Read Oshindonga-Ombiimbeli Ondjapuki 2008 Job 13 Bible Online

Job 13 - Oshindonga-Ombiimbeli Ondjapuki 2008 bible

Job 13

¹Ayihe mbika wa popi, onde yi mona, nomakutsi gandje oge yi uva.

²Shoka mwa tseya, onde shi tseya wo; kamu vule ndje.

³Onda hala ndi popye nOmunankondoawike, nonda hala ndi tamanane naKalunga.

⁴Otamu gwayeke ndje owala omahoka goombwa komulungu; ne oonganga mwaa na ekwatho.

⁵Ando omwa mwenene inaamu popitha ndje, ando omwa ningi aanandunge.

⁶Pulakeneni ano omatompelo gandje; ne mu uve iitya yomilungu dhandje.

⁷Omwa hala okupopya omapuko medhina lyaKalunga? Omakoto geni otaga kwatha tuu Kalunga?

⁸Otamu gamene Kalunga nokupopya iifundja? Otamu yi koompangu peha lye?

⁹Otashi ka kala tuu nawa, ngele te mu konakona? Otamu vulu tuu okukotokela Kalunga, ngaashi hamu kotokele aantu?

¹⁰Kalunga ote ke mu pandula tuu, ngele omu na ontondo ya holama?

¹¹Eadhimo lye itali mu tilitha? Ehalutho lye itali mu kakamitha?

¹²Omayeletumbulo geni kage na oshilonga, oga fa owala omutoko. Omatompelo geni otaga halakana ngaashi eloya.

¹³Pii ndje olweedhe, ndi popye; shoka tashi adha ndje, nashi ningwe.

¹⁴Omwenyo gwandje otii gu tula tuu pokakangwa? Itandi kambadhala okwiigamena?

¹⁵Kalunga nando ona ukithe ndje egonga, onde mu inekela; otandi ipopile ashike koshipala she.

¹⁶Shika osho ehupitho lyandje, oshoka omukeenakalunga ita kala koshipala she.

¹⁷Ngashingeyi pulakeneni nawa; omakutsi geni naga taambe shoka te popi.

¹⁸Ondi ilongekidha okwiipopila, oshoka onda tseya kutya ondi li moshili.

¹⁹Oku na tuu ngoka ta vulu okupa ndje uusama? Ngele osho, ote mwena e te si.

²⁰Kalunga, pitikila ndje iinima mbika iyali, nena itandi ke ku holama:

²¹Oshikaha shoye shi kaleka kokule nangame; hulitha po okutilitha ndje nomagando goye.

²²Kalunga, ithana ndje notandi ku itaale, nenge u pitike, ndi popye e to yamukula.

²³Oondjo nomayono ano ogendji nde ga ningi? Ulukila ndje oondjo nomayono gandje.

²⁴Omolwashike to holeke ndje oshipala shoye noto tala ndje omutondi gwoye?

²⁵Oto tilitha efo tali pepwa kombepo. Oto tidhatidha etutu lyowala.

²⁶Owa tokolele ndje epangulo elulu nowa taambitha ndje omayono gomuugundjuka wandje.

²⁷Owa tula oompadhi dhandje meti; oonkatu dhandje adhihe oho dhi tonatele notu ulike mpoka ndi na okulyata.

²⁸Oshoka omuntu ota pepuka po a fa omuti tagu tukwa nongonguwo tayi lika po.