Read Oshindonga-Ombiimbeli Ondjapuki 2008 Job 7 Bible Online

Job 7 - Oshindonga-Ombiimbeli Ondjapuki 2008 bible

Job 7

¹Omuntu ita kala nani mekondjo, manga e li kombanda yevi? Omasiku ge inaga fa ganakukutwa miilonga?

²Ongaashi omupika a hala momuzile nongomulongelindjambi ta tegelele ofuto ye.

³Oomwedhi noomwedhi ine mona kutya ote kala ndi na omwenyo. Omausiku otage etele ndje uuwehame.

⁴Ngele tandi ka lala, otandi kala nokudhiladhila, otandi ka penduka tuu? Uusiku otau ningi uule, notandi igalula nda hala ku she.

⁵Olutu lwandje otalu lika po komazinyo nokolwaga, notandi tumbu omathina.

⁶Omasiku gandje otaga tondoka ge vule okweenda kwonane mokuhondja. Otaga hulu po pwaa na etegameno.

⁷Kalunga, dhimbulukwa kutya okukalamwenyo kwandje okwa fa omufudho; omasiku gandje gelago oga hula po.

⁸Ou wete ndje ngashingeyi, ihe ito ka mona ndje we. Oto ka konga ndje, ihe ongohela nda li po.

⁹Ngaashi oshikogo tashi halakana notashi yi, osho naangoka ta kulukile muusi, ita galuka mo we.

¹⁰Ita ka galukila we kaandjawo; ota dhimbiwa kwaayehe mboka ya li ye mu shi.

¹¹Onkee ano itandi mwena! Otandi popi muuwehame wandje notandi yemata muululume womwenyo gwandje.

¹²Kalunga, omolwashike wa langelitha ndje? Oto tala kutya ngame efuta, nenge oshilikama shamo?

¹³Sho te dhiladhila, ontala yandje otayi loolola ndje, ombete yandje otayi yakula ndje uuwehame.

¹⁴Oto halutha ndje noondjodhi noto tilitha ndje nomamoniko.

¹⁵Nandi hogolole po okupondwa e te si, shi vule okukala iipongo yowala.

¹⁶Onda vulwa okukala nomwenyo; itandi kala nagwo sigo aluhe. Ethii ndje, okukala nomwenyo itaku kwatha sha.

¹⁷Omuntu omushike, sho ho mu ningi nawa noho mu sile oshimpwiyu?

¹⁸Oho mu konakona ongula kehe, noto mu yeleke ethimbo kehe.

¹⁹Uunake to etha okutongolola ndje, ito etha nando, ndi fudhe po?

²⁰Ngele nani onda yona kungoye, onda yona shike, ngoye omutonateli gwaantu? Omolwashike wa ningi ndje omushekwa? Onda ningi omutenge kungoye?

²¹Ito dhimi po omayono gandje e to theta po oondjo dhandje? Oshoka ethimbo olya thika, notandi ka lala mbala mombila; oto ka konga ndje, ihe kandi po we.