Read Oshindonga-Ombiimbeli Ondjapuki 2008 Psalms 102 Bible Online

Psalms 102 - Oshindonga-Ombiimbeli Ondjapuki 2008 bible

Psalms 102

¹Omuwa, uva egalikano lyandje, pulakena, sho tandi ku lilile ekwatho!

²Ino thiga ndje po, sho ndi li muudhigu! Pulakena eindilo lyandje, yamukula ndje mbala, sho tandi ku ithana!

³Otandi kana po nda fa olwithi; molutu lwandje otamu pi ongo mu na omulilo.

⁴Onda leela nda fa omwiidhi gwa ganya; onda kanitha ehalo lyiikulya.

⁵Otandi tongo mokule; onda nanga omasipa gowala.

⁶Ondi li muuwike nda fa endoko mombuga, ongaashi ehwiyu momakulukuma.

⁷Ohe lala inee kotha; ondi ikalela nda fa okadhila ke li kombanda yondunda.

⁸Esiku kehe aatondi yandje otaa sheke ndje; otaa yolo ndje notaa tumbula edhina lyandje nomusheko.

⁹Iikulya yandje omutoko; nokunwa kwandje okwa gwedhakanithwa nomahodhi,

¹⁰oshoka owa geele ndje; owe etha ndje nowe ekelehi ndje.

¹¹Omasiku gandje oga fa omuzile gwokomatango, ongaashi omwiidhi tagu kukuta.

¹²Ihe Omuwa, ongoye omukwaniilwa sigo aluhe; omaluvalo agehe otage ku dhimbulukwa.

¹³Oto yeluka, u sile Sion ohenda; ethimbo olya thiki oku shi etela olukeno. Ndika olyo ethimbo lyo opala.

¹⁴Tse aapiya yoye otu hole omutungilo gwasho; otu uvite oluhodhi, sho sha halakanithwa po.

¹⁵Iigwana otayi ka tila Omuwa, naakwaniilwa ayehe yomuuyuni eadhimo lye.

¹⁶Uuna Omuwa ta ka tungulula Sion, ota ka holola uunene we.

¹⁷Ota ka uva omagalikano gomapongo noita ka dhina omaindilo gago.

¹⁸Nyola ayihe mbika, u yi pungulile omaluvalo tage ya, opo mboka inaaya valwa natango ya ka tseye shoka Omuwa e shi longo e taye mu simaneke.

¹⁹Omuwa ota tala pevi e li megulu muuyapuki we; ota mono kombanda yevi.

²⁰Otu uvu omakemo goonkwatwa nota mangulula mbo ya tokolelwa eso.

²¹Hambeleleni Omuwa, ne oonakukala megulu; nota ka simanekwa muJerusalem,

²²uuna iigwana nomapangelo tayi ka gongala okusimaneka Omuwa.

²³Omuwa okwa nkundipaleke ndje, manga omugundjuka; okwa fupipike omasiku gandje.

²⁴Kalunga, ino kutha ndje po, manga inaandi kulupa. Omuwa, ou na omwenyo aluhe sigo aluhe;

²⁵nalenale owa shiti evi, neyalelo olyo iilonga yiikaha yoye.

²⁶Oyo otayi hulu po, ihe ngoye oto kalelele; ayihe otayi ka kulupa ya fa oonguwo. Oto ke yi ekelahi ya fa iinyanyu, notayi kana po.

²⁷Ihe ngoye oto kala ngaashi wa za, ito hulu po.

²⁸Megameno lyoye aana yetu otaa kala ya vululukwa, nomaluvalo gawo oto ke ga popila.