Read Oshindonga-Ombiimbeli Ondjapuki 2008 Exodus 25 Bible Online

Exodus 25 - Oshindonga-Ombiimbeli Ondjapuki 2008 bible

Exodus 25

¹Omuwa okwa lombwele Moses a ti:

²“Lombwela Aaisraeli ya yambele ndje omayambo. Shaa ngoka na gandje, ngaashi omwenyo gwe tagu mu lombwele.

³Omayambo taga etwa, ogo oshingoli, oshisiliveli, oshikushu,

⁴oongodhi oombulau, oombwilili noontiliganembwilili, iiyata yoliina ombwanawa nomafufu giikombo;

⁵iipa yoonzi oondumentu ya tetwa iitiligane, iipa yoongombefuta, iipilangi yomuthiya,

⁶omagadhi gomoolamba, iizimba yokugwaya noyokufikitha iitsinino;

⁷omamanya gaoniks nuuwe wokutula momapepenguwo gomuyambimukuluntu nomoshipapa shomontulo.

⁸Aantu naa tungile ndje etsali eyapuki, opo ndi kale mokati kawo.

⁹Nali tungwe niikwaniipangitho yalyo pandunge tandi yi ku ulukile.

¹⁰“Pangeleni oshiketha shiipilangi yomuthiya, uule washo oondya mbali netata, omutamo gwasho olundya lumwe netata nomuthika gwasho olundya lumwe netata.

¹¹Shi kolonga noshingolilela meni nokombanda ngoye u shi tule oongenge dhoshingoli dha kunkula nasho.

¹²Shi ningila oonkogo ne dhoshingoli komakuvu gasho, kombinga kehe oonkogo mbali.

¹³Honga omitenge dhomuthiya e to dhi kolongitha oshingoli.

¹⁴Dhi hwekela moonkogo kombinga kehe yoshiketha.

¹⁵Omitenge odhi na okukala moonkogo, inadhi kuthwa mo.

¹⁶Moshiketha pungula mo iipelende iyali yomamanya mbyoka tandi ku pe, moka mwa nyolelwa iipango.

¹⁷“Ninga oshisiikilo shoshingoli sho shene, uule washo oondya mbali netata nomutamo gwasho olundya lumwe netata.

¹⁸Longekidha aakerubi yaali moshingoli sha hambulwa,

¹⁹gumwe komutse nguka namukwawo komutse ngwiyaka gwoshisiikilo. Naa kale ya kwatathana noshisiikilo.

²⁰Aakerubi naa kale ya taalelathana poshisiikilo nomawawa gawo ge shi siikila.

²¹Moshiketha pungula mo iipelende iyali yomamanya e to tenteke ko oshisiikilo.

²²Oko tuu nkoka tandi ku tsakaneke, poshisiikilo pokati kaakerubi tandi ku pe oompango dhandje adhihe, u dhi lombwele Aaisraeli.”

²³“Pangela oshitaafula shiipilangi yomuthiya, uule oondya mbali, omutamo olundya lumwe nomuthika olundya lumwe netata.

²⁴Shi kolongitha oshingoli sho shene e to shi tula oongenge dhoshingoli dha kunkula nasho.

²⁵Shi ningila eketsu li thike peke lya kunkula nasho, noongenge dhoshingoli dha kunkula neketsu.

²⁶Shi hambulila oonkogo ne dhoshingoli u dhi tule komakuvu gane pomagulu.

²⁷Oonkogo odhokuhwekela omitenge dhokuhumbata oshitaafula tadhi tulwa popepi neketsu.

²⁸Honga omitenge moshiti shomuthiya e to dhi kolongitha oshingoli.

²⁹Shi hambulila iiyaha, iitsininitho, iitenga nuuyo wokutula iinuwandjambo. Ayihe mbika otayi ningwa moshingoli sho shene.

³⁰Oshitaafula nashi tulwe komeho goshikethahangano, nokoshitaafula naku kale aluhe iikwiila iiyapuki.”

³¹“Hambula oshihukikwanyeka shoshingoli sho shene. Ninga ompadhi yasho niimpana yasho moshingoli sha hambulwa; uulenga wiiyimino, woonkuto nowoongala dha sheneka nau kale wa hambulilwa mumwe niimpana.

³²Moombati dhasho namu kale mwa tsapuka iimpana ihamano, itatu kombinga ndjika niitatu kombinga onkwawo.

³³Oshimpaga kehe shomwiihamano nashi kale shi na uulenga utatu wa fa iiyimino, oonkuto noongala dha sheneka dhomumandeli.

³⁴Molutu lwoshihukikwanyeka namu kale uulenga wa fa iiyimino, oonkuto noongala dha sheneka dhomumandeli.

³⁵Onkuto yimwe nayi kale kohi yepando kehe lyiimpana ya tsapuka molutu.

³⁶Oonkuto niimpana nayi kale ya kwatathana noshihukikwanyeka noya hambulwa moshingoli sha yela.

³⁷Longekidhila oshihukikwanyeka oolamba heyali tadhi minikile lwokomeho.

³⁸Iikonde yokutetitha omalapi goolamba niikangwa yokutula mo omutoko gwokomalapi nayi kale oshingoli sho shene.

³⁹Iilongitho ayihe mbika yi ninga moshitalendi shimwe shoshingoli sho shene.

⁴⁰Ndhindhilika tuu nawa, u yi ninge pashiholelwa nde shi ku ulukile kondundu.”