Read Oshindonga-Ombiimbeli Ondjapuki 2008 Job 34 Bible Online

Job 34 - Oshindonga-Ombiimbeli Ondjapuki 2008 bible

Job 34

¹Aalumentu ne aanandunge, pulakenii ndje; ne aanawino, uvii ndje.

³Omu shi iikulya iitoye, uuna mwe yi lolo, ihe kamu shi kuyoolola oohapu dhoondunge moku dhi pulakena.

⁴Natu moneni tse yene shoka shu uka; natu ilongeni shoka sho opala.

⁵Job okwa ti kutya oye omukeenashipo, ihe Kalunga okwe mu tindile uuthemba we.

⁶Ota ti: “Onda talwa omufundja, nando kandi na oondjo. Onda yahwa nda yahekeka kiikuti yaKalunga.”

⁷Oku na tuu omuntu a dhina Kalunga a fa Job?

⁸Oye e na ehangano naalunde noku na ekwatathano naakaanakalunga.

⁹Oye ota ti kutya itashi kwatha omuntu sha okukambadhala o opalele Kalunga.

¹⁰Onkee ano ne aanamayele, pulakenii ndje! Itashi vulika Kalunga a longe uugoyoki. Omunankondoawike ita vulu okulonga uuwinayi.

¹¹Oha futile aantu shi thike piilonga yawo, note ya galulile shoka yo yene ye shi ilongela.

¹²Kalunga iha puka, Omunankondoawike iha goyokitha uuyuuki.

¹³Olye e mu pe oonkondo dhokupangela, nolye e mu langeke a tonatele uuyuni auhe?

¹⁴Kalunga ngele ta kutha po ombepo nomufudho,

¹⁵nena kehe omuntu ota si nota shuna montsi yevi.

¹⁶Ngele ou na oondunge, pulakena ndje; pulakena shoka te popi.

¹⁷Ngoka e tonde uuyuuki, ota vulu tuu okuninga omupangeli? Ota vulu tuu okugandja uusama kungoka Omuyuuki nOmunankondo?

¹⁸Kalunga oye ngoka ta geelele aakwaniilwa naanenentu uuhethi nuukolokoshi wawo.

¹⁹Oye iha ningile omalenga pondhipi, ye iha tala aayamba ye vule oohepele, oshoka oyo ayehe oya shitwa kuye.

²⁰Otaa si ombaadhilila mokati kuusiku. Kalunga ota shikashika aantu, notaa kana po; aanankondo ote ya kombo po pwaa na onkambadhala yasha.

²¹Omeho ge oga tonatela oondjenda dhaantu, notaga tala oonkatu dhawo adhihe.

²²Kaku na uuluudhe nenge omilema tadhi vulu okuholeka aalunde.

²³Kalunga ota dhimbulula mbala kutya omuntu omushike, opo e mu uthe.

²⁴Aanankondo ote ya halakanitha po pwaa na ekonakono lyasha, nopeha lyawo ota langeke po yalwe.

²⁵Oshoka okwa tseya iilonga yawo; ote ya umbile momilema, notaa yonukile mo.

²⁶Ote ya geelele uukolokoshi wawo montaneho yaantu ayehe,

²⁷molwaasho ye mu pilamene noya dhini iipango ye.

²⁸Oya thininike oohepele e tadhi kugu kuKalunga, oye noku uvu okulila kwadho e te dhi kwatha.

²⁹Kalunga ngele ta mwena, olye te mu tamaneke? Ngele ta holeke oshipala she, olye te mu mono?

³⁰Iigwana itayi vulu okuninga sha, opo yi keelele omapangelo omakolokoshi.

³¹Job, owa hempulula tuu oondjo dhoye kuKalunga? Owu uvaneka tuu kutya ito yono we?

³²Oto vulu okutya: “Longa ndje shoka ndaa shi shi, nongele onda yona, itandi shi yelekele we?”

³³Kalunga oku na okutokola ando pahalo lyoye, ngele oto tindi okwiitedhulula? Ongoye mwene u na okutokola, hangame. Lombwela ndje ano oshili yoye.

³⁴Aanandunge naalumentu aanamayele mboka yu uvu ndje, otaa ka lombwela ndje taa ti:

³⁵“Job ota popi uugoya, oohapu dhe kadhi na omayele.”

³⁶Sigo oompaka Job okwa popi ngaashi omulumentu omukeenakalunga.

³⁷Keyono lye okwa gwedhele ko okwaavulika; ota sheke Kalunga montaneho yetu atuhe.