Read Oshindonga-Ombiimbeli Ondjapuki 2008 Psalms 118 Bible Online

Psalms 118 - Oshindonga-Ombiimbeli Ondjapuki 2008 bible

Psalms 118

¹Hambeleleni Omuwa, oshoka oye omwaanawa, nesilohenda lye otali kala sigo aluhe.

²Aaisraeli naa tye: “Esilohenda lye otali kala sigo aluhe.”

³Ezimo lyaAaron nali tye: “Esilohenda lye otali kala sigo aluhe.”

⁴Mboka haa galikana Omuwa naa tye: “Esilohenda lye otali kala sigo aluhe.”

⁵Muudhigu wandje ondi ithana Omuwa, Omuwa noku uvu ndje e ta hupitha ndje.

⁶Omuwa oku li pamwe nangame, onkee itandi tila sha; aantu otaa ningi ndje shike?

⁷Omuwa oku li pamwe nangame, oye omukwathi gwandje; ota ka sindila ndje aatondi yandje.

⁸Okwiinekela Omuwa oku vule okwiitula maantu.

⁹Okwiinekela Omuwa oku vule okwiitula maapangeli.

¹⁰Aatondi yandje ayehe oya kunduka ndje, ihe medhina lyOmuwa otandi ya halakanitha po.

¹¹Nando naa kundukidhe ndje koombinga adhihe, medhina lyOmuwa otandi ya halakanitha po.

¹²Oyu uminine ndje ya fa oonyushi, ihe otaa pi po mbala ngaashi omano. Medhina lyOmuwa otandi ya halakanitha po.

¹³Ondu undulwa lwanima, konyala ndi gwile po, ihe Omuwa okwa kwatha ndje.

¹⁴Omuwa okwa ningi ndje omunankondo, notandi mu hambelele; oye omuhupithi gwandje.

¹⁵Onkugilili yenyanyu noyesindano otayi uvika momatsali gaayuuki: Olulyo lwOmuwa olwa longo iilongankondo.

¹⁶Iilongankondo ye oye tu etele esindano.

¹⁷Ngame itandi si; otandi kala ndi na omwenyo notandi hokolola iilonga yOmuwa.

¹⁸Omuwa okwa geele ndje noonkondo, ihe ina etha ndje, ndi se.

¹⁹Egululilii ndje iiyelo yotempeli, ndi ye mo, ndi hambelele Omuwa!

²⁰Omweelo gwOmuwa ogwo nguka; omo moka aayuuki taa pitile.

²¹Ngame otandi ku hambelele, Omuwa, sho wu uvu ndje nowa ningi omuhupithi gwandje.

²²Emanya ndyoka aatungi ye li ekelehi, olya ningi emanya li na esimano li vule agehe.

²³Osha, ningwa kOmuwa, nosha ningi oshikumitha momeho getu.

²⁴Esiku olyo tuu ndika Omuwa e li utha: tu imbeni pombanda tse tu li nyanyukilweni!

²⁵Omuwa, tu hupitha; Omuwa, tu pa elago!

²⁶Kalunga na laleke nuuyamba ngoka te ya medhina lyOmuwa Otatu mu laleke nuuyamba mongulu yOmuwa.

²⁷Omuwa oye Kalunga; okwe tu minikile nuuyelele we. Tu dhaneni oshituthi tu na iiyale yomilunga, tu uka lwokoshiyambelo.

²⁸Ongoye Kalunga kandje, nonda hala oku ku hambelela. Ongoye Kalunga kandje, onda hala oku ku simaneka.

²⁹Hambeleleni Omuwa, oshoka oye omwaanawa, nesilohenda lye, otali kala sigo aluhe.