Read Oshindonga-Ombiimbeli Ondjapuki 2008 Exodus 4 Bible Online

Exodus 4 - Oshindonga-Ombiimbeli Ondjapuki 2008 bible

Exodus 4

¹Nena Moses okwa yamukula Omuwa e ta ti: “Ondu uvite, Aaisraeli itaa ka itaala ndje noitaa ka pulakena shoka tandi ti. Otaa ka tya: Omuwa ine ku ihololela.”

²Omuwa okwe mu pula a ti: “Ou na shike moshikaha?” Moses okwa yamukula: “Ondhimbo.”

³Omuwa okwa ti: “Yi umbila pevi.” Moses sho e yi umbile pevi, oya shituka eyoka, nokwa yi ontuku.

⁴Omuwa okwa lombwele Moses a ti: “Petama, u li kwate komushila.” Moses okwa petama e te li kwata, nolya shituka ishewe ondhimbo.

⁵Omuwa okwa ti: “Shi ninga, u hololele Aaisraeli kutya Omuwa, Kalunga koohokulu, Kalunga kaAbraham, Kalunga kaIsak naKalunga kaJakob okwe ku ihololele.”

⁶Omuwa okwa lombwele Moses ishewe a ti: “Tula oshikaha shoye monkwapa yoye.” Moses okwe shi ningi. Sho e shi kutha mo, osha li sha kwatwa koshilundu, shi na iitotono iitokele.

⁷Omuwa okwa ti: “Shuna mo ishewe oshikaha shoye monkwapa.” Moses okwe shi ningi nasho e shi kutha mo, osha li sha aluka sha faathana nolutu lwe.

⁸Omuwa okwa ti: “Ngele itaye ku itaale, nenge ya tompwe koshinyengandunge shotango, nena shika otashi ke ya tompa.

⁹Ngele iinyengandunge mbika iyali itaye yi itaale, nenge taa tindi okupulakena shoka to ti, teka omeya muNiili e to ga tile pevi. Omeya ngaka otaga ka shituka ombinzi.”

¹⁰Moses okwa ti: “Aawe, Omuwa, ino tuma ndje, kandi shi kupopya. Osho nda kala nale nosho ndi li nena, sho wa popitha ndje. Ongame omunyengwi mokupopya, omukakadhali nomukokomi.”

¹¹Omuwa okwa ti kuye: “Olye a shitile omuntu okana? Olye te mu ningi ombolo nenge omuthitawi? Olye te mu pe omeho nenge te mu tsikitha? Ongame Omuwa.

¹²Ngashingeyi inda! Otandi ke ku popitha notandi ku lombwele shoka to ka tya.”

¹³Moses okwa yamukula a ti: “Aawe, Omuwa, kwatha ndje u tume ko gulwe shila.”

¹⁴Nena Omuwa okwa geele Moses e ta ti: “Mumwanyoko Aaron, Omulevi, ke ko? Ondi shi shi kutya oku shi kupopya nawa. Ote ke ku tsakaneka nota ka nyanyukilwa oku ku mona.

¹⁵Oto vulu oku mu lombwela e to mu hokololele shoka e na okutya. Ne amuhe yaali otandi ke mu lombwela shoka mu na okuninga.

¹⁶Ota ka ninga omupopi peha lyoye nokulombwela oshigwana peha lyoye. Oto kala wa fa Kalunga to mu lombwele shoka e na okutya.

¹⁷Kutha ondhimbo yoye e to ka ninga nayo iinyengandunge.”

¹⁸Moses okwa shuna kuhemweno Jetro e ta ti kuye: “Kwatha ndje ndi ye ndi ka talele po aakwetu muEgipiti, ndi tale, ngele oko ye li ye na omwenyo.” Jetro okwa zimine e te mu laleke nombili.

¹⁹Manga Moses a li muMidian, Omuwa okwa ti kuye: “Shuna kuEgipiti, oshoka ayehe mbeyaka ya li ya hala oku ku dhipaga, oya sa.”

²⁰Moses okwa kutha omukadhi noyana aamati e te ya londeke kokasino nokwa yi kuEgipiti a humbata ondhimbo ndjoka Kalunga a ti ne yi kuthe.

²¹Omuwa okwa lombwele Moses ishewe a ti: “Sho to shuna kuEgipiti, ka ninge koshipala shomukwaniilwa gwaEgipiti iinyengandunge mbyoka nde yi ku pe. Ihe otandi ka kukutika omukwaniilwa noita ka etha aantu ya tembuke.

²²Nena ou na oku mu lombwela kutya ngame, Omuwa, otandi ti: ‘Israel oye omumwandje osheeli.

²³Onde ku lombwele, u ethe omumwandje a ye a ka simaneke ndje, ihe ngoye owa tindi. Nena otandi ka dhipaga omumwoye osheeli.’ ”

²⁴Montanda mondjila yokuya kuEgipiti Omuwa okwa tsakaneke Moses, a hala oku mu dhipaga.

²⁵Nena omukadhi Sippora okwa kutha emanya lya tsa e ta kenke omwana omumati, nokapa okwe ka umbile koompadhi dhaMoses. Pamukalo gwefukaleko okwa ti kuMoses: “Oshili, ngoye ombushikimbinzi gwandje.” Omuwa nokwe mu etha, a hupitha omwenyo gwaMoses.

²⁷Omuwa okwa lombwele Aaron a ti: “Inda kombuga u ka tsakaneke Moses.” Aaron okwa yi nokwe mu tsakanekele pondundu yaKalunga e te mu thipi komilungu.

²⁸Moses okwa hokololele Aaron shoka Omuwa a popi, sho e mu lombwele a shune kuEgipiti. Okwe mu hokololele wo iinyengandunge mbyoka Omuwa e mu lombwele e yi tsakanithe.

²⁹Nena Moses naAaron oya yi kuEgipiti e taa hiya aakuluntu ayehe yAaisraeli ya gongale.

³⁰Aaron okwe ya hokololele ayihe mbyoka Omuwa a lombwele Moses. Moses kombinga ye okwa longo iinyengandunge ayihe montaneho yaantu.

³¹Oyo noyi itaale. Sho yu uvu kutya Omuwa oku na oshimpwiyu nayo nokwa mono nkene taa hepekwa nonyanya, oyi inyongamene pevi noya galikana.