Read Oshindonga-Ombiimbeli Ondjapuki 2008 Job 33 Bible Online

Job 33 - Oshindonga-Ombiimbeli Ondjapuki 2008 bible

Job 33

¹Ano ngashingeyi, pulakena ndje, Job! Ndhindhilika ashihe shoka te popi.

²Otandi popi mo ashihe shoka shi li montulo yandje.

³Oohapu dhandje otadhi zi momutima gwa yela, nomilungu dhandje otadhi popi oshili.

⁴Oshoka ombepo yaKalunga oyo ya shiti ndje, nomufudho gwOmunankondoawike ogwo gwa mwenyeke ndje.

⁵Job, yamukula ndje, ngele oto shi vulu; ilongekidha, u pe ndje omatompelo goye.

⁶Tse nangoye otu thike pamwe koshipala shaKalunga; atuhe otwa kuthwa meloya.

⁷Tala, ito pumbwa okutila ndje; oshikaha shandje itashi ku thindile pevi.

⁸Ondu uvu to ti:

⁹“Kandi na uusama washa; inandi ninga sha sha puka. Onda yela nokandi na oondjo dhasha.

¹⁰Ihe Kalunga ota pe ndje uusama; ota tala ndje nda fa omutondi gwe.

¹¹Oompadhi dhandje ote dhi tula meti nota tonatele oonkatu dhandje adhihe.”

¹²Job, otandi ku lombwele kutya owa puka, oshoka Kalunga omunene e vule omuntu kehe.

¹³Omolwashike to ludhike naye, sho itaa yamukula omanyenyeto gaantu?

¹⁴Kalunga nando oku popye e ta popi ishewe, aantu itaye mu pulakene.

¹⁵Ihe muusiku uuna aantu ya kotha, Kalunga ota popi moondjodhi nomomamoniko.

¹⁶Ewi lyaKalunga otali hiti momakutsi gawo notaa haluka komalondodho ge.

¹⁷Kalunga ota galula omuntu momapuko ge, note mu gamuna kuuntsa.

¹⁸Ote mu hupitha, kaa kulukile meso nokaa se kegongamwele.

¹⁹Kalunga oha putudha omuntu noku mu tumina uuvu noku mu dhenga kolutu nuuwehame.

²⁰Omuvu ota kanitha ehalo lyiikulya, niikulya iitoye ote yi tondo.

²¹Olutu lwe otalu pwine, lwaa na eopalo; omasipa ge ga li gaa wetike, sigo otaga kala puuyelele.

²²Eeno, oku li popepi nokusa, oku li pokuuka kuuyuni wokuusi.

²³Ando opu ye omuyengeli gumwe gwomaayengeli yomayuvi, e mu popile noku mu kwatha, a lombwele omuntu shoka shu uka!

²⁴Molwolukeno omuyengeli ota popi e ta ti: “Mu hupitha, kaa ye meso! Iikulila oyo mbika.”

²⁵Nena olutu lwe otalu shuna ko; talu kolo e talu nkondopala ishewe.

²⁶Uuna ta galikana, Kalunga ote mu sile ohenda. Ota kala nokuhedha koshipala shaKalunga a nyanyukwa. Osho Kalunga ta longele omuntu pauyuuki.

²⁷Omuntu noti imbi montaneho ta ti: “Onda yono, nda goyokitha uuyuuki, ihe inandi pewa ngaashi ndi ilongele.

²⁸Kalunga okwa hupitha ndje meso; otandi kala ndi na omwenyo nokutala uuyelele we.”

²⁹Ayihe mbika Kalunga ote yi ningile omuntu pomathimbo nomathimbo.

³⁰Ote mu hupitha meso, opo a kale muuyelele mokukala kwe.

³¹Job, pulakena ndje; ilongelela, opo ndi popye.

³²Ngele ou na sha shokupopya, otandi pulakene; popya owala, onda hala u ipopile.

³³Ngele ito shi ningi, pulakena ndje owala, notandi ku nongeke oondunge.