Read Oshindonga-Ombiimbeli Ondjapuki 2008 Psalms 107 Bible Online

Psalms 107 - Oshindonga-Ombiimbeli Ondjapuki 2008 bible

Psalms 107

¹Hambeleleni Omuwa, oshoka oye omwaanawa; esilohenda lye otali kala aluhe.

²Mboka ya hupithwa kOmuwa, naa tumbule iitya mbika yepandulo. Okwe ya hupitha miikaha yaatondi yawo.

³Okwe ya kutha kiilongo hoka ya li ko oondjendi, noye ya taa zi kuuzilo nokuuninginino, kuumbangalantu nokuumbugantu.

⁴Yamwe yomuyo oye ende mombuga yaa na ondjila, yo inaa mona epola lyu uka moshilando, opo ya kale mo.

⁵Oya li ya sa ondjala nenota noya kanitha omukumo.

⁶Nena muudhigu wawo oyi ithana Omuwa, nokwe ya hupitha mo moshiponga.

⁷Okwe ya enditha nondjila yu ukilila nokwe ya fala moshilando ya kale mo.

⁸Naa pandule Omuwa omolwesilohenda lye nomolwiilonga iikumithi e yi ya ningile.

⁹Mbo ya sa enota, ote ya pe omeya gokunwa, naambo ya sa ondjala, ote ya pe uuwanawa owindji.

¹⁰Yamwe oya li moluhodhi nomomilema, oonkwatwa ya mangwa nomalyenge,

¹¹oshoka oya tsu ondumbo nelombwelo lyaKalunga noya dhini omalongo gaGwokombandambanda.

¹²Oya longithwa iilonga iidhigu tayi ya thindile pevi, nokakwa li ku na omukwathi.

¹³Ihe muudhigu wawo oyi ithana Omuwa; oye nokwe ya hupitha mo methiminiko.

¹⁴Okwe ya kutha mo moluhodhi nomomilema nokwa teya po omalyenge ge ya manga.

¹⁵Naa pandulile Omuwa esilohenda lye, omolwiikumitha e yi ya ningile.

¹⁶Okwa mwakula omiyelo dhoshikushu nokwa teya po iitenda yokupatitha.

¹⁷Yamwe oya li aagoya noya geelwa omolwoondjo dhawo nomoluukolokoshi wawo.

¹⁸Oya tondo iikulya noya li popepi nokusa.

¹⁹Muudhigu wawo oyi ithana Omuwa, nokwe ya hupitha mo moshiponga.

²⁰Okwe ya aludha nohapu ye nokwe ya hupitha meso.

²¹Naa pandulile Omuwa esilohenda lye, omolwiikumitha e yi ya ningile.

²²Naye mu pandule nomayambo nomahambelelondjimbo, naa hokolole iilonga ye.

²³Yamwe oya li aayendifuta moosikepa noya halitha iipindi yawo momafuta omanene.

²⁴Oya mono iilonga yOmuwa niikumitha ye momafuta.

²⁵Omuwa okwa popi, noombepo oonene odha pepe, nodha tukulutha omakuthikuthi.

²⁶Oosikepa odhu umbilwa mombanda, nodha gwile muule mwi. Aayendimo oya li moshiponga oshinene.

²⁷Oya nukauka nokupundauka ya fa oonkolwi; uunkulungu wawo inau ya kwatha sha.

²⁸Muudhigu wawo oyi ithana Omuwa, nokwe ya hupitha mo moshiponga.

²⁹Okwa loteke ombepo yoshikungulu nokwa mweneke omakuthikuthi.

³⁰Oya nyanyudhwa kemweno lyoshikungulu, Omuwa sho e ya thikitha kehelulilo ho ya li yu uka.

³¹Naa pandulile Omuwa esilohenda lye, omolwiikumitha e yi ya ningile.

³²Naye mu simaneke megongalo lyaantu ye, naye mu tange moshigongi shaawiliki,

³³Omuwa okwa kukutike thilu omilonga nokwa pwinike oothithiya.

³⁴Etathapya okwe li ningi evi lyoshimongwa, omolwiilonga iiwinayi yaakalimo.

³⁵Ombuga okwe yi ningi oondombe dhomeya; evi lya kangala okwe li shitukitha oothithiya.

³⁶Aasindjala okwe ya pe egumbo noya tungu oshilando ya kale mo.

³⁷Oya kunu omapya noya tsike omiviinu, noya mono eteyo enene

³⁸Okwa yambeke aantu ye, e taa kala ye na oluvalo olwindji, niimuna yawo okwe yi indjipaleke.

³⁹Aantu ye oya sindika noya fupipikwa komathiminiko omadhigu.

⁴⁰Ihe Omuwa ota shundula aapangeli note ya tula mombuga yaa na ondjila.

⁴¹Onkee oohepele okwe dhi hili mo methiminiko nokwi indjipalitha omazimo gaIsrael ga fa iigunda yoonzi.

⁴²Aayuuki naa tale e taa nyanyukwa, ihe aakolokoshi naa mweneke omakana gawo.

⁴³Mboka ye na oondunge, naa dhiladhile nawa iinima mbika, inaa dhimbwa esilohenda enene lyOmuwa.