Read Oshindonga-Ombiimbeli Ondjapuki 2008 Job 42 Bible Online

Job 42 - Oshindonga-Ombiimbeli Ondjapuki 2008 bible

Job 42

¹Job okwa yamukula Omuwa.

²Omuwa, onda tseya kutya ayihe oto yi vulu; kaku na shoka tashi ku nyenge.

³Owa pula ndje, ngele ote vulu tuu okugoyokitha uunongo woye, ngame sho ndaa na oondunge. Onda popi iinima ndaa yi shi, iikumitha iinene tayi nyenge omayele gandje.

⁴Owa lombwele ndje, ndi ku pulakene, sho to popi, nowa pula ndje e te yamukula.

⁵Nale onda li nde ku uvu omufofoto, ihe ngashingeyi ondi ku wete nomeho gandje mwene.

⁶Onkee onda sa ohoni molwaayihe mbyoka nde yi popi, notandi itedhulula nokukuutumba montsi nomomutoko.

⁷Omuwa sho a mana okulombwela Job iinima mbika, okwa lombwele Elifas Omuteman a ti: “Otandi ku geele, osho wo ookuume koye yaali, oshoka inamu popila ndje muuwanawa. Inamu popya oshili, ngaashi omuntu gwandje Job e shi ningi.

⁸Ngashingeyi kutheni oongombe heyali noonzi oondumentu heyali, mu dhi fale kuJob. Dhi yambeni omalungunithondjambo molweni yene. Omuntu gwandje Job ne mu galikanene, ongame notandi uvu omaindilo ge e tandi mu dhimine po uugoya weni. Inamu popila ndje moshili, ngaashi omuntu gwandje Job a ningi.”

⁹Osho ngaaka Elifas Omuteman, Bildad Omushuak naSofar Omunaema ya ningi, ngaashi Omuwa e ya lombwele. Omuwa nokwa uvu omagalikano gaJob.

¹⁰Job sho a galikanene ookuume ke, Omuwa okwe mu yambapaleke ishewe nokwa ndambula uuyamba we mokuyeleka naambwiyaka wotango.

¹¹Aamwayina yaJob aalumentu naakiintu nookuume ke oye ya ye mu talele po nokudhana oshituthi megumbo lye. Oye mu hupulutha noye mu hekeleke omoluudhigu auhe mboka a li e u pewa kOmuwa. Kehe gumwe okwa pe Job omagano giimaliwa nokalinga koshingoli.

¹²Omuwa okwa yambeke ohugunina yaJob shi vulithe nale. Job okwa li e na oonzi omayuvi omulongo nagane, oongamelo omayuvi gahamano, oongombe omayuvi gaali nuusino eyuvi.

¹³Okwa li e na oyana aamati yaheyali naakadhona yatatu.

¹⁴Omukadhona omutango okwe mu luku Jemima, omutiyali oKesia nomutitatu oKeren-Happuk.

¹⁵Moshilongo ashihe inamu monika aakiintu aawanawa yo opala ya fa aana yaJob. He okwe ya pe iitopolwa yawo yuuthiga pamwe naamwayina aalumentu.

¹⁶Konima yaambika Job okwa kala e na omwenyo omimvo ethele nomilongo ne. Okwa mono aatekulu naatekulululwa.

¹⁷Job nokwa si omusamane a kulupilila.