Read Oshindonga-Ombiimbeli Ondjapuki 2008 Psalms 141 Bible Online

Psalms 141 - Oshindonga-Ombiimbeli Ondjapuki 2008 bible

Psalms 141

¹Omuwa, otandi ku ithana; endelela, u ye kungame! Uva eigidho lyegalikano lyandje!

²Taamba omagalikano gandje ngaashi omatsinino; okuyelutha iikaha yandje naku ninge eyambo lyongulohi

³Omuwa, tula omulangeli kokana kandje; langeka omukeeleli posheelo shomilungu dhandje.

⁴Gamena ndje, ndaa hongololwe, ndaa longe uulunde pamwe naakolokoshi; ino etha, ndi ye kiituthi yawo.

⁵Osho opala, omuyuuki ngele ta ganda ndje e ta dhenge ndje Otashi fe omugwayo gwomagadhi komutse gwandje. Ihe omagalikano gandje otaga tamaneke iilonga yaakolokoshi.

⁶Aapangeli yawo otaa ka undulilwa molumbogo, aakolokoshi notaa ka tseya kutya oohapu dhandje odhoshili.

⁷Ngaashi eputa tali henyagwa notali papulwa, osho omasipa gawo taga ka halakanena poombila dhawo.

⁸Onde ku inekela, Omuwa Omupangeliawike; omungoye tandi kongo egameno; ino ethela ndje meso.

⁹Gamena ndje koomwigo ye dhi tegela ndje nokomakelo nde ga fulilwa kaakolokoshi.

¹⁰Aakaanakalunga naa gwile momakelo gawo yene, manga ngame te pitilile po nombili.