Read Oshindonga-Ombiimbeli Ondjapuki 2008 Job 17 Bible Online

Job 17 - Oshindonga-Ombiimbeli Ondjapuki 2008 bible

Job 17

¹Omwenyo gwandje ogwa tekauka, nomasiku gandje oga fupipikwa; eso otali tegelele ndje.

²Aasheki yandje otaa kunduka ndje; omeho gandje otaga tala uutondwe wawo.

³Kalunga, ninga omupopili gwandje. Olye we ta popile ndje?

⁴Omadhiladhilo gawo oga patwa, kaye na omayele, onkee itaa ka sindana.

⁵Omuntu ngoka ta popi nayi kuume ke omolwokufutwa, omeho goyana otaga ka tsika mo.

⁶Kalunga okwa ningi ndje omunyanwa gwashaa ngoka, omuntu gwokuhiyilwa omayeye moshipala.

⁷Omeho gandje oga tsiyala koluhodhi; olutu lwandje olwa fa omuzizimba.

⁸Aayuuki otaye shi kuminwa; aakaanashipo otaa thikamene aakaanakalunga.

⁹Ihe nando ongeyi, aayuuki otaa dhiginine oshili yawo, naamboka ye na iikaha ya yela, otaa tsikile nomukumo.

¹⁰Eewa, galukeni, ileni amuhe! Mokati keni kandi wete mo omunandunge.

¹¹Omasiku gandje oga pita po, oompangela dhandje odha hulithwa po nosho wo ondjuulukwe yandje.

¹²Aantu mbaka otaa faathanitha uusiku nomutenya, sho taa ti: “Momilema otamu zi uuyelele.”

¹³Ngele ote tegelele muusi omo mu kale maandjetu, nenge te yala ontala yandje momilema,

¹⁴ngele ote lombwele eolelo kutya ongoye tate, nomazinyo otandi ga ithana meme nomumwamemekadhona,

¹⁵nena ando etegameno lyandje oli li we peni? Olye te ke li mona?

¹⁶Otali ka ya pamwe nangame mombila? Otatu ka ningina pamwe nalyo mevi?