Read Oshindonga-Ombiimbeli Ondjapuki 2008 Job 39 Bible Online

Job 39 - Oshindonga-Ombiimbeli Ondjapuki 2008 bible

Job 39

¹Oto tseya, uuna uupundja tau valwa? Owa li to entamene ooholongo tadhi vala?

²Oho yalula oomwedhi dhuusimba wadho? Ou shi, uuna tadhi ka vala?

³Ohadhi tsu enyonti e tadhi vala; uuwehame woshitheta notau kana po.

⁴Uunimwena wadho otau kolo notau kokele melundu; opo ihe otau yi noitau galuka we.

⁵Olye a piitha mo ongolo yomokuti, yi ka nape, nolye e yi mangulula mo moomango?

⁶Onde yi pa ombuga yi kale mo, nomatotha yi hupile mo.

⁷Otayi yi ontuku einyengo lyaantu moshilando, yo inayi hala okuninga onani.

⁸Otayi tala uunapelo wayo koondundu notayi kongo omwiidhi omutalala.

⁹Ompugulu otayi zimine tuu, yi ninge omukalele gwoye, notayi pitika, yi kale moshigunda shoye uusiku?

¹⁰Oto vulu tuu oku yi kutila koshipululo, nenge oku yi helelitha epya lyoye?

¹¹Oto yi inekele molwoonkondo dhayo, noto yi tegelele yi longe po iilonga yoye iidhigu?

¹²Oto yi tegelele yi ku tutile iilya, yi kuthe iilya yoye kolupale?

¹³Omawawa gompo ohaga papama nawa, ihe itayi vulu okutuka ngaashi endoko.

¹⁴Ompo ohayi vugile omayi gayo momvugo, opo ga pupyalekwe kehekevi.

¹⁵Ohayi dhimbwa kutya oompadhi otadhi vulu oku ga lyata, niiyamakuti oku ga nyanyagula.

¹⁶Otayi ningile uumpogona wayo onyanya, wa fa waa shi wayo; kayi na ko nasha, ngele iilonga yayo tayi ningi osima yowala.

¹⁷Oshoka ngame Kalunga inandi yi pa oondunge; onde yi panga uunongo.

¹⁸Ihe uuna tayi yalaleke omawawa, yi matuke, ohayi yolo onkambe nomukayili.

¹⁹Onkambe ongoye we yi pa oonkondo, nenge ongoye we yi zaleka omulenge kothingo?

²⁰Ongoye ho yi nukitha muule, nohayi tilitha aantu, ngele tayi pembe?

²¹Otayi palagula pevi yu uvite uuntsa, notayi uluma okuuka kolugodhi.

²²Kayi na uumbanda washa, negonga itali yi shunitha lwanima.

²³Ombalukutu otayi kolokota pombunda yayo, egonga nomwele otagu tayima.

²⁴Oya lungundja ya hala okukutha kolupadhi; itayi kankama, enkuma ngele lya hikwa.

²⁵Enkuma ngele tali hiki, otayi hehema. Ezimba lyiita otayi li uvile kokule, eigidho lyoondjayi dhiita nonkugo yolugodhi.

²⁶Ongoye wa longo mbiimbili okutuka, uuna ta yalaleke omawawa ge u uka lwokuumbugantu?

²⁷Okelombwelo lyoye ontsa tayi tungile oshihandhila shayo kondungu yondundu?

²⁸Otayi tungile egumbo lyayo koondundu oondeendeka, nokoondungu dhoondundu epopilongulu lyayo.

²⁹Oko nkoka tayi lengalenga notayi mono iikulya yayo.

³⁰Kokuma nkoka ku na omudhimba, oko haku gongala oontsa, nuuntsagona otau li ombinzi.