Read Oshindonga-Ombiimbeli Ondjapuki 2008 Psalms 144 Bible Online

Psalms 144 - Oshindonga-Ombiimbeli Ondjapuki 2008 bible

Psalms 144

¹Omuwa na hambelelwe, oye omugameni gwandje; ota longekidhile ndje olugodhi.

²Kalunga oye ohole nepopilongulu lyandje; oye omuhupithi noshikandekitho shandje, nomuye tandi holama. Oye ngoka ta sindile ndje iigwana.

³Omuwa, omuntu omushike, sho ho mu dhimbulukwa? Ke shi sha, nando u na oshimpwiyu naye.

⁴Omuntu okwa fa omufudho; omasiku ge oga fa omuzizimba tagu kana po.

⁵Omuwa, tuula egulu, u kulukile pevi; guma oondundu, dhi ze olwithi.

⁶Adhimitha olwaadhi, u halakanithe aatondi yoye; umba iikuti e to ya piyaganeke.

⁷Ukitha oshikaha shoye pevi, u hile ndje momeya omale e to hupitha ndje. Yululula ndje miikaha yaakwiilongo,

⁸mboka ihaaya popi oshili, ihe ohaa kotokele.

⁹Kalunga, onda hala oku ku imbila eimbilo epe; onda hala ndi ku imbile nokahumba.

¹⁰Ongoye to pe aakwaniilwa esindano, nowa hupitha omuntu gwoye David kegonga etilithi.

¹¹Hupitha ndje ngu u kanyutulule ndje miikaha yaakwiilongo, oomboka ihaaya popi oshili, ihe ohaa kotokele.

¹²Aana yetu aamati muugundjuka wawo naa fe iimeno tayi koko nawa. Aana yetu aakadhona naa fe oongudhi dhuulenga mombala.

¹³Iigandhi yetu nayi kale yu udha iikulya ye tu gwana. Oonzi dhetu koohambo nadhi tane lwomayuvi omulongo.

¹⁴Iimuna yetu nayi ninge iisimba e tayi vala nawa itaayi gwitha. Momapandaanda getu inamu ka uvika onkugo yasha.

¹⁵Oshigwana shi li ngeyi, oshi na elago; oshigwana shi na Omuwa, oye Kalunga kasho, oshi na elago.