Read Oshindonga-Ombiimbeli Ondjapuki 2008 Psalms 104 Bible Online

Psalms 104 - Oshindonga-Ombiimbeli Ondjapuki 2008 bible

Psalms 104

¹Mwenyo gwandje, hambelela Omuwa. Omuwa Kalunga kandje, ongoye omunene ngiini! Owa zala esimano neadhimo;

²owi isiikila uuyelele. Owa yala egulu ngaashi othayila

³nowa tungile egumbo lyoye mokati komeya gokombanda. Iikogo owe yi ningi ya fa etemba lyoye lyokweenda mo, nombepo omawawa goye gokutuka.

⁴Iihomo yombepo oto yi ningi aatumwa yoye, noombadhi aapiya yoye.

⁵Evi owe li tula komakankameno ga kola, itali tenguka.

⁶Kombanda yalyo owa yala ko efuta ngaashi onguwo; omeya galyo oga tumba ge vule oondundu.

⁷Sho wi iganda, omeya oga yi ontuku; oga fadhuka po, sho gu uvu endundumo lyelombwelo lyoye.

⁸Oga kunguluka ga zi koondundu nokuuka momasilu, okomahala nkoka we ga uthile.

⁹Owe ga dhikile oongamba itaadhi kondwa, nowe ga ngambeke kaaga siikile we evi.

¹⁰Owa tula oothithiya momasilu nowa palele omilonga pokati koondundu.

¹¹Otadhi gandja omeya kiiyamakuti; uusino womokuti otau zi enota.

¹²Momiti dhopooha dhomeya uudhila otau tungile mo iihandhila e tau nyanyukwa.

¹³Miikogo otamu zi omvula tayi loko koondundu; evi olya kuta omayambeko goye.

¹⁴Oto menitha omwiidhi gwiimuna niimeno yokukwatha aantu, sho to ya menithile mevi iipalutha.

¹⁵Omaviinu otaga nyanyudha omuntu, omagadhi otaga adhimitha oshipala, niikulya otayi pe omuntu oonkondo oompe.

¹⁶Omisendeli dhaLibanon odha lokwa omvula oyindji; odho omiti dhOmuwa e dhi kuna.

¹⁷Uudhila otau tungile mo iihandhila yawo, nomandoko otaga tungile mo wo.

¹⁸Uupundja otau ende koondundu, nuuhele oko tau holama.

¹⁹Owa shiti omwedhi okuutha omathimbo; etango oli shi ethimbo lyokuningina kwalyo.

²⁰Owa tula ko uusiku; momilema iikwakuti ayihe otayi hituluka.

²¹Oonimegona ohadhi pumbu, sho tadhi kongo iikulya; Kalunga ote dhi pe iipalutha yadho.

²²Shaa tuu etango tali piti, ayihe otayi shuna yi ka lale komahala gayo.

²³Ihe aantu otaa penduka, ya ye kiilonga, notaa longo sigo okomatango.

²⁴Omuwa, owa shiti iinima oyindji! Tala nkene wa shiti ayihe noondunge! Evi olyu udha iishitwa yoye.

²⁵Tala efuta enene lya mbwalangandja, omu na iinamwenyo yaa shi kuyalulwa, iinene niishona.

²⁶Oosikepa otadhi ende mefuta; Leviatan ndjoka wa shiti, otayi dhanene mo.

²⁷Ayihe mbika otayi ligamene kungoye, u yi pe iipalutha pethimbo.

²⁸Oto yi pe e tayi taamba; oto yi palutha e tayi kuta.

²⁹Uuna to yi etha, otayi haluka; ngele to kutha po omufudho gwayo, otayi si notayi shuna montsi yevi.

³⁰Ihe ngele to yi pe omufudho, nena otayi shitwa; oto pepaleke olupe lwevi.

³¹Esimano lyOmuwa nali kale sigo aluhe! Omuwa na nyanyukilwe eshito lye!

³²Oye okwa tala evi, olyo nolya kakama; okwa gumu oondundu, odho nodha kungu omulilo.

³³Onda hala okwiimbila Omuwa omasiku gandje agehe; onda hala okuhambelela Kalunga kandje, manga ndi na omwenyo.

³⁴Omuwa na taambe ndje, sho tandi mu dhiladhila; otandi nyanyukilwa Omuwa.

³⁵Aalunde naa kane ko kombanda yevi, naakaanakalunga inaa monika ko we. Omwenyo gwandje, hambelela Omuwa! Halleluja!