Read Oshindonga-Ombiimbeli Ondjapuki 2008 Exodus 34 Bible Online

Exodus 34 - Oshindonga-Ombiimbeli Ondjapuki 2008 bible

Exodus 34

¹Omuwa okwa lombwele Moses a ti: “Ihongela iipelende yomamanya iyali ya faathana naambiyaka yotango, notandi ka nyolela mo oohapu ndhiyaka dha li miipelende yotango mbyoka wa tatula.

²Ilongekidhila ngula, opo ongula u londe u ye kondundu Sinai, kungame kondungu yayo.

³Ino ya ko nomuntu; nopondundu inapa monika tuu nando omuntu; hanzi nenge ongombe tayi napa ponyonga yondundu.”

⁴Moses okwa hongo iipelende iyali yomamanya ya fa mbiyaka yotango. Ongula okwa meneka e te yi humbata ta londo kondundu Sinai, ngaashi Omuwa e mu lombwele.

⁵Omuwa okwa kulukile ko e li moshikogo e ta thikama pamwe naye nokwa tumbula edhina lye, Omuwa.

⁶Omuwa okwa piti koshipala she ti igidha ta ti: “Ongame Omuwa, ongame Kalunga omunamutimahenda, omunalukeno nomutalanteni, ihandi geye mbala nondu udha esilohenda nuudhiginini.

⁷Ohandi dhiginine ohole yandje koluvalo lwomayuvi note dhimi po uukolokoshi omayono noondjo, ihe itandi etha okugeela omayono goohe koyana nokaatekulu sigo oluvalo olutitatu nolutine.”

⁸Moses okwi inyongamene pevi meendelelo e ta galikana.

⁹Okwa ti: “Omuwa, ngele onda silwa ohenda kungoye, kala mokati ketu. Oshigwana shika osha tangalala, ihe dhima po uukolokoshi wetu noondjo dhetu, ngoye u tu ninge aantu yoye mwene.”

¹⁰Omuwa okwa lombwele Moses a ti: “Ngashingeyi otandi dhike ehangano nAaisraeli. Montaneho yawo otandi ka longa iinyengandunge mbyoka inaayi ningwa mo nale mokati kiigwana muuyuni. Aantu ayehe otaa ka mona iinyengandunge mbyoka ngame, Omuwa, tandi yi longo, oshoka otandi ke ku ningila iinima iitilithi.

¹¹Vulikeni koompango ndhoka tandi dhi mu pe nena. Otandi ka tidha mo Aayamori, Aakaanana, Aaheti, Aaperesi, Aahevi nAayebusi mondjila yeni.

¹²Inamu hangana naantu yomoshilongo shoka tamu ka ya mo, opo shaa ninge omwigo gweni.

¹³Kumunii po iiyambelo yawo, hanagulii po oongundhi dhawo dhiidhila ne mu keke po iiyelekela yawo yoshikalungakiintu Asheera.

¹⁴“Ino simaneka kalunga gulwe, oshoka ngame Omuwa omulaadhi, Kalunga omukodhi.

¹⁵Ino hangana naantu yoshilongo shoka, oshoka uuna taa longele iikalunga yawo notaye yi yambele omayambo, otaa ke ku hiya, u ye kuyo, noto ka kwatwa kemakelo, u lye iikulya ye yi yambele iikalunga yawo.

¹⁶Aana yoye aamati otaa ningi ya hokane aakiintu aakwiilongo, mboka taye ya fala mokwaaitaala ndje nokulongela iikalunga yawo.

¹⁷“Ino ihambulila iiyelekela yookalunga, u yi longele.

¹⁸“Dhiginina Oshituthi shiikwiila inaayi tulwa efulika. Lya iikwiila inaayi tulwa efulika omasiku gaheyali momwedhi Abib, ngaashi nde ku lombwele, oshoka momwedhi ngoka owa tembuka muEgipiti.

¹⁹“Omwiiyelipwa kehe omulumentu noshiiyelipwa kehe oshilumentu shoshimuna oshandje,

²⁰ihe oshiiyelipwa shokasino ou na oku shi kulilitha onzi, ihe ngele ito shi ningi, shi teya othingo. Osheeli kehe shomumati shi kulila ko. “Koshipala shandje inaku holoka omuntu e li iikaha yowala.

²¹“Ou na okulonga omasiku gahamano, ihe ino longa mesiku etiheyali, vululukwa nando pu kale pethimbo lyoondima nenge lyeteyo.

²²“Dhiginina Oshituthi shoshipe, uuna to teya iilya yoye yotango, noto dhiginine Oshituthi shomatsali, sho to likola iiyimati moshitsambe shoye pehulilo lyomumvo.

²³“Aalumentu ayehe oye na okuholoka lutatu momumvo kehe koshipala shOmuwa, Kalunga kaIsrael.

²⁴Otandi ke ku tidhila po iigwana nokutaandelitha oshilongo shoye, nokape na ngoka ta ka haluka evi lyoye, sho to ka holoka koshipala shOmuwa, Kalunga koye, lutatu momumvo.

²⁵“Ino yamba oshikwiila sha tulwa efulika, uuna to yambele ndje omafikilondjambo. Onyama yoshimuna sha dhipagelwa oshituthi shaPaasa, ino yi hupithila ongula.

²⁶“Omumvo kehe oto eta kongulu yOmuwa oshipe shiilya yoye mbyoka wa teya. “Okakombwena ino ka telekela momahini gayina.”

²⁷Omuwa okwa lombwele Moses a ti: “Inyolela oohapu ndhika, oshoka okomukanka gwadho nda dhike ehangano pamwe nangoye nonaIsrael.”

²⁸Moses okwa kala pOmuwa omasiku omilongo ne uusiku nomutenya, ina lya sha noina nwa sha. Oye nokwa nyola oohapu dhehangano kiipelende, odho iipango omulongo.

²⁹Moses sho a londoloka kondundu Sinai a humbata iipelende iyali yiipango omulongo, oshipala she osha li tashi adhima, oshoka okwa popi nOmuwa, ihe ye ine shi tseya.

³⁰Aaron naantu ayehe oya tala Moses noya mono oshipala she tashi adhima noya tila okuhedha puye.

³¹Moses okwe ya ithana, Aaron naawiliki yegongalo oya galukile kuye, Moses nokwe ya popitha.

³²Konima yaashika Aaisraeli ayehe oya gongala puye, naMoses okwe ya pe oompango adhihe ndhoka e dhi pewa kOmuwa kondundu Sinai.

³³Moses sho a mana oku ya lombwela, okwa siikile oshipala she nelapi.

³⁴Ihe shampa ta yi metsalihangano koshipala shOmuwa, ota siikulula oshipala she. Nge ta zi mo, otu uvithile Aaisraeli mbyoka a pewa e yi ya lombwele,

³⁵noyo taa mono oshipala she tashi adhima. Nena ota siikile oshipala she, ihe nge ta yi a ka popye nOmuwa, ota siikulula oshipala she.