Read Oshindonga-Ombiimbeli Ondjapuki 2008 Psalms 10 Bible Online

Psalms 10 - Oshindonga-Ombiimbeli Ondjapuki 2008 bible

Psalms 10

¹Omuwa, omolwashike wa kala kokule? Omolwashike wa holama pomathimbo guudhigu?

²Aakolokoshi oyo aainenepeki nohaa tidhagana oohepele; naa yulwe koomwigo ye dhi tega yo yene.

³Omukolokoshi oti itangele uuhalu we uuwinayi; omunyokomi ota sheke e ta dhini Omuwa.

⁴Omukolokoshi ke na ko nasha nOmuwa; mokwiinenepeka kwe ota dhiladhila kutya Kalunga ita kwatha sha.

⁵Omukolokoshi ota tsakanitha ashihe shoka te shi ningi. Omapangulo gaKalunga ita vulu oku ga uva ko; aatondi ye okwe ya nyonkele.

⁶Oye ti ilombwele ta ti: “Itandi ka adhika komupya; itandi ka adhika nando okuudhigu washa.”

⁷Oohapu dhe odhu udha omasheko, iifundja nomatilitho; oku na oohapu dhuutondwe nuukolokoshi.

⁸Oye ha langele aantu momikunda, a dhipage mboka inaaya yona sha. Oye ta ndaadha mboka itaaya vulu okwiikwatha;

⁹ota langele moshiholameno she ngaashi onkoshi. Oye ta lala a langela oonakuhepa; ote ya yulu nomwigo gwe e ta yi nayo.

¹⁰Omapongo otaga lala ga dhengwa; oonkondo oonkolokoshi odhe ga sindi.

¹¹Omukolokoshi oti ilombwele ta ti: “Kalunga ke na ko nasha nasho! Okwa thithikilitha omeho ge noita mono ndje!”

¹²Omuwa, geela aakolokoshi mbo! Dhimbulukwa mboka taa hepekwa!

¹³Omukolokoshi ota vulu ngiini okudhina Kalunga, a tye: “Kalunga ita geele ndje?”

¹⁴Ihe ngoye Kalunga ou wete ayihe; owa tseya uuwehame nomahepeko nowi ilongekidha aluhe okukwatha. Epongo otali igandja kungoye; oho kwatha aluhe aanaluhepo.

¹⁵Hanagula po oonkondo dhaakolokoshi nodhaapwidhi; ya geelela uuwinayi wawo sigo itaa shi ningi we.

¹⁶Omuwa oye omukwaniilwa aluhe sigo aluhe. Aasimaneki yiikalunga otaa ka kana mo moshilongo she.

¹⁷Ngoye Omuwa oto ka pulakena omagalikano gaafupi; oto ke ya tsa omukumo.

¹⁸Oto ku uva okulila kwaathiminikwa nokwoothigwa; oto ke ya uthila pauyuuki, opo oonakukasa yaa longe iihuna.