Read Oshindonga-Ombiimbeli Ondjapuki 2008 Exodus 8 Bible Online

Exodus 8 - Oshindonga-Ombiimbeli Ondjapuki 2008 bible

Exodus 8

¹Omuwa okwa lombwele Moses a ti: “Inda komukwaniilwa u mu lombwele u tye: ‘Laleka aantu yandje ya ye, opo ya ka simaneke ndje.

²Ngele oto tindi, otandi geele oshilongo shoye noku shi siikila nomafuma.

³Niili otagu ka ndumbakana omafuma, notaga ka za mo tage ya muuwa woye nomondjugo yoye yokulala nokombete yoye, osho wo momagumbo gomalenga goye nogaantu yoye, otage ya nokuli meziko lyoye nomiipana yoye yokukangela.

⁴Otage ke ku nukila ngoye naantu yoye nomalenga goye agehe.’ ”

⁵Omuwa okwa lombwele Moses a ti: “Lombwela Aaron a yeluthile ondhimbo ye komilonga, komikanka nokomadhiya, opo omafuma ga ndjituke ga siikile evi lyaEgipiti.”

⁶Aaron okwe yi yeluthile komeya agehe, nomafuma oga ndjituka e taga siikile evi.

⁷Ihe oompulile odha longitha uumpulile, nadho wo odha ndjitukitha omafuma ga holoka.

⁸Omukwaniilwa okwi ithana Moses naAaron e ta ti: “Galikaneni Omuwa a kuthe po omafuma ngaka, notandi ka laleka aantu yeni ya ye, opo ya ka yambele Omuwa omafikilondjambo.”

⁹Moses okwa yamukula a ti: “Otandi nyanyukilwa oku ku galikanena. Utha ethimbo, uuna tandi ke ku galikanena, osho wo omalenga goye naantu yoye. Nena oto ka manguluka komafuma, noitaku ka kala we nando olimwe, shila omuNiili amuke.”

¹⁰Omukwaniilwa okwa yamukula a ti: “Galikanena ndje ongula.” Moses okwa ti: “Otandi ka ninga, ngaashi wa pula. Ngoye oto ka tseya kutya kaku na kalunga e thike pOmuwa, Kalunga ketu.

¹¹Ngoye, omalenga goye naantu yoye otamu ka manguluka komafuma noitaku ka kala we nando olimwe, shila omuNiili amuke.”

¹²Moses naAaron oya zi pomukwaniilwa, Moses nokwa galikana Omuwa, a kuthe po omafuma ngoka u undulile omukwaniilwa.

¹³Omuwa okwa ningi, ngaashi Moses a pula, nomafuma ngoka ga li momagumbo, momalundu nomuuwa, oga si.

¹⁴Aayegipiti oye ga ndumbile moondumba oonene, nevi alihe olya nika komafuma.

¹⁵Omukwaniilwa sho a mono omafuma ga si, okwa kukutike ishewe omwenyo gwe, naanaa ngaashi Omuwa a tile kutya omukwaniilwa ita ka pulakena Moses naAaron.

¹⁶Omuwa okwa lombwele Moses a ti: “Lombwela Aaron a fundule ontsi yevi nondhimbo ye, nontsi otayi ka shituka uumbululu muEgipiti alihe.”

¹⁷Aaron okwa fundula evi nondhimbo ye, nontsi ayihe muEgipiti oya shituka oomwe dha siikile aantu niimuna.

¹⁸Oompulile odha kambadhala okulonga kuumpulile wadho, dhi hololithe po uumbululu, ihe odha nyengwa. Uumbululu odha li apehe,

¹⁹noompulile odha lombwele omukwaniilwa dha ti: “Kalunga oye a ningi shika!” Ihe omukwaniilwa okwa li a kukuta, naanaa ngaashi Omuwa a ti, noina pulakena Moses naAaron.

²⁰Omuwa okwa lombwele Moses a ti: “Meneka ongula onene u ka tsakaneke omukwaniilwa, sho ta yi komulonga, u mu lombwele kutya Omuwa ota ti: ‘Laleka aantu yandje ya ye, opo ya ka simaneke ndje.

²¹Ngele oto tindi, otandi ku geele noku ku tumina omatopola, ngoye mwene, omalenga goye naantu yoye. Omatopola otaga ka udha omagumbo agehe gAayegipiti notaga siikile evi alihe.

²²Ihe otandi yoolola mo omukuma gwaGoshen, moka mwa kala aantu yandje, noitamu kala nando omatopola. Otandi shi ningi, opo u tseye kutya ongame Omuwa tandi longo moshilongo shika.

²³Otandi ka ninga eyooloko pokati kaantu yandje naantu yoye. Oshinyengandunge shika otashi ka ningwa ongula.’ ”

²⁴Omuwa okwa tumu oshikogo shomatopola muuwa womukwaniilwa nomomagumbo gomalenga ge. Oshilongo ashihe shaEgipiti osha hepekwa nayi komatopola.

²⁵Omukwaniilwa okwi ithana Moses naAaron e ta ti: “Indeni mu ka yambele Kalunga keni omafikilondjambo, ihe omoshilongo muka tuu.”

²⁶Moses okwa yamukula a ti: “Itashi opala oku shi ningila muka, oshoka Aayegipiti otaa ka hindwa komafikilondjambo getu giimuna mbyoka tatu ka yambela Omuwa, Kalunga ketu. Ngele tatu yamba iimuna e tatu hindi Aayegipiti pomafikilondjambo getu ye tu wete, otaye tu dhipaga nomamanya.

²⁷Otu na okweenda omasiku gatatu tu ye kombuga, tu ka yambele Omuwa, Kalunga ketu, omafikilondjambo, naanaa ngaashi e tu lombwele.”

²⁸Omukwaniilwa okwa ti: “Otandi ke mu etha, mu ka yambele Omuwa, Kalunga keni, omafikilondjambo mombuga, ngele itamu yi kokule unene. Galikanenii ndje.”

²⁹Moses okwa yamukula a ti: “Mbalambala shampa nda zi mpaka, otandi ka galikana Omuwa. Ongula omatopola otage mu thigi po, ngoye mwene, omalenga naantu yoye. Ihe ino tu kotokela we nokwiimba aantu koku ka yambela Omuwa omafikilondjambo.”

³⁰Moses okwa zi pomukwaniilwa e ta galikana Omuwa,

³¹nOmuwa okwa ningi, ngaashi Moses a pula. Omatopola oga thigi po omukwaniilwa, omalenga ge naantu ye; inaku kala we nando etopola limwelimwe.

³²Ihe nando ongaaka, omukwaniilwa okwa kukutike omwenyo gwe noina laleka aantu ya ye.