Read Oshindonga-Ombiimbeli Ondjapuki 2008 Exodus 23 Bible Online

Exodus 23 - Oshindonga-Ombiimbeli Ondjapuki 2008 bible

Exodus 23

¹“Ino taandelitha oluhoko, ngoye ino kwatha omunandjo mokugandja uumbangi wiifundja.

²Ino landula ongundu muuwinayi nenge u gandje pamwe nongundu uumbangi mboka tau goyokitha uuyuuki.

³Ino tondola ohepele, nge tayi tamanekwa.

⁴“Ngele owi itsu ongombe nenge okasino komutondi gwoye ka kanena mokuti, ka shunithila kumwene.

⁵Ngele okasino ke oka gundikwa komutenge gwako, mu kwatha mu kutulule okasino.

⁶“Ino pataneka uuyuuki wohepele, uuna ta pangulwa.

⁷Ino gandja uusama wiifundja, ngoye ino dhipagitha omuntu kee na ondjo, oshoka otandi pangula ayehe mboka ya tya ngaaka.

⁸Ino taamba ombumbo, oshoka ombumbo otayi posipaleke aantu okulonga uuyuuki notayi goyokitha omukanka gwaakaanandjo.

⁹“Ino ehameka omukwiilongo; ou shi shi nkene omukwiilongo e li, oshoka omwa li aakwiilongo muEgipiti.”

¹⁰“Kuna epya lyoye omimvo hamano nou pungule shoka to likola mo.

¹¹Ihe momumvo omutiheyali li etha li vululukwe, ino teya shoka shi imenitha mo. Oohepele oyo naa lye shoka sha mena mo, naashoka ya thigi mo, nashi liwe kiiyamakuti. Osho wo to ningi oshitsambe shoye shomiviinu noshomiolivi.

¹²“Longa omasiku gahamano, ihe ino longa mesiku etiheyali, opo aapika yoye naakwiilongo mboka haye ku longele, nokuli niimuna yoye otayi vulu okuvululukwa.

¹³“Dhiginina adhihe ndhoka ngame, Omuwa, nde ku lombwela. Ino galikana ookalunga yalwe; ino tumbula nokuli omadhina gawo.”

¹⁴“Dhaneni iituthi itatu momumvo, mu simaneke ndje.

¹⁵Momwedhi Abib, omwedhi ngoka mwa tembuka muEgipiti, dhaneni Oshituthi shiikwiila inaayi tulwa efulika pamukalo ngoka nde mu lombwele. Inamu lya oshikwiila sha tulwa efulika momasiku gaheyali goshituthi. Koshipala shandje inamu holoka mu li iikaha yowala.

¹⁶Dhaneni Oshituthi shoshipe, uuna tamu tameke okuteya iilya yeni. “Dhaneni Oshituthi shokulikola, sho tamu likola iiyimati miitsambe yeni pehulilo lyomumvo.

¹⁷Omumvo kehe miituthi mbika itatu aalumentu yeni ayehe oye na okuya, ya simaneke ndje, ngame, Omuwa, Kalunga keni.

¹⁸“Ino yamba iikwiila ya tulwa efulika pamwe nombinzi yiimuna. Oofu dhiimuna nadhi yambelwe ndje momasiku giituthi, dhaa hupe ko sigo ongula tayi landula.

¹⁹“Omumvo kehe eta kongulu yOmuwa, Kalunga koye, oshipe shomepya lyoye. “Onyama yokanzona nenge yokakombwena ino yi teleka momahini gayina.”

²⁰“Otandi ku tumine omuyengeli, e ku gamene mondjila noku ku kwatela komeho, sho to ende to yi kehala hoka nde ku longekidhile.

²¹Mu pulakena ngoye u vulike kuye. Ino mu tsila ondumbo, oshoka ongame nde mu tumu, noye ita ka vula okwiidhidhimikila oondumbo.

²²Ihe ngele oto vulika kuye, e to ningi shoka tandi ku lombwele, nena ngame otandi ka kala omutondi gwaatondi yoye nomuthiminiki gwaathiminiki yoye.

²³Omuyengeli gwandje ote ku tetekelele okuya mevi lyAayamori, Aaheti, Aaperesi, Aakaanana, Aahevi nAayebusi, ongame notandi ke ya hanagula po.

²⁴Ino inyongamena kookalunga yawo nenge u ya galikane, noino taamba eitaalo lyawo u li holele. Hanagula po ookalunga yawo ngoye u kumune po oongundhimanya dhawo.

²⁵Ngele oto longele ndje, ngame Omuwa Kalunga koye, otandi ku yambekele iikulya nomeya e tandi kutha po uuvu auhe.

²⁶Moshilongo shoye itamu kala omukiintu ta gwitha ela nenge omuntimbe. Otandi ku kaleke nomwenyo omule kombanda yevi.

²⁷“Otandi ka tula uumbanda maakondjithi yoye. Otandi ka piyaganeka iigwana ayihe mpoka to yi e tandi tidha po aatondi yoye ayehe komeho goye.

²⁸Otandi ka tuma omambonzi komeho goye, opo ga tidhe po Aahevi, Aakaanana nAaheti mondjila yoye.

²⁹Itandi ya tidha po momumvo gumwe; ngele tandi shi ningi, evi otali mbugala, niithitukuti otayi ku gwililile po.

³⁰Ano otandi ke ya tidha po kashona nakashona, sigo wa tana u lale oshilongo.

³¹Oongamba dhevi lyoye otandi ke dhi taandeleka okuza kEkololo lyaAkaba sigo okomulonga Eufrat nokuza kEfuta lyopokati sigo okombuga. Otandi ke ku pa oonkondo u sinde aakalimo yevi ndyoka, noto ke ya tidha mo, opo u kale mo.

³²Ino hangana nando okuli nayo nenge nookalunga yawo.

³³Aantu mboka ino etha ya kale moshilongo shoye; ngele to shi ningi, otaye ke ku yonitha kungame. Ngele to longele ookalunga yawo, otashi ka ninga omwigo gwoye.”