Read Oshindonga-Ombiimbeli Ondjapuki 2008 Exodus 40 Bible Online

Exodus 40 - Oshindonga-Ombiimbeli Ondjapuki 2008 bible

Exodus 40

¹Omuwa okwa lombwele Moses e ta ti:

²“Mesiku lyotango lyomwedhi gwotango thikameka etsalihangano.

³Pungula mo oshikethahangano shi na iipelende yiipango omulongo e to tula etopolitho komeho goshikethahangano.

⁴Tula mo oshitaafula e to tenteke ko iikwaniipangitho yasho ayihe. Tula mo wo oshihukikwanyeka e to hwameke oolamba dhasho.

⁵Tula mo oshiyambelo shoshingoli shokufikila iitsinino komeho goshikethahangano e to endjeleleke eshigolapi posheelo shetsalihangano.

⁶Oshiyambelo shomafikilondjambo oto shi tula komeho getsalihangano.

⁷Oshiyaha shokwiiyogela oto shi tula pokati ketsalihangano noshiyambelo e to shi udhitha omeya.

⁸Dhika olugumbo lwehale e to endjeleleke eshigolapi posheelo shalyo.

⁹“Nena yapula etsalihangano niikwaniipangitho yalyo ayihe noku yi gwayeka nomagadhi omayapuki, notali ningi eyapuki.

¹⁰Otaku landula eyapulo lyoshiyambelo niikwaniipangitho yasho ayihe, notashi ningi oshiyapuki.

¹¹Gwayeka wo oshiyaha shokwiiyogela nomagulu gasho, opo u shi yapule.

¹²“Eta Aaron noyana posheelo shetsalihangano e to ya yogo nomeya.

¹³Zaleka Aaron oonguwo oondjapuki e to mu gwayeke noku mu yapula, opo a ninge omuyambi a longele ndje.

¹⁴Eta wo oyana e to ya zaleke oohema.

¹⁵Nena ya gwayeka, naanaa ngaashi wa gwayeke he, opo ya ninge aayambi ya longele ndje. Egwayeko ndika otali ya ningi aayambi sigo okoluvalo noluvalo.”

¹⁶Moses okwa gwanitha ayihe, ngaashi Omuwa a popi.

¹⁷Mesiku lyotango lyomwedhi gwotango omumvo omutiyali, sho ya tembuka muEgipiti, etsalihangano olya thikamekwa.

¹⁸Moses okwa tenteke po oompadhi dhetsalihangano niipilangi yalyo, okwa tula ko omalukambo gayo nokwa dhike oongundhi dhalyo.

¹⁹Okwa hwanuna ko otenda e ta tula ko esiikilo kombanda, naanaa ngaashi Omuwa a popi.

²⁰Nena okwa kutha iipelende iyali yomamanya e te yi pungula moshikethahangano. Okwa hwekele omitenge moonkogo dhoshiketha e ta tenteke ko oshisiikilo shesilohenda.

²¹Okwa langeke oshiketha metsalihangano e te endjeleleke etopolitho nolya siikile oshikethahangano, ngaashi Omuwa a lombwele Moses.

²²Okwa tula oshitaafula meni lyetsalihangano lwokuumbangalantu kombinga yopondje yetopolitho

²³e ta tenteke ko iikwiila iiyapuki koshipala shOmuwa, naanaa ngaashi Omuwa a lombwele Moses.

²⁴Okwa tula oshihukikwanyeka metsalihangano lwokuumbugantu sha taalelathana noshitaafula,

²⁵nokwa hwameke oolamba koshipala shOmuwa, ngaashi Omuwa a lombwele Moses.

²⁶Okwa tula oshiyambelo shoshingoli metsalihangano komeho getopolitho,

²⁷nokwa lungunitha iitsinino yezimba etoye, naanaa ngaashi Omuwa a lombwele Moses.

²⁸Okwe endjeleleke eshigolapi posheelo shetsalihangano,

²⁹noshiyambelo shomafikilondjambo okwe shi tula komeho gosheelo shetsalihangano. Okwa yambele ko efikilondjambo niikulyandjambo, naanaa ngaashi Omuwa a lombwele Moses.

³⁰Okwa tula oshiyaha shokwiiyogela pokati ketsalihangano noshiyambelo e te shi udhitha omeya.

³¹Moses, Aaron noyana oya yogo iikaha yawo noompadhi dhawo moshiyaha shoka,

³²shampa taa yi metsalihangano nenge koshiyambelo, naanaa ngaashi Omuwa a lombwele Moses.

³³Moses okwa thikameke olugumbo lwehale lwa kunduka etsalihangano noshiyambelo e te endjeleleke eshigolapi posheelo shehale. Nena okwa manitha iilonga ayihe.

³⁴Oshikogo osha kwidhidhike etsalihangano, neadhimo lyOmuwa olye li udhitha.

³⁵Omolwashika, Moses ina wapa okuya mo metsalihangano.

³⁶Aaisraeli oya dhilukitha po ontanda yawo yu uka palwe aluhe, oshikogo sho sha yeluka kombanda yetsalihangano

³⁷Oya kala mpoka, sigo oshikogo sha yeluka po ishewe, nena oya dhilutha wo ontanda yawo.

³⁸Moondjenda dhawo adhihe oya vulu okumona oshikogo shOmuwa sha kala kombanda yetsalihangano omutenya, nomulilo tagu yeta musho uusiku.