Read Oshindonga-Ombiimbeli Ondjapuki 2008 Exodus 31 Bible Online

Exodus 31 - Oshindonga-Ombiimbeli Ondjapuki 2008 bible

Exodus 31

¹Omuwa okwa lombwele Moses a ti:

²“Onda hogolola Bezalel yaUri, omutekulu gwaHur gwomezimo lyaJuda

³nonde mu udha ombepo onkwakalunga, uunongo, oondunge, ontseyo nuunkulungu

⁴okuthaneka iinima yuungomba noku yi longa moshingoli, moshisiliveli nomoshikushu,

⁵okuwega nawa omamanya gondilo noku ga tula moondambo, okuhonga omiti nokulonga oshilonga kehe shuunkulungu.

⁶Onda hogolola ishewe Oholiab yaAhisamak, gwomezimo lyaDan, a longe pamwe naye. Aanongo ayehe yalwe onde ya pa uunkulungu, ya vule okugwanitha iilonga ayihe nde yi ku lombwele:

⁷etsalihangano, oshikethahangano noshisiikilo shasho, iipumbiwa ayihe yometsalihangano,

⁸oshitaafula niikwaniipangitho yasho, oshihukikwanyeka shoshingoli sho shene niikwaniipangitho yasho ayihe, oshiyambelo shiitsinino,

⁹oshiyambelo shomafikilondjambo niikwaniipangitho yasho ayihe, oshiyaha shokwiiyogela nomagulu gasho,

¹⁰oonguwo dha tungikika dhomuyambi Aaron noyana dhokuzala, sho taa yakula moshilonga shuuyambi,

¹¹omugwayo gwomagadhi niitsinino yezimba lya nika nawa omolwEhala lyUuyapuki. Iinima mbika ayihe naaye yi ninge, naanaa ngaashi nde ku lombwele.”

¹²Omuwa okwa lombwele Moses,

¹³a lombwele Aaisraeli ta ti: “Dhiginineni Esabati, esiku lyandje lyevululuko, oshoka olyo endhindhiliko pokati ketu nane sigo okoluvalo noluvalo lyokuhokolola kutya ongame mwene, Omuwa, tandi mu yapula.

¹⁴Omu na okudhiginina esiku lyevululuko, oshoka olyo eyapuki. Kehe ngoka itee li yapula, ndele ota longo esiku ndyoka, na dhipagwe.

¹⁵Omu na omasiku gahamano moka tamu longo iilonga yeni, ihe esiku etiheyali olyo Esabati, esiku lyevululuko lya yapulilwa ndje. Oongoka ta longo esiku ndyoka, na dhipagwe.

¹⁶Aaisraeli oye na okudhiginina esiku ndika, olyo ehangano lyaaluhe.

¹⁷Olyo endhindhiliko lyaaluhe pokati ketu nAaisraeli, oshoka ongame, Omuwa, nda shiti egulu nevi momasiku gahamano nomesiku etiheyali onda zimbuka e tandi vululukwa.”

¹⁸Kalunga sho a mana okupopya naMoses kondundu Sinai, okwe mu pe iipelende iyali yomamanya, moka Kalunga mwene a nyolela mo iipango.