Read Oshindonga-Ombiimbeli Ondjapuki 2008 Psalms 106 Bible Online

Psalms 106 - Oshindonga-Ombiimbeli Ondjapuki 2008 bible

Psalms 106

¹Hambeleleni Omuwa! Gandjeni omapandulo kOmuwa, oshoka ye omwaanawa; ohole ye oyaaluhe.

²Olye ta vulu okuyalula iikumitha mbyo a longa? Olye ta vulu oku mu pa esimano lya gwana?

³Aanelago oomboka haa kala moshili, mboka haa longo aluhe shoka shu uka.

⁴Omuwa, dhimbulukwa ndje, uuna to sile aantu yoye ohenda; hupitha ndje wo, uuna to ya hupitha.

⁵Talitha ndje uulinawa waantu yoye aahogololwa, opo ndi nyanyukwe pamwe noshigwana shoye nondi itangele mungoye pamwe nayo.

⁶Otse otwa yono ngaashi ootate wo; otwa longo uudhudhu nuukolokoshi.

⁷Ootate muEgipiti inaa longwa sha kiilongakumithi yaKalunga. Oya dhimbwa, nkene a kala e ya hole aluhe, sho ya tangalala pEfuta etiligane.

⁸Ihe okwe ya hupitha ngaashi u uvaneke, opo i iholole kutya oye omunankondo.

⁹Okwa lombwele Efuta etiligane li gandje ompito, olyo nolya pwine, nokwe enditha aantu ye puukukutu.

¹⁰Okwe ya hupitha miikaha yaatondi yawo nokwe ya yugulula ko kaahepeki yawo

¹¹Ihe omeya oga siikile aatondi yawo; inapu hupa nando ogumwe.

¹²Nena aantu ye oyi itaale omauvaneko ge noye mu imbile ehambelelo.

¹³Ihe konima oya dhimbwa shoka e shi longo noya longo inaaya pula ewiliko lye.

¹⁴Mombuga oya falafalwa komahalo gawo ga puka noya hindi Kalunga.

¹⁵Kalunga okwe ya pe shoka ye mu indile, ihe okwe ya tumine wo omukithi omudhigu.

¹⁶Mombuga oya sile Moses efupa, naAaron omuhogololwa gwOmuwa.

¹⁷Evi olye ekama nolya nina po Datan; olya siikile Abiram naangandjawo ayehe.

¹⁸Omulilo ogwa hwamene aalanduli yawo nogwa fike po aakolokoshi mboka.

¹⁹PuSinai oya tholoma ontana yoshingoli noya galikana oshikalunga shoka.

²⁰Peha lyokusimaneka Kalunga, oya simaneke efano lyoshinamwenyo hashi li omwiidhi.

²¹Oya dhimbwa Kalunga ngoka e ya hupitha, ngoka a longo iilongankondo muEgipiti,

²²oongoka a ningi iilonga iikumithi niitilithi pEfuta etiligane.

²³Kalunga sho a popi kutya okwa hala okuyona po aantu ye, omupiya gwe Moses okwa thikama nokwa galikana Kalunga e te mu indile kee ya geele.

²⁴Ano oyi iteka evi ewanawa, oshoka inaa itaala euvaneko lyaKalunga

²⁵Oya kala momatsali taa ngungutula noinaa hala okuuva Omuwa shoka ta ti.

²⁶Omuwa okwe ya lombwele elondodho lya kola kutya ngele itaa vulika, ote ke ya etha, ya sile mombuga.

²⁷Ote ke etha oluvalo lwawo lu sile nolu halakanene miilongo niilongo.

²⁸PuPeor oyi igameke kuBaal noya li omayambo ga yambelwa iikalunga yaa na omwenyo.

²⁹Oya geyitha Omuwa niilonga yawo noya adhika komukithi gwelega.

³⁰Ihe Pinehas okwa thikama nokwa geele aayoni, nomukithi ogwa mwena.

³¹Shika osha holola uuwanawa wOmuwa, notashi ka dhimbulukiwa komaluvalo nomaluvalo.

³²Pomeya gaMeriba aantu oya geyitha Omuwa, naMoses okwa geelwa omolwawo.

³³Oya geyitha Ombepo yaKalunga, onkee Moses okwe ya nyenyetele itaa fudha po.

³⁴Inaa halakanitha po aapagani, ngaashi Omuwa e ya lombwele,

³⁵ihe oya hokanathana nayo noya taamba omikalo dhawo.

³⁶Oya simaneke iimenka yawo, naashika oshe ya fala meyonuuko.

³⁷Oya gandja oyana aamati naakadhona, ya ninge omayambo kiikalunga yAakaanana.

³⁸Oya dhipaga oyana yaa na oondjo, noshilongo osha nyatekwa kiilonga yawo.

³⁹Oyi inyateke niilonga yawo noye etha Kalunga.

⁴⁰Omuwa nokwa geele aantu ye; oya ningi iikungitha kuye.

⁴¹Okwe ya ethele miikaha yaapagani, noya yi mepangelo lyaatondi yawo.

⁴²Aatondi yawo oye ya hepeke noye ya humbateke omitenge omidhigu.

⁴³Olwindji Omuwa okwa kala nokuhupitha aantu ye, ihe yo inaa vulika noya yono aluhe.

⁴⁴Ihe Omuwa oku uvu onkugo yawo, sho ye li muudhigu, ye ina gamuka ko kuyo.

⁴⁵Okwa dhimbulukwa ehangano lye ndyoka e li dhike molwawo, nokwa geuluka molwohole ye.

⁴⁶Okwa pe aahepeki yawo ombepo yolukeno, opo ye ya sile ohenda.

⁴⁷Omuwa Kalunga ketu, tu hupitha! Tu galula ngu u tu kongolole mo mokati kiigwana, opo tu ka pandule e tatu simaneke edhina lyoye eyapuki.

⁴⁸Hambeleleni Omuwa, Kalunga kaIsrael; mu simanekeni nena nosigo aluhe! Kehe gumwe na tye: “Amen!”