Read Oshindonga-Ombiimbeli Ondjapuki 2008 Psalms 18 Bible Online

Psalms 18 - Oshindonga-Ombiimbeli Ondjapuki 2008 bible

Psalms 18

¹Omuwa, ondi ku hole ngiini! Ongoye omupopili gwandje.

²Omuwa oye omugameni gwandje; oye epopilongulu lyandje lya kola. Kalunga kandje oye omugameni gwandje, puye ondi li nawa. Oye oshikandekitho tashi gamene ndje; ota shigi ndje e ta kaleke ndje nawa.

³Otandi ithana Omuwa, oye nota gamene ndje kaatondi yandje. Omuwa na hambelelwe!

⁴Oshiponga sheso osha kundukidha ndje; omakuthikuthi geyonuuko oga gwilile ndje po.

⁵Oshiponga sheso osha dhingilila ndje, noshilambo shombila oshe ekamena ndje.

⁶Muudhigu wandje ondi ithana Omuwa; ondi ithana Kalunga kandje, a kwathe ndje. Oku uvu ewi lyandje motempeli ye; okwa pulakene okulilila kwandje ekwatho.

⁷Nena evi olyi inyenge e tali kakama; omakota goondundu oga tanduka e taga kakama, oshoka Kalunga okwa li a geya.

⁸Olwithi olwa gundumuka momayulu ge, omalaka gomulilo nomakala ga hanya oga zi mokana ke.

⁹Okwa tuula eyalelo e ta kulukile pevi noshikogo oshiluudhe kohi yoompadhi dhe.

¹⁰Okwa tuka nondapo onene a kayila omukerubi; okwe ende komawawa gombepo.

¹¹Okwi ikumbikile momilema; iikogo iiluudhe yu udha omeya, oye mu kundukidha.

¹²Oompawe nomashelo gomulilo oya zi meadhimo lyoshipala she noya mbanduka miikogo iiluudhe.

¹³Nena Omuwa, okwa ndunduma mewangandjo; ewi lyagwokombandambanda olyu uvika.

¹⁴Oku umbu iikuti ye, aatondi ye e taa halakana; nomashelo goombadhi okwe ya halakanitha po.

¹⁵Ondandelo yefuta oya mbenzuka ko, nomakankameno gevi oge ya pontundulu, Omuwa, sho wa ganda aatondi yoye nowe ya ndundumine mondjahi.

¹⁶Omuwa okwa ganeke okwooko kwe e ta kwata ndje; okwa hili ndje mo mombwili yomeya.

¹⁷Oye a hupitha ndje maatondi yandje aanankondo nomwaayehe mboka haa tondo ndje — oyo ya tono ndje oonkondo.

¹⁸Sho nda li moshiponga, oya ponokele ndje, ihe Omuwa okwa gamene ndje.

¹⁹Oye a pititha ndje moshiponga; okwa hupitha ndje, oshoka okwa hokwa ndje.

²⁰Omuwa ota futu ndje, oshoka ohandi longo shoka shu uka; ota yambeke ndje, oshoka ine yona sha.

²¹Onda vulika kompango yOmuwa; inandi pilamena Omuwa gwandje.

²²Onda dhiginine iipango ye ayihe; inandi iteka omalombwelo ge.

²³Omuwa a tseya kutya kandi na uusama, nonda hala ndi ikeelela okulonga uuwinayi.

²⁴Nena ota futu ndje, oshoka onda longo shoka shu uka, oshoka oku shi shi kutya kandi na oondjo.

²⁵Omuwa, ongoye omwiinekelwa mokukalathana naamboka ye ku inekela; ngoye omwaanawalela kumboka yaa na oshipo shasha.

²⁶Ngoye omuyogoki kumboka aayogoki, ihe ou tonde aadhudhu.

²⁷Oto hupitha mboka haa ishonopeke, ihe oto shonopeke mboka ye hole uuntsa.

²⁸Omuwa, oto pe ndje uuyelele; oto tidha po omilema pungame.

²⁹Oto tsu ndje omukumo okuhomona aatondi yandje, noonkondo okusinda omaigameno gawo.

³⁰Kalunga oha longo nawa! Oohapu dhe odhi shi kwiinekelwa! Oye a fa oshikandekitho kumboka taa kongo egameno.

³¹Omuwa oye awike Kalunga; Kalunga oye awike omupopili gwetu.

³²Oye Kalunga ngoka ta koleke ndje, ngoka ta gamene ndje mondjila.

³³Ota koleke oompadhi dhandje, ndi tondoke ngompundja; ota gamene ndje, ngele tandi ende koondundu.

³⁴Ota longo ndje olugodhi, opo ndi longithe omatati ngo ga kola.

³⁵Omuwa, ongoye to gamene ndje e to hupitha ndje; esiloshimpwiyu lyoye olya nenepekitha ndje, noonkondo dhoye odha gamene ndje.

³⁶Owa gamene ndje, ndaa yiwe nangame, noine gwila po.

³⁷Otandi landula aatondi yandje e tandi ya kwata; itandi mwena, sigo nde ya thekeke po.

³⁸Otandi ya pundulile pevi, yo itaa vulu we okuthikama; oya gwile po nde ya sinda.

³⁹Oto pe ndje omukumo molugodhi, ndi sinde aatondi yandje.

⁴⁰Oto fafagulitha po aatondi yandje; otandi hanagula po mbo ye tonde ndje.

⁴¹Otaa kugu onkugo, ihe kaku na nando ogumwe te ya kwatha; otaa ithana Omuwa, ihe ite ya yamukula.

⁴²Otandi ya nyanyagula po, e taa ningi ngaashi ontsi yevi, ndjoka tayi pepwa po kombepo. Otandi ya lyatagula ngaashi enono lyomondjila.

⁴³Owa hupitha ndje miikaha yaadhudhu nowa ningi ndje omupangeli gwiigwana; aantu nda li ndaa ya shi, oya ningi aalelwa yandje.

⁴⁴Aakwiilongo otaa tsile ndje oongolo; ngele te popi, otaa vulika.

⁴⁵Otaa tyololoka notaa zi moohote dhawo taa kakama.

⁴⁶Omuwa oku na omwenyo! Omupopili gwandje na hambelelwe! Uvitheni uunene waKalunga, omuhupithi gwandje.

⁴⁷Ota sinditha ndje aatondi yandje; iigwana ote yi tula mepangelo lyandje,

⁴⁸nota hupitha ndje miikaha yaatondi yandje. Omuwa, oto sinditha ndje aatondi yandje; oto gamene ndje miikaha yaapwidhi.

⁴⁹Onkee tandi ku simaneke mokati kiigwana; otandi ku imbile omahambelelo.

⁵⁰Kalunga ota gandja omasindano omakumithi komukwaniilwa gwe; ota holola ohole ye yaaluhe kungoka e mu hogolola, oDavid noluvalo lwe sigo aluhe.