Read Oshindonga-Ombiimbeli Ondjapuki 2008 Job 24 Bible Online

Job 24 - Oshindonga-Ombiimbeli Ondjapuki 2008 bible

Job 24

¹Omolwashike Omunankondoawike itu utha esiku, uuna ta pangula? Omolwashike mboka ye mu tseya, itaye li mono?

²Aantu otaa nenepeke oongamba dhomapya gawo, notaa litha iimuna ye yi yaka.

³Otaa hingi po okasino kothigwa, notaa kwata ongombe yomuselekadhi ombambyona.

⁴Otaa pukitha oohepele, notaa holamitha aafupi ayehe yomoshilongo.

⁵Oohepele odha fa oongolo dhomombuga, otadhi yi dhi ka konge iipalutha; ombuga otayi palutha oyana.

⁶Otadhi pupula iipalutha momapya, notadhi toonona omakukila miitsambe yaakaanakalunga.

⁷Otadhi lala omudhu, dha pumbwa oonguwo; kadhi na omakumbyatha gokwiisiikila dhaa se uutalala.

⁸Otadhi ende dha hipa komvula yepoola; sho dha pumbwa egameno, otadhi ondama pekololo.

⁹Aakaanakalunga ohaa piki othigwa ohanana, nokahanona kohepele ohaye ka kwata po, opo ongunga yi futwe.

¹⁰Ihe oohepele otadhi ende nomalutu gowala, dhaa na oonguwo; otadhi humbata iilya, ihe itadhi yi li.

¹¹Otadhi yenge omagadhi gooholivi, otadhi kolo omandjembele, ihe odha sa enota.

¹²Omakemo goonakudhipagwa otaga uvika moshilando, ihe Kalunga ita pulakene nando omagalikano gawo.

¹³Oku na aantu ya tsa ondumbo nuuyelele; inaye u koneka noitaye u landula.

¹⁴Omudhipagi ota meneka, manga eluwa inaali tenda, nota dhipaga ohepele; nomuusiku ota yaka.

¹⁵Aahondeli otaa tonata momilema; otaa dhiladhila kutya kape na ngoka e ya wete notaa siikile iipala yawo.

¹⁶Aafuthi otaa teya omagumbo uusiku, ihe omutenya otaa ipatele meni; inaa hala okukala muuyelele.

¹⁷Oshoka oyo ayehe ohaa endele kumwe nomilema, nomilema itadhi ya tilitha.

¹⁸Aakaanakalunga otaa yiwa nayo komeya gefundja, omapya gawo oga thingwa, nokape na ngo ta longo miitsambe yomuviinu.

¹⁹Ngaashi uupyu nuukukutu tau kutha po uututo, osho omulunde ta kana po.

²⁰Nayina ote mu dhimbwa; omazinyo otage mu li po; nota hanagulwa po a fa omuti gwa teka po.

²¹Oshoka oha yugu omukiintu ihaa vala, noiha si omuselekadhi ohenda.

²²Ihe Kalunga aanankondo ote ya tidha po; nando naa kale ya kola, itaa kala ye na egameno.

²³Nando Kalunga te ya etha e taa kala ya fa taa vululukwa, omeho ge oga tonatela oondjila dhawo.

²⁴Otaa kala ya simana okathimbo, ihe ohaluka kaye po we. Otaa fupipikwa notaa gongelwa ya fa yakwawo, notaa teywa ya fa iilya.

²⁵Oku na tuu ngo ta vulu okutinda kutya hasho? Oku na tuu ngo ta vulu okutya, ote popi iifundja.