Read Oshindonga-Ombiimbeli Ondjapuki 2008 Psalms 105 Bible Online

Psalms 105 - Oshindonga-Ombiimbeli Ondjapuki 2008 bible

Psalms 105

¹Hambeleleni Omuwa, uvitheni uunene we; lombweleni iigwana shoka a longo.

²Imbileni Omuwa omahambelelondjimbo; hokololeni iilongankumwe e yi longo.

³Tangeni edhina lye eyapuki; amuhe mbo hamu ya koshipala shOmuwa, nyanyukweni!

⁴Kongeni ekwatho kOmuwa, ne mu mu simaneke aluheluhe.

⁵Ne oluvalo lwaAbraham, omupiya gwe, ne oluvalo lwaJakob, omuhogololwa gwe, dhimbulukweni iikumithalonga mbyoka Kalunga e yi longo nomapangulo ngoka a gandja.

⁷Omuwa oye Kalunga ketu; oye ta pangula uuyuni auhe.

⁸Ota dhiginine ehangano lye sigo aluhe, euvaneko lye sigo omaluvalo nomaluvalo.

⁹Ota dhiginine ehangano lye naAbraham neuvaneko lye kuIsak.

¹⁰Omuwa okwa dhike ehangano lya kola naJakob, ehangano lyaaluhe naIsrael.

¹¹Oye okwa ti: “Otandi ke ku pa evi lyaKaanan, notali ka ninga eliko lyoye.”

¹²Aantu yaKalunga oya li aashona komwaalu; oya kala oondjendi mevi lyaKaanan

¹³Oya tembukile koshilongo noshilongo; oya kala mokati kaantu mbaka naambeyaka.

¹⁴Ihe Kalunga ina pitika ya hepekwe; okwe ya gamene nokwa ganda aapangeli ta ti:

¹⁵“Inamu ningila aahogololwa yandje uuwinayi, inamu ehameka aahunganeki yandje.”

¹⁶Omuwa okwa tumine oshilongo shawo ondjala nokwa kutha po iikulya ayihe.

¹⁷Okwe ya tetekelithile omulumentu gumwe, Josef, ngoka a landithwa po omupika.

¹⁸Oye okwa kwatwa e ta tulwa momalyenge nokwa tulwa olinga yosheela mothingo,

¹⁹sigo ehunganeko lye lya gwanithwa. Oohapu dhOmuwa odhe shi koleke wo.

²⁰Omukwaniilwa gwaEgipiti okwe mu mangululitha mo; omupangeli gwiigwana okwe mu piitha mo.

²¹Okwe mu ningi elenga lyegumbo lye nomutonateli gweliko lye alihe.

²²Okwa lenge Josef mokati komalenga ge agehe, a pukulule aagandjindunge ye.

²³Opo ihe Jakob okwe ke ya kuEgipiti nokwa tula moshilongo shoka.

²⁴Omuwa okwa pe aantu ye oluvalo olwindji; okwe ya ningi aanankondo ye vule aatondi yawo.

²⁵Aayegipiti okwe ya sikumudha, ya tonde aantu ye noya kotokele aapiya ye.

²⁶Okwe ya tumine omupiya gwe Moses, naAaron, omuhogololwa gwe.

²⁷Kalunga okwe ya longitha iinyengandunge nokwe ya ningitha iikumithalonga muEgipiti.

²⁸Kalunga okwa tumine oshilongo shAayegipiti omilema, oshoka inaa vulika kelombwelo lye.

²⁹Omilonga dhawo dhomeya okwe dhi shitukitha ombinzi nokwa dhipaga po oohi dhawo adhihe.

³⁰Oshilongo shawo osha li tashi wiwima omafuma; oga li gu udha nomoondjugo dhaapangeli yawo.

³¹Kalunga okwa popi kutya naku ye oompawe nomatopola; iipupu yayo noya tuka noshilongo ashihe.

³²Peha lyomvula, okwa tumine oshilongo shawo oompawe noombadhi.

³³Okwa halakanitha po omiviinu nomikwiyu dhawo nokwa teya po omiti dhawo.

³⁴Okwa popi, oombahu nodha holoka, omayuvi nomayuvi.

³⁵Odha li po iimeno ayihe yomomapya; odha mana po iikunwa ayihe.

³⁶Okwa dhipaga po iisheelimati yawo ayihe, aavalwa yawo aatango ayehe.

³⁷Nena okwa piitha mo Aaisraeli; oya zi mo noshisiliveli noshingoli, naayehe oya li aayamba naanankondo.

³⁸Aayegipiti oya li ya tila nAaisraeli oya li ya nyanyukwa, sho ya zi mo.

³⁹Kalunga okwa tula ko oshikogo okusiikila aantu ye, nuusiku uuyelele woku ya minikila.

⁴⁰Oye mu pula nokwe ya tumine iimote; okwe ya pe iikulya yomegulu, e ya paluthe.

⁴¹Okwa tsu ombululu memanya, omeya noga tsipuka mo, noga kunguluka nombuga ngaashi omulonga.

⁴²Omuwa okwa dhimbulukwa euvaneko lye eyapuki e li uvanekele omupiya gwe Abraham.

⁴³Oye okwa piitha mo aahogololwa ye noyi imbi nokunyanyukwa.

⁴⁴Okwe ya langeke miilongo yaantu yalwe, nomapya gawo okwe ga pe po Aaisraeli

⁴⁵Okwe shi ningi, opo aantu ye ya vulike kiipango ye noya dhiginine omalombwelo ge. Halleluja!