Read Oshindonga-Ombiimbeli Ondjapuki 2008 Exodus 27 Bible Online

Exodus 27 - Oshindonga-Ombiimbeli Ondjapuki 2008 bible

Exodus 27

¹“Ninga oshiyambelo shiipilangi yomuthiya. Nashi kale shi na uule woondya ntano, omutamo gwoondya ntano nomuthika gwoondya ndatu.

²Komakuvu gasho gane ninga ko ooniga dha kwatathana noshiyambelo. Ayihe nayi kolongithwe oshikushu.

³Hambula iikangwa yokuyuka omutoko nou hambule wo iihupulo, iiyaha, iizigitho niikangwa yomakala. Iilongitho mbika ayihe nayi hambulwe moshikushu.

⁴Hambula oshihaya shoshikushu e to tula ko oonkogo ne dhoshikushu komakuvu gasho gane.

⁵Tula oshihaya kohi yoongenge dhoshiyambelo, opo oshihaya shi endjelele sigo olwopokati koshiyambelo.

⁶Honga omitenge dhomuthiya e to dhi kolonga noshikushu.

⁷Dhi hukula moonkogo kombinga nombinga yoshiyambelo, sho tashi humbatwa.

⁸Ninga oshiyambelo shiipilangi shi na omututu. Shi ninga pashiholelwa nde shi ku ulukile kondundu.”

⁹“Etsalihangano lyandje li dhikila wo ehale lyomalapi goliina ombwanawa. Kombinga yokuumbugantu omalapi naga kale guule woondya ethele,

¹⁰ge li koongundhi omilongo mbali noompadhi dhadho dhoshikushu omilongo mbali; uuhake nomalukambo goongundhi naga kale goshisiliveli.

¹¹Shika osho wo tashi ningwa kombinga yokuumbangalantu wehale.

¹²Kombinga yokuuninginino naku kale omalapi guule woondya omilongo ntano, oongundhi omulongo noompadhi omulongo.

¹³Kombinga yokuuzilo, nkoka ku na osheelo, ehale nali kale oondya omilongo ntano.

¹⁴Kombinga kehe yosheelo naku kale omalapi goondya omulongo nantano, oongundhi ndatu noompadhi ndatu.

¹⁶Nopomweelo gwehale napu kale eshigolapi lyuule woondya omilongo mbali, lyoshiyata sholiina ombwanawa sha tungilwa paunkulungu oongodhi oombulau, oombwilili noontiliganembwilili. Olya thikama koongundhi ne noompadhi dhadho ne.

¹⁷Omalukambo nuuhake woongundhi adhihe nau kale woshisiliveli, ihe oompadhi dhadho odhoshikushu.

¹⁸Ehale nali kale lyuule woondya ethele nomutamo gwoondya omilongo ntano. Elapi lya kunkula nalyo nali kale lyomutumbo gwoondya ntano, lya tungwa moongodhi oombwanawa dholiina.

¹⁹Oompadhi nadhi kale dhoshikushu noomboha adhihe dhetsali nadhi ningwe moshikushu.”

²⁰Lombwela Aaisraeli ye etele oolamba dhoshihukikwanyeka omagadhi omawanawa gooholivi, opo dhi wape okutema ongulohi kehe.

²¹Aaron noyana naa hwameke oshihukikwanyeka metsalihangano, pondje yetopolitho, ndyoka li li komeho goshikethahangano, opo shi minikile montaneho yandje okuza ongulohi sigo taku shi. Oshipango shika nashi dhigininwe kAaisraeli nomaluvalo gawo sigo aluhe.