Read Oshindonga-Ombiimbeli Ondjapuki 2008 Exodus 33 Bible Online

Exodus 33 - Oshindonga-Ombiimbeli Ondjapuki 2008 bible

Exodus 33

¹Omuwa okwa lombwele Moses a ti: “Inda, za po mpaka, ngoye mwene naantu we ya tembudha muEgipiti, mu ye kevi nde li uvanekele Abraham, Isak naJakob nomaluvalo gawo.

²Otandi ka tuma omuyengeli gwandje e ku tetekele, notandi ka tidha mo Aakaanana, Aayamori, Aaheti, Aaperesi, Aahevi nAayebusi.

³Oto yi koshilongo hashi kunguluka omahini nomagadhi goonyushi, ihe ngame mwene itandi yi nane, molwaashoka ne aatangalali, ote ningi ndi mu hanagulile mondjila.”

⁴Aantu sho ye shi uvu, oya tameke okulila noinaa zala we uulenga.

⁵Omuwa okwa lombwele Moses, a lombwele aantu a tye: “Ne aantu aatangalali. Andola ndi ende nando okathimbo ndi li mokati keni, ando otandi mu mana po. Ngashingeyi huleni mo uulenga weni, ndi tale sho tandi mu ningi.”

⁶Aaisraeli noyi ihula ihe uulenga wawo okuza pondundu Sinai.

⁷Aaisraeli shampa ya yungu ontanda, Moses oha kutha otenda noku yi dhika kokule kashona nontanda. Oya lukwa etsalihangano, noshaa ngoka a hala okupula Omuwa, oku na okuza mo montanda a ye kulyo pondje.

⁸Moses shampa ta yi ko, nena aantu otaa thikama pomatsali gawo noku mu tongolola, sigo ota ka ningina mo.

⁹Moses shampa a ningine mo, oshikogo otashi kuluka e tashi kala posheelo shetsalihangano, Omuwa nota popitha Moses e li moshikogo.

¹⁰Mbalambala shampa tuu aantu ya mono oshikogo shokugulu posheelo shetsalihangano, yo otaa inyongamene pevi, shaa ngoka posheelo shetsali lye.

¹¹Omuwa okwa li ha popi naMoses koshipala noshipala, naanaa ngaashi omuntu ta popi nakuume ke. Opo ihe Moses ota shuna montanda. Ihe omugundjuka omuyakuli gwe, Josua yaNun, okwa kala metsalihangano ina za mo.

¹²Moses okwa lombwele Omuwa a ti: “Eeno, odhoshili, sho wa lombwele ndje, ndi fale aantu mbaka kevi ndyoka, ihe ngoye ino lombwela ndje ngoka to tumu, a ende pamwe nangame. Owa tile, ou shi ndje nawa nou na ombili nangame.

¹³Ngashingeyi ngele nda mono ohenda koshipala shoye, tseyithila ndje oondjila dhoye, opo ndi ku tseye nondi kale ndi na ombili nangoye. Dhimbulukwa wo kutya owa hogolola oshigwana shika, shi ninge shoye mwene.”

¹⁴Omuwa okwa ti: “Ongame mwene tandi yi nangoye notandi ke ku vululukitha.”

¹⁵Moses okwa yamukula a ti: “Ngele ito yi natse, ino tu etha tu ze mpaka.

¹⁶Olye ta tseya kutya ou na ombili naantu yoye, nonangame, ngele ito ende pamwe natse? Okukala kwoye mokati ketu otaku tu yoolola kiigwana yilwe yokombanda yevi.”

¹⁷Omuwa okwa lombwele Moses a ti: “Otandi ningi naanaa ngaashi wi indile, oshoka ondi ku shi nawa nondi na ombili nangoye.”

¹⁸Nena Moses okwa ti: “Talitha ndje eadhimo lyoye.”

¹⁹Omuwa okwa yamukula a ti: “Otandi ka pititha eadhimo lyandje koshipala shoye nokutumbula edhina lyandje eyapuki. Ongame Omuwa, tandi sile ohenda ngoka tandi sile ohenda notandi sile olukeno ngoka tandi sile olukeno.

²⁰Itandi etha u tale oshipala shandje, molwaashoka kaku na ngoka ta tala ndje e ta kala e na omwenyo,

²¹ihe mpaka ope na ehala ponto yandje mpoka to vulu okuthikama pemanya.

²²Eadhimo lyandje sho tali piti po, otandi ke ku tula mekololo li li memanya e tandi ku siikile noshikaha shandje sigo tandi pitilile po.

²³Nena otandi kutha po oshikaha shandje, noto mono ndje ombunda, ihe hashipala shandje.”