Read Oshindonga-Ombiimbeli Ondjapuki 2008 Job 2 Bible Online

Job 2 - Oshindonga-Ombiimbeli Ondjapuki 2008 bible

Job 2

¹Opwa ningi ishewe, aayengeli yaKalunga sho ya holoka koshipala shOmuwa, Satana okwa li wo mokati kawo.

²Omuwa okwe mu pula a ti: “Oto zi peni?” Satana okwa yamukula a ti: “Onde ende mpaka naampeyaka nonda taakana evi alihe.”

³Omuwa okwa pula a ti: “Ino mona omuntu gwandje Job? Kombanda yevi kaku na omuntu e mu fa. Oye omuyuuki kee na oshipo, omulumentu ha tila Kalunga noha tondo uuwinayi. Ngoye owa lombwele ndje, ndi mu dhenge pwaa na etompelo, ihe Job okwa dhiginine eitaalo lye.”

⁴Satana okwa yamukula a ti: “Omuntu ota gandja po iinima ye ayihe, opo a kale e na omwenyo.

⁵Ihe ngele to gumu olutu lwe, nena ote ku sheke montaneho!”

⁶Omuwa okwa ti kuSatana: “Eewa, ngashingeyi otandi mu gandja miikaha yoye, mu dhenga kolutu, ihe omwenyo gwe ino gu guma.”

⁷Satana okwa zi ko koshipala shOmuwa nokwa umbu Job iitumbuka molutu aluhe.

⁸Job okwa kuutumba momutoko nokwa kutha oshikangwa e ta yaga nasho iitumbuka ye.

⁹Omukadhi okwa ti kuye: “Natango owa hala ngaa okukala omuyuuki? Sheka Kalunga, u se.”

¹⁰Job okwe mu yamukula a ti: “Oto popi wa fa omukiintu omugoya. Ndishi Kalunga ngele te tu pe uuwanawa, otatu u taamba. Otatu mu pe tuu uusama, ngele te tu pe uudhigu?” Mwaayihe mbika Job ina yona sha, a tamaneke Kalunga.

¹¹Ookuume kaJob yatatu oyo Elifas gwomoshilando Teman, Bildad Omushuak naSofar Omunaema. Ano sho yu uvu kutya Job ota alukwa, oya tokola ye ke mu talele po noku mu hekeleka.

¹²Manga ya li kokule, oya mono Job, ihe inaye mu dhimbulula. Sho ye ya popepi naye, oya tameke okulila mokule e taa tuula oonguwo dhawo molwoluhodhi yo taa igundu evi momitse.

¹³Opo ihe oye mu kuutumbile omasiku gaheyali, uusiku nomutenya, yo itaa popi nando osha, oshoka oya mono kutya Job oku li muudhigu uunene.