Read Oshindonga-Ombiimbeli Ondjapuki 2008 Job 30 Bible Online

Job 30 - Oshindonga-Ombiimbeli Ondjapuki 2008 bible

Job 30

¹Ihe ngashingeyi nokuli aagundjuka otaa sheke ndje. Oohe onde ya sheshitha okukala pamwe noombwa dhandje taa litha iimuna.

²Oonkondo dhiikaha yawo inadhi kwatha ndje sha; inaa longela ndje sha.

³Oya li oohepele naasindjala; uusiku oye endagula taa kongo iikulya.

⁴Oya li omafo giihwa, noombimbo odha li iikulya yawo.

⁵Oya li ya kondwa mo maandjawo; aantu oye ya kugile onkugo ya fa aafuthi.

⁶Oya thiminikwa okukala momakololo nomomakwena kohi yomamanya.

⁷Oya kugu mokati kiihwa noyi ingundu mumwe ye li mongoya.

⁸Oya li aagoya naadhinwa noya tidhwa mo moshilongo.

⁹Ngashingeyi oyana otaa sheke ndje miiyimbo; onda ningi omuhapo mokati kawo.

¹⁰Otaa nyanyala ndje e taa kala ndje kokule; inaa tila okuhiyila ndje omayeye moshipala.

¹¹Ngashingeyi sho Kalunga a nkundipaleke ndje nokwa fupipike ndje, oya ponokele ndje mondjahi onene.

¹²Aaponokeli otaa zi ndje kolulyo; oya tegele ndje omwigo, opo ndi lyate mo.

¹³Oya fulile ndje omakelo ga kunduka ndje, ya hala okuyona ndje po pwaa na ekeelelo lyasha.

¹⁴Sho nda kuthwa eshigo lyandje, oya mbolokotele ndje.

¹⁵Uumbanda owa adha ndje; esimano lyandje olya kanene mombepo, nelago lyandje olya pepuka po lya fa iikogo.

¹⁶Ngashingeyi ondi li pokusa; omasiku guudhigu oga adha ndje.

¹⁷Muusiku omasipa gandje otaga tende; uuwehame wandje otau tana noitau fudha po nande.

¹⁸Kalunga ota kama ndje noonkondo dhe oonene e ta pondo ndje.

¹⁹Oku umbile ndje menono nonda ningi nda fa ontsi nomutoko.

²⁰Kalunga, otandi ku kugile ekwatho, ihe ito yamukula; otandi ku galikana, ihe ngoye ito tala ndje.

²¹Ongoye wa pilukile ndje; nowa ponokele ndje noshikaha shoye shoonkondo.

²²Owa akula ndje po nonda yi ombepo, nowa dhenge ndje nepepo lyoshikungulu.

²³Ondi shi shi, ou ukitha ndje muusi, omehala ndyoka lyu uthilwa aantu ayehe.

²⁴Nakutekapo oku na owala okumwena, naangoka e li moshiponga, ita vulu andola okukugila ekwatho?

²⁵Inandi lila molwaamboka ya kala miiponga, nenge omwenyo gwandje inagu ehamenwa oohepele?

²⁶Onda tegelele uuwanawa, ihe uuwinayi wa uluka ko; onda tegelele uuyelele, ihe omilema dha mbunzuka ko.

²⁷Mela lyandje otamu kulukuta mwaa na oluthuwo. Omasiku guuwehame ga akukile ndje.

²⁸Otandi ende momilema thokothoko ndaa na uuyelele; otandi thikama mokati kaantu, ndi pule ekwatho.

²⁹Onda ningi mukwawo gwoombandje nakuume koompo.

³⁰Oshipa shandje osha luudha, sha ninga omakoko notashi natuka ko kolutu; olutu lwandje otalu pi kolwiidhi.

³¹Okuhika okahumba kwandje okwa shituka oosa, nokuhika ohiya kwandje okwa ningi oonkali.