Read Oshindonga-Ombiimbeli Ondjapuki 2008 Exodus 26 Bible Online

Exodus 26 - Oshindonga-Ombiimbeli Ondjapuki 2008 bible

Exodus 26

¹“Tunga etsali lyotenda momalapi omulongo goliina ombwanawa ga tungilwa oongodhi oombulau, oombwilili noontiliganembwilili. Tungila mo omafano gaakerubi paunkulungu.

²Elapi kehe nali kale oondja omilongo mbali nahetatu muule noondja ne momutamo.

³Hondjela kumwe oondja ntano, dhi ninge oshitopolwa shimwe, osho wo oondja ntano okuninga oshitopolwa oshitiyali.

⁴Kolungenge lwelapi lyotango moshitopolwa kehe ninga ko omalulo gongodhi ombulau omilongo ntano. Miitopolwa mbika iyali omalulo naga kale ga tegama.

⁵Monguwo yimwe na mu tulwe oombululu omilongo ntano nokoongenge dhonguwo onkwawo ya shiga kooha oonkwawo, na mu kale mu na oombululu omilongo ntano opo dhi tsaathane.

⁶Ninga uuhake woshingoli omilongo ntano, u kogeke iitopolwa mbika iyali kumwe.

⁷“Longa po esiikilo lyotenda lyomalapi omulongo nalimwe lya tungwa momafufu giikombo.

⁸Ga ninga ge thike pamwe guule woondja omilongo ndatu nomutamo gwoondja ne.

⁹Hondjela oondja ntano kumwe, osho wo oonkwawo hamano kumwe. Elapi etihamano li gonyena kumwe kombanda komeho gotenda.

¹⁰Tula omalulo omilongo ntano kolungenge lwelapi lyahugunina moshitopolwa shimwe, nomalulo omakwawo omilongo ntano kolungenge lwelapi lyahugunina moshitopolwa oshikwawo.

¹¹Hambula uuhake woshikushu omilongo ntano e to u tula momalulo, u kogeke kumwe iitopolwa, yi ninge esiikilo limwe.

¹²Etata lyuule womalapi, mboka wa pitilila, nali endjelele konima yetsali.

¹³Uule wolundya lumwe lwelapi kehe nau endjelele koombinga dhotenda noku yi siikila.

¹⁴“Tunga natango omasiikilo gaali gokusiikila otenda, limwe olyiipa yoonzi oondumentu iitiligane nalimwe olyiipa yoongombefuta.

¹⁵“Honga momuthiya iipilangi yokuthikameka etsalihangano lyOmuwa.

¹⁶Oshipilangi kehe nashi kale shuule woometa ne nomutamo gwoosentimeta omilongo hamano nahamano.

¹⁷Oshipilangi kehe nashi kale shi na iikwatakanithi iyali tayi shi kwatakanitha kumwe noshikwawo. Iipilangi ayihe oyi na okukala yi na iikwatakanithi mbika.

¹⁸Honga iipilangi omilongo mbali omolwombinga yokuumbugantu wotenda,

¹⁹noku yi tholomena oompadhi omilongo ne dhoshisiliveli, mu hwekelwe iikwatakanithi yiipilangi yoku yi thikamitha.

²⁰Honga iipilangi omilongo mbali omolwombinga yokuumbangalantu wotenda,

²¹noompadhi dhoshisiliveli omilongo ne, mbali kohi yoshipilangi kehe.

²²Konima yotenda kuuninginino hongela ko iipilangi ihamano

²³niipilangi iyali yokomakuvu.

²⁴Iipilangi mbika yokomakuvu otayi kwatathana pekota e tayi kwatele kumwe ayihe sigo opombanda. Iipilangi iyali mbyoka tayi ningi omakuvu, otayi longwa pamukalo nguka.

²⁵Otaku kala iipilangi ihetatu yi na oompadhi dhayo dhoshisiliveli omulongo nahamano, koshipilangi shimwe oku na mbali.

²⁶“Honga omalukambo omulongo nagatano gomuthiya, gatano omolwiipilangi kombinga yimwe yetsali,

²⁷gatano ogokombinga onkwawo nagatano ogokuuninginino konima.

²⁸Olukambo lwopokati nalu kale pokati kiipilangi lwa shigakana lwa tsa koombinga adhihe.

²⁹Iipilangi yi kolonga noshingoli e to tula ko oonkogo dhoshingoli dhokukwatela kumwe omalukambo, ngoka nago wo oge na okukolongwa noshingoli.

³⁰Tunga etsali pashiholelwa nde shi ku ulukile kondundu.

³¹“Tula po etopolitho lyoshiyata sholiina ombwanawa sha tungilwa oongodhi oombulau, oombwilili noontiliganembwilili. Nali tungilwe omafano gaakerubi paunkulungu.

³²Li endjelelitha koongundhi ne dhomuthiya dha kolongwa noshingoli, ku na uuhake, dha thikama koompadhi dhoshisiliveli.

³³Etopolitho li tula kohi yomukweyo guuhake moombuli dhetsali, ngoye u pungule handiyaka yetopolitho oshikethahangano shi na iipelende iyali yompango. Etopolitho otali yoolola Ehala lyUuyapuki kEhala lyUuyapukielela.

³⁴Tula oshisiikilo koshikethahangano.

³⁵Pondje yEhala lyUuyapukielela tula po oshitaafula sha gama kuumbangalantu wetsali noshihukikwanyeka lwokuumbugantu.

³⁶“Posheelo shetsali tula po eshigolapi lyoliina ombwanawa lya tungilwa oongodhi oombulau, oombwilili noontiliganembwilili.

³⁷Eshigolapi ndika li hongela oongundhi ntano dhomuthiya dha kolongwa noshingoli nokwa tulwa uuhake woshingoli; dhi tholomena oompadhi dhoshikushu ntano.”