Read Oshindonga-Ombiimbeli Ondjapuki 2008 Job 10 Bible Online

Job 10 - Oshindonga-Ombiimbeli Ondjapuki 2008 bible

Job 10

¹Onda kenyanana okukala nomwenyo. Otandi holola omayemato gandje notandi popi moluululume womwenyo gwandje.

²Otandi lombwele Kalunga kaa pangule ndje, ihe a lombwele ndje shoka nda yona.

³Okuhepeka ndje okwe ku opalela tuu? Osho opala tuu okunyema nokweekelahi iilonga yiikaha yoye, manga to pitika oompangela dhaakaanakalunga?

⁴Oho tala iinima ngaashi omuntu te yi tala?

⁵Omasiku goye oga fa gomuntu, nenge omimvo dhoye odhi thike podhomuntu?

⁶Omolwashike to kongo omapuko gandje noto konakona omayono gandje?

⁷Ou shi shi kutya kandi na uusama, nokaku na ngoka ta vulu okukutha ndje mo miikaha yoye.

⁸Iikaha yoye oyo yu umbinga ndje nonda mewa, ihe ngashingeyi oto hanagula ndje po.

⁹Dhimbulukwa kutya owa shiti ndje meloya. Owa hala u shune ndje montsi?

¹⁰Owa tilehi ndje ngaashi omahini nowa kukutike ndje ngaashi ehini.

¹¹Olutu lwandje owe lu tungitha omasipa noothipa nowe lu zaleke oshipa noontumba.

¹²Owa pe ndje omwenyo nowa li u hole ndje e to sile ndje oshimpwiyu.

¹³Shika owe shi kaleke momutima gwoye; onda tseya kutya shika osha kala elalakano lyoye okudhenga ndje.

¹⁴Ando onda yonene, ando owa mono ndje, noino etha ndi kale inaandi geelwa.

¹⁵Ngele onda yono, yaye ngame! Nonando kandi na uusama, ite vulu okuyelutha omutse gwandje. Onda sa ohoni nonda pwila muuwehame.

¹⁶Sho te kambadhala okuyeluka, oto hundjunine ndje ngaashi onkoshi noto ulukile ndje oonkondo dhoye.

¹⁷Owe eta po oombangi oompe, dhi tamaneke ndje, nowi indjipalithile ndje ondjahi yoye; oonkondo dhoye otadhi thindi ndje dhaa na oluthuwo.

¹⁸Omolwashike ano wa pititha ndje mo moshivalelo shameme? Ando onda sile mo, manga kaaku na ngo a mona ndje!

¹⁹Oshihwepo ando nda li inee holoka po; ando onda sile moshivalelo shameme nokuukilila mombila.

²⁰Omasiku gandje kage shi omashona nani? Etha ndje, ndi ikalele, opo ndi nyanyukwe methimbo lya hupu ko.

²¹Otandi yi mbala hoka ihaaku galukiwa, koshilongo shomilema, mombwili yeso,

²²molumbogo lwomilema omiluudhe thokothoko, mekolombongo lyomuzizimba gweso nevundakano, moka uuyelele wa faathana nomilema.