Read Oshindonga-Ombiimbeli Ondjapuki 2008 Exodus 5 Bible Online

Exodus 5 - Oshindonga-Ombiimbeli Ondjapuki 2008 bible

Exodus 5

¹Moses naAaron oya yi komukwaniilwa gwaEgipiti noya ti: “Omuwa Kalunga kaIsrael ota ti: ‘Etha aantu yandje ya ka dhanene ndje oshituthi mombuga nokugalikana ndje.’ ”

²Omukwaniilwa okwa ti: “Omuwa olye, ndi pulakene ewi lye nondi laleke Aaisraeli ya ye? Omuwa ngoka kandi mu shi noite laleke Aaisraeli.”

³Moses naAaron oya yamukula ya ti: “Kalunga kAahebeli okwe tu ihololele. Tu zimina, tu ye ko ondjenda yomasiku gatatu mombuga, tu ka yambele Omuwa, Kalunga ketu, omafikilondjambo. Ngele itatu shi ningi, ote tu dhipaga po nuuvu nenge niita.”

⁴Omukwaniilwa okwa ti kuMoses naAaron: “Omolwashike tamu kateke aantu, sho tamu tonyalitha aantu miilonga yawo? Indeni kiilonga yeni!

⁵Aantu yeni oyi indjipala ye vule Aayegipiti. Ngashingeyi omwa hala mu kankeke iilonga!”

⁶Esiku tuu ndyoka omukwaniilwa okwa lombwele aalongithi yaapika naawiliki yiilonga Aaisraeli ta ti:

⁷“Etheni okupa aantu omwiidhi gwokutholomitha oondhopi. Naa ke gu ikongele yo yene.

⁸Ihe naa gwanithe omwaalu gwoondhopi ngaashi shito, itapu kala nando ondhopi yimwe inaayi gwanithwa. Oyo aananyalo unene, nomolwashoka taa pula ndje, ndi ya laleke, ya ka yambele Kalunga kawo omafikilondjambo.

⁹Iilonga yaantu mbaka yi ningeni oyindji, opo yi itule mo, yaa kale ye na olweedhe lwokupulakena oohapu dhiifundja.”

¹⁰Aalongithi yaapika naawiliki Aaisraeli oya yi e taa lombwele Aaisraeli taa ti: “Omukwaniilwa ota ti, ite mu kwatha we omwiidhi gwokutholoma.

¹¹Indeni mu ki ikongele omwiidhi mpoka tamu gu mono, ihe omwaalu gwoondhopi omu na oku gu gwanitha.”

¹²Aantu noya andjalala Egipiti alihe taa kongo omwiidhi.

¹³Aalongithi yaapika oya dhiginine oku ya thiminika, ya gwanithe omwaalu gwoondhopi esiku kehe, ngaashi ya li haa ningi shito, sho ya li haa pewa omwiidhi.

¹⁴Aalongithi yaapika Aayegipiti oya dhenge aawiliki Aaisraeli ya li haa tonatele iilonga. Oya ti: “Omolwashike aantu yeni inaa gwanitha omwaalu gwoondhopi, ngaashi haa ningi shito?”

¹⁵Nena aawiliki oya yi komukwaniilwa noya yemata ya nyenyeta taa ti: “Nkeyama, omolwashike to tu ningi ngeyi?

¹⁶Itatu pewa omwiidhi, ndele otatu lombwelwa, tu tholome oondhopi! Nongashingeyi otatu dhengwa, nando ombedhi oyi li koshigwana shoye.”

¹⁷Omukwaniilwa okwa yamukula a ti: “One aananyalo. Inamu hala okulonga, nomolwashoka hamu pula ndje, ndi mu laleke, mu ka yambele Omuwa omafikilondjambo.

¹⁸Shuneni kiilonga yeni! Itamu pewa we omwiidhi, ihe otamu gwanitha omwaalu gwoondhopi.”

¹⁹Aawiliki oya dhimbulula kutya ngashingeyi oye li muudhigu, sho ya lombwelwa kutya otaa tholoma omwaalu gwoondhopi gu thike pungoka haa tholoma shito.

²⁰Sho ya zi po, oya tsakaneke Moses naAaron, mboka ya li ye ya tegelela.

²¹Oya lombwele Moses naAaron ya ti: “Omuwa okwa mono shoka mwa ningi note ke mu geela, oshoka omwe tu tonditha komukwaniilwa nomalenga ge. Omwe ya pe egongamwele, ye tu dhipage.”

²²Nena Moses okwa shuna kOmuwa e ta ti: “Omuwa, omolwashike to hepeke aantu yoye? Omolwashike wa tumu ndje huno?

²³Okuza mpoka nda yile komukwaniilwa ndi mu lombwele medhina lyoye, okwa hepeke aantu yoye nonyanya. Ihe ngoye ino ninga sha u ya kwathe.”