku gaheyali, nomesiku etiheyali otayi yambelwa ndje.

³¹“One aantu yandje aayapuki. Inamu lya onyama ya lika kiilikama mokuti; yi umbileni oombwa.”