Read Oshindonga-Ombiimbeli Ondjapuki 2008 Psalms 139 Bible Online

Psalms 139 - Oshindonga-Ombiimbeli Ondjapuki 2008 bible

Psalms 139

¹Omuwa, ongoye to konakona ndje nowa tseya ndje.

²Owa tseya ndje, uuna nda kuutumba nongele nda thikama; omadhiladhilo gandje agehe oto ga tseya, manga inaaga holoka.

³Ou wete ndje, ngele tandi yi kiilonga nenge te vululukwa; ashihe shoka te ningi, ou shi wete.

⁴Omuwa, manga inaandi tumbula sha, owa tseya nale shoka tii ka tya.

⁵Owa kunduka ndje koombinga adhihe; oshikaha shoye oshi li kombanda yomutse gwandje.

⁶Okutseya ndje kwoye otaku kumitha ndje unene; otaku nyenge oondunge dhandje.

⁷Otandi yi peni ontuku Ombepo yoye? Otandi vulu tuu oku ku holama?

⁸Ngele tandi londo kegulu, oko u li; ngele tandi ka lala muuyuni wokuusi, naamoka omo u li.

⁹Ngele te tuka ndu uka lwokuuzilo, nenge ndi ka kale kokule kuuninginino,

¹⁰naahoka oshikaha shoye otashi kala nokuwilika ndje; olulyo lwoye otalu kwata ndje.

¹¹Nando ondi lombwele omilema, dhi siikile ndje, nomutenya gu shituke uusiku,

¹²ongoye to mono ko nomomilema. Uusiku owa yela wa fa omutenya, oshoka omilema nuuyelele kungoye oya faathana.

¹³Ongoye wa shiti ashihe shi li mungame; owa tungile ndje mela lyameme.

¹⁴Otandi ku hambelele e tandi ku simaneke, oshoka onda shitwa nuunkulungu. Iilonga yoye iikumithi; shika ondi shi shi nawa.

¹⁵Omasipa gandje sho ga shitwa noga tulwa kumwe nawa mela lyameme, naasho nda li te koko meholamo, owa li u shi shi.

¹⁶Owa mono ndje, manga inaandi valwa. Omasiku nde ga uthilwa, agehe oga nyolelwa membo lyoye, manga inaaga thika.

¹⁷Omadhiladhilo goye, Kalunga, olye te ga tseya? Ogo ogendji taga nyengana okuyalulwa.

¹⁸Ngele tandi ga yalula, ogo ogendji ge thike pehekevi lyopefuta. Ngele te penduka, ondi li natango pamwe nangoye.

¹⁹Kalunga, ando u dhipage po aakolokoshi mboka! Zii po pungame, aadhipagi ne!

²⁰Otaye ku lundile notaa popi nayi edhina lyoye.

²¹Omuwa, ondi tonde mboka ye ku tonde notandi nyanyala mboka taye ku tsile ondumbo.

²²Otandi ya tondo nda mana mo; onde ya tala oyo aatondi yandje.

²³Konakona ndje, Kalunga, ngoye u tseye omutima gwandje; tala ndje, u dhimbulule omadhiladhilo gandje.

²⁴Tala ndje, ngele ndi li mondjila ndjoka yu uka kekano, u endithile ndje mondjila yaaluhe.