Read Oshindonga-Ombiimbeli Ondjapuki 2008 Job 11 Bible Online

Job 11 - Oshindonga-Ombiimbeli Ondjapuki 2008 bible

Job 11

¹Sofar Omunaema okwa yamukula ngeyi.

²Omapulo agehe ngano otaga kala inaaga yamukulwa? Omupopi nguno oku li tuu mondjila?

³Job, okupopya kwoye kwanathangwa otaku tu tompo, twaa vule oku ku yamukula? Kaku na ngo te ku ganda, ngele to sheke?

⁴Oto lombwele Kalunga kutya omaiuvito goye kage na ndjo, ngoye omuyogoki koshipala she.

⁵Akutu, onda hala ando Kalunga a popye, e ku tamaneke.

⁶Ne ku hololele oshiholekwa shuunongo, oshoka uunongo washili ou li opendji. Kalunga ite ku pula ngaashi wi ilongela.

⁷Oto wapa tuu okutseya iiholekwa yaKalunga? Oto vulu tuu okuyeleka uunene wOmunankondoawike?

⁸Owo u vule uule wegulu — oshike to vulu okuninga? Owo u vule uule woshaasi — oshike to vulu okutseya?

⁹Uunene waKalunga ou vule evi nowa mbwalangandja u vule efuta.

¹⁰Kalunga ngele te ya e te ku edhilile mondholongo nota ithana aantu koompangu, olye ta vulu oku mu keelela?

¹¹Kalunga aapwidhi oku ya shi; iilonga yawo ayihe iiwinayi ita kala inee yi mona.

¹²Momutsemwapwa ota vulu okuninga oondunge, ihe okasino itaka vulu okuninga omuntu.

¹³Job, ikonakona nawa momutima gwoye; yeluthila kuye omaako goye.

¹⁴Etha uuwinayi; ino pitika, uukolokoshi u kale megumbo lyoye.

¹⁵Nena oto ka yelutha oshipala shoye waa na ohoni; oto ka kala othika waa na uumbanda.

¹⁶Oto ka dhimbwa uudhigu woye; oto ke u dhimbulukwa owala wa fa omeya ga tondoka po.

¹⁷Omasiku goye otaga ka fa uuyelele moshanga shomutenya, nomilema otadhi ka fa uuyelele wongula.

¹⁸Oto ka kala nawa, u na egameno; to kala wa gamenwa nou na ombili.

¹⁹Oto ka lala, nokapu na ngoka te ku halutha, naantu oyendji otaa ka hala, u kale u ya hole.

²⁰Omeho gaakaanakalunga otaga ka tsika, nokaye na mpo taa ka holama. Otaa ka tegelela owala okusa.