Read Oshindonga-Ombiimbeli Ondjapuki 2008 Job 41 Bible Online

Job 41 - Oshindonga-Ombiimbeli Ondjapuki 2008 bible

Job 41

¹Oto vulu tuu okuyula eninangamba Leviatan nondjolo, nenge u mange elaka lyalyo nongodhi?

²Oto vulu tuu oku li tula ongodhi meyulu, nenge u ulule olupanda lwalyo nolungona?

³Otali kala tali ku indile, u li sile ohenda? Otali ku pula noohapu oontalala?

⁴Otamu uvathana tuu nalyo e tali zimine, li ninge omupika gwoye sigo aluhe?

⁵Oto li dhanitha tuu, ngaashi ho dhanitha ondhila, nenge u li ninge kuume kaakadhona yaandjeni?

⁶Aayuli yoohi otaa vulu oku li halitha? Aahalithi otaa vulu oku li dhipaga noku li landitha po?

⁷Oshipa shalyo oto shi ulula nolungona, nenge omutse gwalyo nolukupa?

⁸Ngele to li gumu noshikaha shoye, oto dhimbulula uuhahu walyo noito shi yelekele we.

⁹Shaa ngoka ta mono Leviatan, ota tyololoka e ti ihata po.

¹⁰Ngele lya hindwa, otali geye; kaku na ngoka ta vulu oku li ya moshipala.

¹¹Olye ta vulu oku li kondjitha e ta kala e na omwenyo? Kombanda yevi kaku na nando ogumwe ta vulu oku shi ninga.

¹²Onda hala okuhokolola omagulu galyo, uunene noonkondo dhalyo.

¹³Olye ta vulu okuulula omukoya gwalyo? Olye ta hedha kulyo noshitomo?

¹⁴Olye ta yelekele okumakula okana kwalyo? Omayego galyo omatilithi.

¹⁵Ombunda yalyo oyi na iikokonyoto ya londathana ya ninga iiyalo.

¹⁶Kehe oshiyalo osha londa koshikwawo, nokape na nando ombululu.

¹⁷Oya tulwa kumwe nawa, nokaku na ngo te yi kutha kumwe.

¹⁸Ngele tali shemita, otali shela uuyelele; omeho galyo oga fa etango tali piti.

¹⁹Mokana kalyo otamu zi omalaka gomulilo noohandje.

²⁰Olwithi otalu tsina momayulu galyo, ngaashi ombiga tayi yaya, ya hohelithwa iihenguti.

²¹Omufudho gwalyo otagu temitha omulilo, nomalaka gomulilo otaga lukumuka mokana kalyo.

²²Othingo yalyo oyi na oonkondo; ayehe mboka taye li tsakaneke, otaa haluka.

²³Oontumba dholutu lwalyo odha pama; odha kola noitadhi inyenge.

²⁴Omutima gwalyo ogwa kolonda gwa fa emanya, nomukukutu ngaashi emanya lyoshini.

²⁵Uuna tali yambuka po, aanankondo otaa kakama; otaa tilithwa kokwiiyumba kwalyo.

²⁶Egongamwele itali li ulula; osho wo egonga, omwele nenge olukupa

²⁷Oshiyela kulyo oshihenguti showala, noshikushu ombolo yowala.

²⁸Iikuti itayi li fadhukitha po; oku li umba nomamanya itaku ti sha.

²⁹Ondhimbo kulyo oshipipili, notali yolo, ngele tali umbwa negonga.

³⁰Oshipa shela lyalyo oshi na iipakosolwa ya tsa; otali sindolola omisinda lya fa oshileyi shi li montopo.

³¹Otali vongagula efuta omeya e taga fe taga fuluka, notali li pindjaleke, ngaashi ombiga tayi yaya.

³²Omunyengo gwalyo otagu adhima, nomeya otaga tutumike ondutu ontokele.

³³Kombanda yevi kaku na oshinamwenyo she li fa; olyo oshiyamakuti ihaashi tila sha.

³⁴Otali tala nondhino iinamwenyo ayihe iinuuntsa; olyo omukwaniilwa gwiilikama ayihe.