Read Oshindonga-Ombiimbeli Ondjapuki 2008 Job 32 Bible Online

Job 32 - Oshindonga-Ombiimbeli Ondjapuki 2008 bible

Job 32

¹Molwaasho Job okwa li u uvite kutya ke na oondjo, aalumentu mboka yatatu oye etha oku mu yamukula.

²Ihe opwe ya gumwe, edhina lye Elihu lyaBarakel, Omubusi gwomezimo lyaRam. Okwa li a geya a mana mo, oshoka Job okwa li ti iningi ye mwene omuyuuki nokwa pe Kalunga uusama.

³Okwa geele wo ookuume ke yatatu, oshoka oya nyengwa okuyamukula Job noku mu tompa.

⁴Ngashingeyi Elihu okwa kala a tegelela, sigo ya hulitha okupopya naJob, oshoka oya li aakuluntu ye mu vule.

⁵Ihe sho a mono kutya oya tompwa kuJob yo itaa ti we sha, okwa geye

⁶nokwa tameke okupopya. Ngame omunona moomvula, one aakuluntu, onkee nda li nda tila oku mu hololela omadhiladhilo gandje.

⁷Onda tala kutya aakuluntu naa popye; aanamimvodhindji naa holole oondunge dhawo.

⁸Omuntu oku na omwenyo, ihe ombepo yaKalunga Omunankondoawike oyo tayi gandja oondunge.

⁹Uukokele hawo tau ningi omuntu omunandunge, aantu yoomvi hayo ayeke ya tseya shoka shu uka.

¹⁰Onkee ano pulakeneni shoka te ti; pitikii ndje, ndi holole omadhiladhilo gandje.

¹¹Onda tegelele neidhidhimiko, mu mane okupopya; onda pulakene omayele geni, mu mone oohapu dhu uka.

¹²Onda tala nokutongolola, nkene tamu popi, ihe kaku na ngoka a tompele Job uusama we.

¹³Otamu vulu tuu okutya, omu na oondunge? Kalunga oye na yamukule Job, oshoka ne omwa nyengwa.

¹⁴Job ka li ta popi nangame, onkee ngame itandi mu yamukula, ngaashi mwe mu yamukula.

¹⁵Ngashingeyi kaye na we sha shokutya, iitya ye ya yi ontuku.

¹⁶Ngame wo ote mwena, sho itaaya popi we, sho yaa na eyamukulo?

¹⁷Ondi na okupopya notandi popi shoka ndi shi shi.

¹⁸Ondi na oohapu odhindji; ondi na ethiminiko meni lyandje.

¹⁹Onda fa ombago yomaviinu tayi hunga nongaashi ompunda ya fulalala yi li pokutopa.

²⁰Ondi na okupopya, opo ndi fudhe; ondi na okumakula okana, ndi yamukule.

²¹Itandi ka ningila omuntu pondhipi; itandi ka thethenga nando olye.

²²Oshoka ando okwa li handi mbembeleke aantu, ando Kalunga okwa li e na okugeela ndje mbala.