Read Oshindonga-Ombiimbeli Ondjapuki 2008 Job 3 Bible Online

Job 3 - Oshindonga-Ombiimbeli Ondjapuki 2008 bible

Job 3

¹Hugunina Job okwa popi e ta thingi esiku lyokuvalwa kwe.

²Esiku nda valwa nali thingwe, nuusiku mbwiyaka kwa tiwa: “Okamati ke ya ko!”

⁴Esiku ndyoka nali shituke omilema; Kalunga komegulu ine li dhiladhila, nuuyelele inau li minikila.

⁵Omilema nomuzizimba gweso nagu li luudhile, niikogo nayi li siikile; uuluudhe nau li kuwikile.

⁶Uusiku mbwiyaka nau ninge omilema; inau yalulilwa momasiku gomumvo, wo inau ya momwaalu gwoomwedhi.

⁷Muusiku mbwiyaka inamu valwa sha, muwo inamu uvika ondigolo.

⁸Mboka haa thingi omasiku, naye shi ninge, oyo tuu mboka yi ilongekidha okupendutha Leviatan.

⁹Oonyothi dhongula nadhi luudhe; okutegelela eluwa naku ninge osima, uusiku inau mona oonte dhongula.

¹⁰Oshoka inau edhilila ndje po osheelo shoshivalelo shameme, u siikile omeho gandje gaa tale iihuna.

¹¹Omolwashike inaandi nyangwa pokuvalwa, ndi se sho ndi li pokupulumuthwa?

¹²Omolwashike oongolo dhameme dha yakula ndje, nomagundji ge ga yamutha ndje?

¹³Ando ngashingeyi onda vululukwa nonda thuwa,

¹⁴opamwe naakwaniilwa naapangeli yevi, mboka yi itungile oombala, ihe ngashingeyi omakulukuma gowala.

¹⁵Onda li ndi na okukala nda fa omalenga, ngoka gu udhitha omagumbo gago oshingoli noshisiliveli.

¹⁶Nenge omolwashike inaandi holekwa mevi nda fa omupononwa, ongaashi okahanona inaaka mona uuyelele wetango?

¹⁷Mombila aakaanakalunga otaa hulitha po okuyona kwawo, omo moka aaloloki taa vululukwa.

¹⁸Aapika wo otaa kala mo ye na ombili; itaa pulakene we omagandagulo.

¹⁹Aanenentu naadhinwa oye thike pamwe, nomupika okwa manguluka komuhona gwe.

²⁰Omolwashike mbo ye li muudhigu taa ethiwa ya kale nomwenyo? Omolwashike aanaluhodhi taa pewa uuyelele?

²¹Oya tegelela eso, ihe itali thiki; otaye li kongo nuupenda lya fa eliko.

²²Itaa nyanyukwa, manga inaaya sa e taa fumvikwa.

²³Omuntu ngoka Kalunga e mu nine iiholekwa, omolwashike e na okukala kombanda yevi e li mekondeka?

²⁴Peha lyokulya otandi lili; omahodhi gandje otaga matuka ga fa omeya.

²⁵Shoka hashi tilitha nokuhalutha ndje, osha ningilwa ndje.

²⁶Kandi na mbili, kandi na luthuwo; kandi na vululuko, ihe epiyagano lyowala.