Read Oshindonga-Ombiimbeli Ondjapuki 2008 Job 9 Bible Online

Job 9 - Oshindonga-Ombiimbeli Ondjapuki 2008 bible

Job 9

¹Job okwa yamukula ngeyi:

²Eeno, onda tseya kutya shika oshoshili. Ihe nakukasa ota wapa ngiini okukala omuyuuki koshipala shaKalunga?

³Kaku na omuntu ta vulu okuludhika naKalunga noku mu yamukula. Ita vulu okuyamukula nando epulo lye limwe lyomomapulo eyuvi.

⁴Kalunga oye omunandunge, oku na oonkondo dha shiga ko; kaku na omuntu ta vulu oku mu kondjitha.

⁵Oondundu ote dhi pungulula inaadhi shi tseya nomokugeya kwe ote dhi hanagula po.

⁶Ota tumu omakakamo gevi, notage li shikashika, nota telaganitha oongudhi dhalyo.

⁷Ota lombwele etango lyaa minikile we nota luudhike oonyothi uusiku.

⁸Oye a alele ko egulu noye te ende kombanda yomakuthikuthi mefuta.

⁹Oye a shiti Oshothi, Okalimbanombwa, Omanyuku nEkaladhidhi.

¹⁰Oha longo iinyengandunge tayi nyenge oondunge dhetu, niikumitha itaayi wapa okuyalulwa.

¹¹Kalunga ngele te ende pungame, itandi mu mono, ngele ta piti po, itandi mu dhimbulula.

¹²Kalunga ngele ta kutha sha, olye ta vulu oku mu keelela? Olye ta vulu oku mu pula: “Oto ningi shike?”

¹³Kalunga ita shunitha ondjahi ye, naakwathi yaRahab otaye mu tsile oongolo.

¹⁴Otandi vulu ngiini okuludhika naKalunga? Otandi adha peni iitya, tu tompathane naye?

¹⁵Nando ondi kale omuyuuki, itandi vulu oku mu yamukula. Otandi vulu owala okwiindila omutokoli gwandje, a sile ndje ohenda.

¹⁶Nando onde mu ithanene e ta yamukula ndje, natango itandi itaale kutya otu uvu ndje.

¹⁷Ota dhengitha ndje oshikungulu noti indjipaleke iilalo yandje pwaa na etompelo.

¹⁸Ite etha we ndi fudhe po; okwa pe ndje uululume.

¹⁹Ote vulu okuthiminika ngoka e na oonkondo e vule ndje? Ote vulu oku mu fala koompangu? Olye te mu fala ko?

²⁰Nando ondi kale omuyuuki, okana kandje otaka pe ndje uusama. Nando ondi kale omukeenashipo, otaka tamaneke ndje.

²¹Nonando kandi na uusama, kashi shi oshinima shandje. Onda vulwa okukala nomwenyo.

²²Ashihe osha faathana: Kalunga ota dhipaga po omuyuuki nomulunde.

²³Ngele omuyuuki ta adhika keso lyombaadhilila, Kalunga ote mu yolo, sho kee na omukumo.

²⁴Uuna uuyuni tau yi mepangelo lyaakaanakalunga, aatokolihapu ayehe ote ya posipaleke. Ngele Kalunga ine shi ninga, olye te shi ningi?

²⁵Omasiku gandje otage endelele ge vule omumatuki; otaga tuka po gaa na nando enyanyu lyasha.

²⁶Otaga matuka ga fa oowato, noga fa omakodhi taga fegula iihakanwa.

²⁷Ngele tandi ti kutya otandi ka dhimbwa omayemato gandje, nena ote lundulula oshipala shandje e tandi imemeha.

²⁸Onda tilithwa kuuwehame, oshoka ondi shi shi kutya Kalunga ita tala ndje omuyuuki.

²⁹Ngele ngame omunandjo, omolwashike tandi ihepeke?

³⁰Kaku na othewa tayi yogo po oondjo dhandje, nomutoko itagu yeleke iikaha yandje.

³¹Kalunga otu umbile ndje moshilambo shontopo, noonguwo dhandje otadhi si ndje ohoni.

³²Oshoka Kalunga ke shi muntu, opo ndi vule oku mu yamukula nondi tamanane naye moompangu.

³³Kape na nando omuntu gumwe ta vulu okuninga omupanguli pokati ketu, a tokole pokati kandje naKalunga.

³⁴Olye ta kutha ndje omadhengo gaKalunga, opo gaa haluthe ndje we?

³⁵Nena ando otandi popi inaandi mu tila, ihe ngashingeyi ite vulu sha.