Read Oshindonga-Ombiimbeli Ondjapuki 2008 Exodus 37 Bible Online

Exodus 37 - Oshindonga-Ombiimbeli Ondjapuki 2008 bible

Exodus 37

¹Bezalel okwa pangele oshiketha shiipilangi yomuthiya, uule washo oondya mbali netata, omutamo gwasho olundya lumwe netata nomuthika gwasho olundya lumwe netata.

²Okwe shi kolonga noshingolilela meni nokombanda nokwe shi tula oongenge dhoshingoli dha kunkula nasho.

³Okwe shi ningile oonkogo ne dhoshingoli komakuvu gasho, kombinga kehe oonkogo mbali.

⁴Okwa hongo omitenge dhomuthiya nokwe dhi kolongitha oshingoli.

⁵Okwe dhi hwekele moonkogo kombinga kehe yoshiketha.

⁶Okwa ningi oshisiikilo shoshingoli sho shene, uule washo oondya mbali netata nomutamo gwasho olundya lumwe netata.

⁷Okwa longekidha aakerubi yaali moshingoli sha hambulwa,

⁸gumwe komutse nguka namukwawo komutse ngwiyaka gwoshisiikilo. Okwe ya ningi ya kwatathana noshisiikilo.

⁹Aakerubi oya li ya taalelathana poshisiikilo nomawawa gawo ge shi siikila.

¹⁰Okwa pangele oshitaafula shiipilangi yomuthiya, uule oondya mbali, omutamo olundya lumwe nomuthika olundya lumwe netata.

¹¹Okwe shi kolongitha oshingoli sho shene nokwe shi tula oongenge dhoshingoli dha kunkula nasho.

¹²Okwe shi ningile eketsu li thike peke lya kunkula nasho noongenge dhoshingoli dha kunkula neketsu.

¹³Okwe shi hambulile oonkogo ne dhoshingoli nokwe dhi tula komakuvu gane pomagulu.

¹⁴Oonkogo dhokuhwekela omitenge dhokuhumbata oshitaafula okwe dhi tula popepi neketsu.

¹⁵Okwa hongo omitenge moshiti shomuthiya nokwe dhi kolongitha oshingoli.

¹⁶Iinima yokoshitaafula okwe yi hambula moshingoli sho shene: iiyaha, iitsininitho, iitenga nuuyo wokutula iinuwandjambo.

¹⁷Okwa hambula oshihukikwanyeka shoshingoli sho shene. Okwa ningi ompadhi yasho niimpana yasho moshingoli sha hambulwa; uulenga wiiyimino, woonkuto nowoongala dha sheneka okwe dhi hambulile mumwe niimpana.

¹⁸Moombati dhasho omwa tsapuka iimpana ihamano, itatu kombinga ndjika niitatu kombinga onkwawo.

¹⁹Oshimpana kehe shomwiihamano osha li shi na uulenga utatu wa fa iiyimino, oonkuto noongala dha sheneka dhomumandeli.

²⁰Molutu lwoshihukikwanyeka omwa li uulenga une wa fa iiyimino, oonkuto noongala dha sheneka dhomumandeli.

²¹Onkuto yimwe oya li kohi yepando kehe lyiimpana ya tsapuka molutu.

²²Oonkuto niimpana oya li ya kwatathana noshihukikwanyeka noya hambulwa moshingoli sha yela.

²³Okwa longekidhile oshihukikwanyeka oolamba heyali; iikonde yokutetitha omalapi goolamba niikangwa yokutula mo omutoko gwokomalapi. Okwe yi ningi moshingoli sho shene.

²⁴Iilongitho ayihe mbika okwe yi ningi moshitalendi shimwe shoshingoli sho shene.

²⁵Okwa tungu oshiyambelo shiipilangi yomuthiya shokufikila ko iitsinino. Osha li shi na uule wolundya lumwe nomutamo gwolundya lumwe nomuthika gwoondya mbali. Ooniga dhokomakuvu odha li dha kwatathana noshiyambelo.

²⁶Okwa kolonga kombanda yasho, olutu nooniga dhasho noshingoli sha yela nokwe shi ningile epaya lyoshingoli.

²⁷Koombinga adhihe mbali dholutu kohi yoongenge okwe shi ningile oonkogo mbali dhoshingoli dhokuhukilwa omitenge dhoku shi humbata.

²⁸Omitenge okwe dhi hongo dhomuthiya nokwe dhi kolonga noshingoli.

²⁹Okwa lungu omugwayo omuyapuki, osho wo iitsinino yezimba etoye ya longekidhwa paunkulungu.