Read Oshindonga-Ombiimbeli Ondjapuki 2008 Job 18 Bible Online

Job 18 - Oshindonga-Ombiimbeli Ondjapuki 2008 bible

Job 18

¹Bildad Omushuak okwa yamukula ngeyi:

²Job, uunake to hulitha okupopya? Ninga omunandunge, nena otatu wapa okupopya.

³Omolwashike to tu tala twa fa iimuna, notwa ningi aagoya momeho goye?

⁴Mondjahi oto inyanyagula mwene. Evi otali ka mbugalekwa molwondjahi yoye, nenge oondundu otadhi lundululwa po pomahala gadho?

⁵Eeno, uuyelele womukeenakalunga otau dhimi po, noonte dhe itadhi yele we.

⁶Olamba yometsali lye otayi dhimi, onyeka ye mu minikila otayi dhimwa po.

⁷Oonkatu dhe nando odha li dha kola, otadhi ka pegeya; uunongo we mwene otau mu thigi po.

⁸Oompadhi dhe otadhi yi momwigo e ta yulwa.

⁹Omwigo otagu mu kwata koshithi, netavu otali mu yulu lye mu nkenena.

¹⁰Elulo olye mu tegelwa mevi, nekelo olye mu fulilwa mepola.

¹¹Ehalutho otali tilitha akuhe, notali mu landula shaa mpoka ta yi.

¹²Omupya ogwe mu ekamena okana, noshiponga oshi li popepi naye.

¹³Omukithi omudhigu otagu li ko iilyo ye kolutu notagu tokola ko omagulu nomaako.

¹⁴Ota kuthwa metsali lye e li inekela nota falwa komukwaniilwa gwomatilitho.

¹⁵Omulilo itagu thigi mo sha metsali lye, osulufuli otayi fike po onganda ye.

¹⁶Omidhi dhe otadhi sile mevi, niitayi ye otayi kukutile kombanda.

¹⁷Ita dhimbulukiwa we kombanda yevi, nesimano lye otali hulu po.

¹⁸Ota tidhwa muuyelele, a ye momilema, nota kondwa mo mokati kaantu.

¹⁹Ke na oshitutuma nenge oluvalo mokati koyaandjawo, megumbo lye itamu hupu nando omuntu e na omwenyo.

²⁰Omupya gwe ogwa kumitha aayuninginino, naauzilo oya tila taa kakama.

²¹Eeno, shika osho tashi adha aakaanakalunga, ndjika oyo onkalo yaamboka kaaye shi Kalunga.