Read Oshindonga-Ombiimbeli Ondjapuki 2008 Job 8 Bible Online

Job 8 - Oshindonga-Ombiimbeli Ondjapuki 2008 bible

Job 8

¹Bildad Omushuak okwa yamukula ngeyi.

²Sigo uunake to popi oohapu dha tya ngaaka? Oohapu dhoye odhi li mombepo yuuntsa.

³Kalunga ota goyokitha tuu uuyuuki? Omunankondoawike ita vulu okugoyokitha oshili.

⁴Aamwoye sho ya yono kuKalunga, okwe ya geelele eyono lyawo.

⁵Konga Kalunga nomwenyo aguhe e to galikana Omunankondoawike.

⁶Ngele ngoye omuyelele nomuyuuki, nena ota thikama e ku kwathe note ku galulile aanegumbo yoye.

⁷Etameko lyoye olya li eshona, ihe onakuyiwa yoye otayi ka yambekwa.

⁸Pula utale omapipi gonale, noto ka tseya shoka oohekulu ya koneke.

⁹Oshoka tse opo twa valwa ohela nokatu shi po sha; omasiku getu kombanda yevi oga fa omuzizimba.

¹⁰Itaye ku pukulula noku ku longa? Itaye ku hololele shoka shi li moontulo dhawo?

¹¹Omanenge otaga mene tuu pokuma pwaa na edhiya? Oombungu otadhi tsapuka mpoka pwaa na omeya?

¹²Omanga dhi li mokukoka, inaadhi tetwa manga, otadhi ganya mbala dhi vule omwiidhi.

¹³Shika otashi yeleke mboka haa dhimbwa Kalunga, osho wo etegameno lyaakaanakalunga tali kana, uuna Kalunga a dhimbiwa.

¹⁴Shoka yi inekela itashi kwatha sha; shoka yi itula osha fa egumbo lyewiiwili.

¹⁵Ngele oto egamene koondali dhewiiwili, ito vulu okuthikama noito vulu okwiikwatelela ko.

¹⁶Aakaanakalunga oya fa oshimeno sha tsikwa pooha dhomeya nohashi mono etango. Otashi taandeleke omidhi dhasho akuhe.

¹⁷Omidhi dhasho otadhi idhingile komamanya notadhi ikwatelele ko.

¹⁸Ihe uuna tashi vudhwa mo, nena kape na ngoka ta tseya mpo sha li.

¹⁹Otashi kukuta mbala, nopeha lyasho otapu mene shilwe.

²⁰Osha yela kutya Kalunga ite ekelehi omukeenashipo nenge a kwathe omuyoni.

²¹Ote ke ku nyanyudha, noto ka yola.

²²Aatondi yoye ote ke ya sitha ohoni, nomagumbo gaalunde otaga ka teka po.