Read Oshindonga-Ombiimbeli Ondjapuki 2008 Psalms 148 Bible Online

Psalms 148 - Oshindonga-Ombiimbeli Ondjapuki 2008 bible

Psalms 148

¹Halleluja! Hambeleleni Omuwa! Hambeleleni Omuwa, ne yomegulu! Mu hambeleleni mboka mu li kombandambanda!

²Mu hambeleleni, aayengeli ne amuhe! Mu hambeleleni, aakwiita ye ayehe yomegulu.

³Mu hambeleleni, etango nomwedhi, noonyothi oondjelele nadhi mu hambelele.

⁴Mu hambeleleni, ne omauyuni gokombanda, nomeya gokohi yeyalelo.

⁵Ayihe nayi simaneke edhina lyOmuwa! Oye a popi, oyo noya holoka po.

⁶Kelombwelo lye ayihe oya thikama pomahala gayo, naayihe otayi vulika kuye.

⁷Ayihe yokevi nayi hambelele Omuwa, iikwameya iinene muule womefuta,

⁸Oombadhi noompawe, olumi nosheentsi, noombepo dhoshikungulu ndhoka hadhi vulika kelombwelo lye.

⁹Hambeleleni Omuwa, ne oondundu niikulundundu, omiti dhiiyimati naandhoka dhomokuti;

¹⁰iiyamakuti ayihe niimuna, iihono noondhila.

¹¹Mu hambeleleni, ne aakwaniilwa naantu ayehe, aana yokombanda naapangeli ayehe;

¹²aamati naakadhona, aakulupe nuunona.

¹³Ayihe nayi hambelele edhina lyOmuwa; edhina lye olyo alike li na okusimanekwa; esimano lye oli li kombanda yevi nomegulu.

¹⁴Oshigwana she okwe shi ningi oshinankondo. Aaisraeli opo ye mu simaneke; oyo aantu ye e ya hole. Halleluja!