Read Oshindonga-Ombiimbeli Ondjapuki 2008 Job 28 Bible Online

Job 28 - Oshindonga-Ombiimbeli Ondjapuki 2008 bible

Job 28

¹Oku na oomina dhoshisiliveli, nomahala mpoka oshingoli hashi yelithwa.

²Oshiyela otashi fulwa mevi, noshikushu otashi hemunwa tashi zi moshimanya.

³Aantu otaa entamene momilema, otaa konakona muule womevi notaa kongo oshimanya muuleeleka.

⁴Otaa fulu iikolo yoomina mevi, kokule naantu mboka ye li kombanda; pokuma ihaapu endiwa kaantu, opo mpoka taa fulu ye li muuwike.

⁵Mevi omo hamu zi iikulya, ihe meni lyalyo otamu lunduluka mwa fa mu na omulilo.

⁶Omamanya gosafire ohaga zi mevi; ontsi yalyo oyi na oshingoli.

⁷Nondhila yekodhi inayi tseya ondjila ndjo yu uka koomina, nomeho gembiimbili inage yi mona.

⁸Iiyamakuti iinuuntsa inayi yi lamba, nonime inayi enda mo.

⁹Aantu otaa panda omamanya omakukutukukutu, otaa dhikula mo oondundu nomidhi dhadho.

¹⁰Otaa hoko omikala moondundu; omeho gawo oge wete emanya kehe li na ondilo.

¹¹Otaa itsu oonza dhomilonga, notaa holola puuyelele iinima ya holekwa.

¹²Ihe uunongo otau adhika peni? Openi tatu ilongo oondunge?

¹³Omuntu itu uvu ko ondilo yawo; itau adhika maantu yokombanda yevi.

¹⁴Muule womohi kau mo, nefuta kali u na.

¹⁵Itau vulu okulandwa noshingolilela, ondando yawo oyi vule ndjoka yoshisiliveli.

¹⁶Itau vulu okulandwa noshingoli shokuOfir, nenge nomamanya gondilo gaoniks nosafire.

¹⁷Ondilo yawo oyi vule yoshingoli nenge yemanya lyokristali, noitau landakanithwa nuuwe woshingoli.

¹⁸Ondilo yoonyoka noyojaspes itayi adha mo. Ondando yuunongo oyi vule ndjoka yorubini.

¹⁹Itau yelekwa nondilo yotopasi yokuEtiopia; itau vulu okulandwa noshingolielela.

²⁰Ihe uunongo otau zi peni ano? Oondunge otatu dhi adha peni?

²¹Owa holekwa aantu ayehe yokombanda yevi, nowa holekwa oondhila dhokegulu.

²²Eso noshaasi oya ti, oye wu uvu omufofoto.

²³Kalunga oye awike a tseya ondjila yoku wu adha; oye e shi mpoka wa kala.

²⁴Oshoka Kalunga ota mono sigo okooha dhuuyuni, nota tala ayiheyihe yi li kohi yegulu.

²⁵Okwa pe ombepo oonkondo dhayo nokwa yeleke uule womeya.

²⁶Omvula kehe okwe yi ningile eutho, noombadhi ondjila yadho.

²⁷Nena okwa tala uunongo e te wu yeleke; okwe wu koleke ko e te wu zimine.

²⁸Okwa lombwele aantu a ti: “Okutila Kalunga okwo uunongo, nokwiidhilika uuwinayi okwo oondunge.”